1 Wafalme 10

1Malkia wa Sheba alisikia habari za umaarufu wa Sulemani, umaarufu uliohusiana na jina la BWANA, akaja kumjaribu kwa maswali magumu. 2Alifika Yerusalemu na msafara mkubwa sana, ngamia wakibeba manukato, dhahabu nyingi sana na vito vya thamani. Alipofika kwa Sulemani, alizungumza naye juu ya kila kitu kilichokuwa moyoni mwake. 3Sulemani alijibu maswali yake yote; hakuna jambo lililokuwa gumu mno kwa mfalme kumweleza. 4Malkia wa Sheba alipoona ukubwa wote wa hekima ya Sulemani, na ikulu aliyoijenga, 5chakula cha mezani pake, jinsi maafisa wake walivyoketi, huduma ya wahudumu wake na mavazi yao, wanyweshaji wake, na sadaka za kuteketezwa alizotoa katika nyumba ya BWANA, aliishiwa na pumzi. 6Akamwambia mfalme, “Habari niliyoisikia katika nchi yangu mwenyewe juu ya maneno yako na hekima yako ilikuwa kweli. 7Lakini sikuyaamini yaliyosemwa mpaka nilipokuja na kuona kwa macho yangu mwenyewe. Na kweli, sikuambiwa hata nusu. Hekima yako na fanaka yako vinazidi sana habari niliyoisikia. 8Jinsi gani watu wako walivyo na heri! Heri maafisa wako hawa, wanaosimama mbele yako daima na kusikia hekima yako! 9Na abarikiwe BWANA Mungu wako, aliyependezwa nawe na kukuweka juu ya kiti cha enzi cha Israeli! Kwa sababu BWANA anawapenda Israeli milele, amekufanya mfalme ili utende hukumu na haki.” 10Kisha akampa mfalme karibu kilo 4,080 za dhahabu, manukato mengi sana na vito vya thamani. Hayakuja tena kamwe manukato mengi kama yale ambayo malkia wa Sheba alimpa mfalme Sulemani. 11Merikebu za Hiramu, zilizobeba dhahabu kutoka Ofiri, zilileta pia kutoka Ofiri miti mingi sana ya msandali na vito vya thamani. 12Mfalme aliitumia miti ya msandali kutengeneza nguzo za nyumba ya BWANA na za ikulu ya mfalme, pamoja na vinubi na zeze kwa ajili ya waimbaji. Miti ya msandali kama hiyo haijaletwa tena wala kuonekana mpaka leo. 13Mfalme Sulemani alimpa malkia wa Sheba kila kitu alichotamani na kuomba, zaidi ya zawadi alizompa kwa ukarimu wake wa kifalme. Kisha akageuka akarudi nchi yake, yeye na watumishi wake.

14Uzito wa dhahabu iliyomjia Sulemani katika mwaka mmoja ulikuwa karibu kilo 22,600 za dhahabu, 15bila kuhesabu yaliyotoka kwa wachuuzi wasafiri na biashara ya wafanyabiashara, na kwa wafalme wote wa Arabia na watawala wa nchi. 16Mfalme Sulemani alifanya ngao kubwa mia mbili za dhahabu iliyofuliwa, na karibu kilo 6.9 za dhahabu ziliingia katika kila ngao. 17Alifanya pia ngao mia tatu za dhahabu iliyofuliwa, na karibu kilo 1.8 za dhahabu ziliingia katika kila ngao. Mfalme akaziweka katika Nyumba ya Msitu wa Lebanoni.

18Kisha mfalme akafanya kiti kikubwa cha enzi cha pembe za ndovu, akakifunika kwa dhahabu iliyo bora kabisa. 19Kiti cha enzi kilikuwa na ngazi sita, na sehemu ya juu ya mgongo wake ilikuwa ya mviringo. Pande zote mbili za kiti kulikuwa na mahali pa kuegemeza mikono, na simba wawili walisimama kando yake. 20Simba kumi na wawili walisimama huko juu ya ngazi sita, mmoja kila mwisho wa kila ngazi. Hakuna kitu kama hicho kilichowahi kufanywa kwa ufalme wowote. 21Vikombe vyote vya kunywea vya mfalme Sulemani vilikuwa vya dhahabu, na vyombo vyote katika Nyumba ya Msitu wa Lebanoni vilikuwa vya dhahabu safi. Hakuna kilichokuwa cha fedha; siku za Sulemani fedha haikuhesabiwa kuwa kitu. 22Kwa maana mfalme alikuwa na merikebu za Tarshishi baharini pamoja na merikebu za Hiramu. Mara moja kila miaka mitatu merikebu hizo za Tarshishi zilifika zikileta dhahabu, fedha, pembe za ndovu, nyani na tausi. 23Basi mfalme Sulemani akawazidi wafalme wote wa dunia kwa utajiri na kwa hekima. 24Dunia yote ilitafuta kuonana na Sulemani, ili kusikia hekima ambayo Mungu alikuwa ameiweka moyoni mwake. 25Kila mmoja wao alileta zawadi: vyombo vya fedha na dhahabu, mavazi, silaha na manukato, farasi na nyumbu, kiasi fulani kila mwaka.

26Sulemani aliunda jeshi la magari ya vita na wapanda farasi. Alikuwa na magari ya vita elfu moja na mia nne na wapanda farasi elfu kumi na mbili, aliowaweka katika miji ya magari ya vita na pamoja na mfalme huko Yerusalemu. 27Mfalme aliifanya fedha kuwa ya kawaida huko Yerusalemu kama mawe, na mierezi akaifanya kuwa mingi kama mikuyu ya Shefela. 28Farasi wa Sulemani waliletwa kutoka Misri na kutoka Kue; wafanyabiashara wa mfalme waliwanunua kutoka Kue kwa bei ya soko. 29Gari la vita lingeweza kuletwa kutoka Misri kwa karibu kilo 6.9 za fedha, na farasi kwa karibu kilo 1.7. Vivyo hivyo, kupitia wafanyabiashara wa mfalme, waliwauzia wafalme wote wa Wahiti na wafalme wa Aramu.