1 Wafalme 21

1Baada ya mambo hayo, Nabothi Myezreeli alikuwa na shamba la mizabibu huko Yezreeli, kando ya jumba la kifalme la Ahabu, mfalme wa Samaria. 2Ahabu akamwambia Nabothi, “Nipe shamba lako la mizabibu niwe nalo kama bustani ya mboga, kwa kuwa liko karibu na jumba langu. Badala yake nitakupa shamba la mizabibu lililo bora zaidi, au ukipenda, nitakulipa thamani yake kwa fedha.” 3Lakini Nabothi akamwambia Ahabu, “BWANA apishe mbali nisikupe urithi wa babu zangu!” 4Basi Ahabu akarudi nyumbani akiwa na uchungu na hasira kwa sababu ya maneno ambayo Nabothi Myezreeli alimwambia: “Sitakupa urithi wa babu zangu.” Akajilaza kitandani, akageuzia uso ukutani, akakataa kula. 5Yezebeli mkewe akaingia, akamwuliza, “Kwa nini umehuzunika hivi hata hutaki kula?” 6Akamwambia, “Nilisema na Nabothi Myezreeli, nikamwambia, ‘Niuzie shamba lako la mizabibu, au ukipenda, nitakupa shamba lingine la mizabibu badala yake.’ Lakini akasema, ‘Sitakupa shamba langu la mizabibu.’” 7Yezebeli mkewe akamwambia, “Je, si wewe unayetawala kama mfalme juu ya Israeli sasa? Inuka ule kitu, uchangamke. Mimi mwenyewe nitakupatia shamba la mizabibu la Nabothi Myezreeli.” 8Basi akaandika barua kwa jina la Ahabu, akazipiga muhuri wake, akazipeleka kwa wazee na watu wakuu wa mji wa Nabothi, waliokaa pamoja naye huko. 9Katika barua hizo aliandika: “Tangazeni mfungo, mkamketishe Nabothi mbele ya watu. 10Waketisheni watu wawili wasiofaa kitu mbele yake, wamshtaki hivi: ‘Umemlaani Mungu na mfalme.’ Kisha mtoeni nje, mkampige kwa mawe mpaka afe.” 11Watu wa mji wa Nabothi, wazee na watu wakuu walioishi huko, wakafanya kama Yezebeli alivyowaagiza, sawasawa kabisa na ilivyoandikwa katika barua alizowapelekea. 12Wakatangaza mfungo, wakamketisha Nabothi mbele ya watu. 13Kisha wale watu wawili wasiofaa kitu wakaingia, wakaketi mbele yake, nao wakamshtaki Nabothi mbele ya watu: “Nabothi amemlaani Mungu na mfalme.” Basi wakampeleka nje ya mji, wakampiga kwa mawe mpaka akafa. 14Kisha wakatuma ujumbe kwa Yezebeli: “Nabothi amepigwa kwa mawe, naye amekufa.” 15Mara Yezebeli aliposikia kwamba Nabothi amepigwa kwa mawe na amekufa, alimwambia Ahabu, “Inuka umiliki shamba la mizabibu ambalo Nabothi Myezreeli alikataa kukuuzia. Nabothi hayuko hai tena. Amekufa.” 16Ahabu aliposikia kwamba Nabothi amekufa, akainuka akashuka kwenda kwenye shamba la mizabibu la Nabothi Myezreeli ili alimiliki.

17Kisha neno la BWANA likamjia Eliya Mtishbi: 18“Inuka ushuke kukutana na Ahabu mfalme wa Israeli, anayetawala huko Samaria. Sasa hivi yuko katika shamba la mizabibu la Nabothi; ameshuka huko ili alimiliki. 19Mwambie, ‘Hivi ndivyo BWANA asemavyo: Je, umeua na pia kujitwalia mali?’ Kisha umwambie, ‘Hivi ndivyo BWANA asemavyo: Mahali pale mbwa walipoiramba damu ya Nabothi, mbwa watairamba damu yako pia, naam, yako wewe.’” 20Ahabu akamwambia Eliya, “Je, umenipata, adui yangu?” Eliya akajibu, “Nimekupata, kwa sababu umejiuza kufanya maovu machoni pa BWANA. 21Nitaleta maafa juu yako. Nitawafagilia mbali wazao wako, nami nitamkatilia mbali Ahabu kila mwanamume katika Israeli, mtumwa au huru. 22Nitaifanya nyumba yako kama nyumba ya Yeroboamu mwana wa Nebati na kama nyumba ya Baasha mwana wa Ahiya, kwa sababu umenikasirisha na kuwaongoza Israeli kutenda dhambi. 23Tena kuhusu Yezebeli BWANA amesema: ‘Mbwa watamla Yezebeli karibu na ukuta wa Yezreeli.’ 24Yeyote wa Ahabu atakayekufa mjini, mbwa watamla, na yeyote atakayekufa nyikani, ndege wa angani watamla.” 25Kwa kweli hapakuwa na mtu kama Ahabu, aliyejiuza kufanya maovu machoni pa BWANA, akichochewa na mkewe Yezebeli. 26Alitenda kwa namna ya kuchukiza mno kwa kuzifuata sanamu, kama walivyofanya Waamori, ambao BWANA aliwafukuza mbele ya Waisraeli.

27Ahabu aliposikia maneno hayo, alirarua mavazi yake, akavaa gunia mwilini, akafunga. Akalala akiwa amevaa gunia, akatembea kwa unyonge.

28Kisha neno la BWANA likamjia Eliya Mtishbi: 29“Je, umeona jinsi Ahabu alivyojinyenyekeza mbele yangu? Kwa kuwa amejinyenyekeza mbele yangu, sitaleta maafa wakati wa uhai wake. Nitaleta maafa juu ya nyumba yake katika siku za mwanawe.”