1 Wafalme 14

1Wakati huo Abiya mwana wa Yeroboamu aliugua. 2Yeroboamu akamwambia mkewe, “Tafadhali inuka ujibadilishe sura, ili mtu yeyote asitambue kwamba wewe ni mke wa Yeroboamu, uende Shilo. Ahiya nabii yuko huko, yule aliyeniambia kwamba ningekuwa mfalme juu ya watu hawa. 3Nenda kwake ukichukua mkononi mikate kumi, maandazi kadhaa na chupa ya asali. Yeye atakuambia litakalompata kijana.” 4Mke wa Yeroboamu akafanya hivyo. Akaondoka akaenda Shilo, akafika nyumbani kwa Ahiya. Ahiya hakuweza kuona; macho yake yalikuwa yamefifia kwa uzee.

5Lakini BWANA alikuwa amemwambia Ahiya, “Mke wa Yeroboamu anakuja kukuuliza neno kuhusu mwanawe, kwa sababu ni mgonjwa. Utamwambia hivi na hivi. Atakapofika, atajifanya kuwa mwanamke mwingine.” 6Mara Ahiya aliposikia sauti ya hatua zake mlangoni, akasema, “Ingia, mke wa Yeroboamu. Kwa nini unajifanya kuwa mtu mwingine? Nimetumwa kwako na habari nzito. 7Nenda umwambie Yeroboamu, ‘Hivi ndivyo BWANA, Mungu wa Israeli, asemavyo: Nilikuinua kutoka katikati ya watu, nikakufanya kiongozi juu ya watu wangu Israeli. 8Niliurarua ufalme kutoka mikononi mwa nyumba ya Daudi nikakupa wewe. Lakini wewe hukuwa kama mtumishi wangu Daudi, aliyezishika amri zangu, akanifuata kwa moyo wote, akafanya tu yaliyo sawa machoni pangu. 9Umefanya maovu kuliko wote waliokutangulia. Ulikwenda ukajitengenezea miungu mingine, sanamu za chuma kilichoyeyushwa, ili kunikasirisha, nawe umenitupa nyuma ya mgongo wako.

10Kwa hiyo nitaleta maafa juu ya nyumba ya Yeroboamu. Nitamkatilia mbali Yeroboamu kila mwanamume katika Israeli, mtumwa au huru. Nitayateketeza mabaki ya nyumba yake, kama mtu ateketezavyo mavi mpaka yasibaki. 11Yeyote wa Yeroboamu atakayekufa mjini, mbwa watamla, na yeyote atakayekufa nyikani, ndege wa angani watamla. Kwa maana BWANA amesema.’ 12Lakini wewe, inuka urudi nyumbani kwako. Mara miguu yako itakapoingia mjini, mtoto atakufa. 13Israeli wote watamwombolezea na kumzika. Yeye ndiye peke yake wa Yeroboamu atakayewekwa kaburini, kwa sababu ndani yake limeonekana jambo jema kwa BWANA, Mungu wa Israeli, katika nyumba ya Yeroboamu. 14BWANA atajiinulia mfalme wake mwenyewe juu ya Israeli, naye ataikatilia mbali nyumba ya Yeroboamu. Siku ndiyo hii; naam, imekwisha kuanza. 15BWANA atampiga Israeli mpaka ayumbe kama unyasi majini. Atamng’oa Israeli kutoka katika nchi hii nzuri aliyowapa babu zao, na kuwatawanya ng’ambo ya mto Frati, kwa sababu wametengeneza miti yao ya Ashera na kumkasirisha BWANA. 16Atamwacha Israeli kwa sababu ya dhambi za Yeroboamu, alizozitenda na ambazo kwa hizo aliwaongoza Israeli kutenda dhambi.” 17Kisha mke wa Yeroboamu akaondoka, akaenda, akafika Tirza. Alipokuwa akivuka kizingiti cha nyumba, kijana akafa. 18Wakamzika, na Israeli wote wakamwombolezea, kama BWANA alivyosema kupitia mtumishi wake Ahiya nabii. 19Mambo mengine ya Yeroboamu, jinsi alivyopigana vita na jinsi alivyotawala, yameandikwa katika Kitabu cha Historia ya Wafalme wa Israeli. 20Yeroboamu alitawala miaka ishirini na miwili. Kisha akapumzika pamoja na babu zake, na mwanawe Nadabu akawa mfalme mahali pake.

21Rehoboamu mwana wa Sulemani alitawala katika Yuda. Rehoboamu alikuwa na umri wa miaka arobaini na mmoja alipoanza kutawala, naye akatawala miaka kumi na saba huko Yerusalemu, mji ambao BWANA aliuchagua kati ya makabila yote ya Israeli kuwa mahali pa jina lake. Mama yake aliitwa Naama Mwamoni. 22Yuda alifanya maovu machoni pa BWANA. Kwa dhambi walizotenda walichochea wivu wake kuliko yote waliyofanya babu zao. 23Wao pia wakajijengea mahali pa juu, nguzo za mawe na miti ya Ashera juu ya kila kilima kirefu na chini ya kila mti wenye majani mengi. 24Hata kulikuwa na makahaba wa kiume wa mahali pa ibada katika nchi. Watu walifanya machukizo yote ya mataifa ambayo BWANA aliyafukuza mbele ya Waisraeli.

25Katika mwaka wa tano wa mfalme Rehoboamu, Shishaki mfalme wa Misri alipanda kuushambulia Yerusalemu. 26Alichukua hazina za nyumba ya BWANA na za ikulu ya mfalme. Alichukua kila kitu, hata ngao zote za dhahabu alizotengeneza Sulemani. 27Mfalme Rehoboamu akatengeneza ngao za shaba badala yake, akawakabidhi wakuu wa walinzi waliolinda lango la ikulu ya mfalme. 28Kila mara mfalme alipoingia nyumbani mwa BWANA, walinzi walizibeba ngao hizo, kisha wakazirudisha katika chumba cha walinzi. 29Mambo mengine ya Rehoboamu na yote aliyoyafanya yameandikwa katika Kitabu cha Historia ya Wafalme wa Yuda. 30Kulikuwa na vita kati ya Rehoboamu na Yeroboamu siku zao zote. 31Rehoboamu akapumzika pamoja na babu zake, akazikwa pamoja nao katika mji wa Daudi. Mama yake aliitwa Naama Mwamoni. Na mwanawe Abiyamu akawa mfalme mahali pake.