1 Wafalme 4

1Mfalme Sulemani alitawala kama mfalme juu ya Israeli wote.

2Hawa ndio waliokuwa maafisa wake wakuu: Azaria mwana wa Sadoki alikuwa kuhani;

3Elihorefu na Ahiya, wana wa Shisha, walikuwa makatibu; mwandishi wa kumbukumbu alikuwa Yehoshafati mwana wa Ahiludi; 4Benaya mwana wa Yehoyada alikuwa mkuu wa jeshi; Sadoki na Abiathari walikuwa makuhani;

5Azaria mwana wa Nathani alikuwa msimamizi wa wakuu wa wilaya; Zabudi mwana wa Nathani alikuwa kuhani na rafiki wa mfalme; 6Ahishari alikuwa msimamizi wa ikulu, na Adoniramu mwana wa Abda alikuwa msimamizi wa kazi ya kulazimishwa.

7Sulemani alikuwa na wakuu wa wilaya kumi na wawili juu ya Israeli wote, waliompatia mfalme na watu wa nyumbani mwake chakula. Kila mmoja wao alipaswa kutoa mahitaji kwa mwezi mmoja katika mwaka.

8Haya ndiyo majina yao: Ben-huri, katika nchi ya milima ya Efraimu;

9Ben-dekeri, katika Makazi, Shaalbimu, Beth-shemeshi na Eloni-beth-hanani;

10Ben-hesedi, katika Arubothi; Soko na nchi yote ya Heferi vilikuwa chini yake;

11Ben-abinadabu, katika Nafath-dori yote (Tafathi, binti Sulemani, alikuwa mke wake);

12Baana mwana wa Ahiludi, katika Taanaki na Megido na Beth-sheani yote kando ya Sarethani chini ya Yezreeli, tangu Beth-sheani mpaka Abel-mehola na kupita Yokmeamu;

13Ben-geberi, katika Ramoth-gileadi. Vijiji vya Yairi mwana wa Manase katika Gileadi vilikuwa chini yake, pamoja na eneo la Argobu katika Bashani: miji mikubwa sitini yenye kuta na makomeo ya shaba;

14Ahinadabu mwana wa Ido, katika Mahanaimu; 15Ahimaasi, katika Naftali (yeye pia alikuwa amemwoa binti Sulemani, Basemathi); 16Baana mwana wa Hushai, katika Asheri na Bealothi;

17Yehoshafati mwana wa Parua, katika Isakari;

18Shimei mwana wa Ela, katika Benyamini;

19Geberi mwana wa Uri, katika nchi ya Gileadi, eneo la Sihoni mfalme wa Waamori na la Ogu mfalme wa Bashani. Katika nchi hiyo kulikuwa na msimamizi mmoja. 20Watu wa Yuda na Israeli walikuwa wengi kama mchanga wa pwani; walikula, wakanywa, wakafurahi.

21Sulemani alitawala falme zote tangu Mto Frati mpaka nchi ya Wafilisti, hata mpakani mwa Misri. Falme hizo zililipa kodi na kumtumikia Sulemani maisha yake yote.

22Mahitaji ya Sulemani kwa siku moja yalikuwa kama lita 6,600 za unga laini na kama lita 13,200 za unga, 23ng’ombe kumi walionenepeshwa, ng’ombe ishirini wa malishoni na kondoo na mbuzi mia moja, zaidi ya kulungu, paa, swala na ndege walionenepeshwa. 24Kwa maana alitawala eneo lote la magharibi ya Frati, tangu Tifsa mpaka Gaza, juu ya wafalme wote wa magharibi ya Frati, naye alikuwa na amani pande zote kumzunguka. 25Watu wa Yuda na Israeli waliishi salama, kila mtu chini ya mzabibu wake na chini ya mtini wake, tangu Dani mpaka Beer-sheba, maisha yote ya Sulemani.

26Sulemani alikuwa na mabanda elfu arobaini ya farasi kwa ajili ya magari yake ya vita, na wapanda farasi elfu kumi na mbili. 27Wasimamizi hao walimpatia mfalme Sulemani mahitaji, pamoja na wote waliokuja mezani pa mfalme Sulemani, kila mmoja katika mwezi wake. Walihakikisha kwamba hakuna kilichopungua. 28Pia walileta shayiri na majani kwa ajili ya farasi na farasi wepesi mahali ilipohitajika, kila mmoja kwa kadiri ya zamu yake.

29Mungu alimpa Sulemani hekima na ufahamu mwingi sana, na upana wa akili mkubwa kama mchanga wa ufuoni mwa bahari. 30Hekima ya Sulemani ilikuwa kubwa kuliko hekima ya watu wote wa mashariki, na kubwa kuliko hekima yote ya Misri. 31Alikuwa na hekima kuliko mtu mwingine yeyote, kuliko Ethani Mwezrahi, na Hemani, Kalkoli na Darda, wana wa Maholi. Sifa zake zikaenea katika mataifa yote yaliyozunguka. 32Alinena mithali elfu tatu, na nyimbo zake zilikuwa elfu moja na tano. 33Alinena habari za miti, tangu mwerezi wa Lebanoni mpaka hisopo inayoota ukutani; alinena pia habari za wanyama, ndege, viumbe vitambaavyo na samaki. 34Watu walikuja kutoka mataifa yote kusikia hekima ya Sulemani; walikuja kwa niaba ya wafalme wote wa dunia waliokuwa wamesikia jinsi alivyokuwa na hekima.