1 Wafalme 18

1Baada ya siku nyingi, katika mwaka wa tatu, BWANA alimwambia Eliya, “Nenda ukajitokeze mbele ya Ahabu, nami nitanyesha mvua juu ya nchi.” 2Basi Eliya akaenda kujitokeza mbele ya Ahabu. Wakati huo njaa ilikuwa kali huko Samaria. 3Ahabu akamwita Obadia, aliyekuwa msimamizi wa ikulu. (Obadia alikuwa mtu aliyemcha BWANA kwa moyo wote. 4Yezebeli alipokuwa akiwaua manabii wa BWANA, Obadia alikuwa amewachukua mia moja kati yao, akawaficha katika mapango, hamsini katika kila pango, akawa akiwapa chakula na maji.) 5Ahabu akamwambia Obadia, “Pita katika nchi yote, kwenye kila chemchemi na kila mkondo wa kijito. Huenda tukapata majani tukawaweka hai farasi na nyumbu, tusilazimike kuchinja wanyama wetu wowote.” 6Basi wakaigawanya nchi kati yao ili waipitie yote, Ahabu akienda njia moja peke yake na Obadia njia nyingine peke yake. 7Obadia alipokuwa njiani, mara Eliya akaja kukutana naye. Obadia akamtambua, akainama uso wake mpaka chini, akasema, “Je, ni wewe kweli, bwana wangu Eliya?” 8Akamjibu, “Ndimi. Nenda umwambie bwana wako, ‘Eliya yuko hapa.’” 9Obadia akasema, “Nimetenda dhambi gani hata unamtia mtumishi wako mikononi mwa Ahabu ili niuawe? 10Kama BWANA Mungu wako aishivyo, bwana wangu ametuma watu kukutafuta katika kila taifa na kila ufalme. Kila taifa liliposema, ‘Hayuko hapa,’ aliwaapisha watu wake kwamba hawakuweza kukuona. 11Na sasa unaniambia, ‘Nenda umwambie bwana wako, “Eliya yuko hapa.”’ 12Mara nitakapoondoka kwako, Roho wa BWANA atakupeleka mahali nisipopajua. Kisha nitakapokwenda kumwambia Ahabu, naye asikuone, ataniua. Lakini mimi, mtumishi wako, nimemcha BWANA tangu ujana wangu. 13Je, bwana wangu hakuambiwa niliyoyafanya Yezebeli alipokuwa akiwaua manabii wa BWANA? Niliwaficha manabii mia moja wa BWANA, hamsini katika kila pango kati ya mapango mawili, nikawa nikiwapa chakula na maji. 14Na sasa unaniambia, ‘Nenda umwambie bwana wako, “Eliya yuko hapa.”’ Ataniua!”

15Eliya akasema, “Kama BWANA wa majeshi aishivyo, ambaye ninamtumikia, leo nitajitokeza mbele ya Ahabu.” 16Basi Obadia akaenda kukutana na Ahabu, akamwambia, naye Ahabu akaondoka kwenda kukutana na Eliya. 17Ahabu alipomwona Eliya, alimwambia, “Je, ni wewe, wewe mtaabishaji wa Israeli?” 18Eliya akajibu, “Sikumletea Israeli taabu. Wewe ndiye uliyefanya hivyo, wewe na nyumba ya baba yako, kwa sababu mmeziacha amri za BWANA na kuyafuata Mabaali. 19Basi sasa tuma ujumbe, unikusanyie Israeli wote kwenye mlima Karmeli, pamoja na manabii 450 wa Baali na manabii 400 wa Ashera wanaokula mezani pa Yezebeli.” 20Basi Ahabu akatuma ujumbe kwa Waisraeli wote, akawakusanya manabii pamoja kwenye mlima Karmeli. 21Eliya akasimama mbele ya watu wote, akasema, “Mpaka lini mtaendelea kuchechemea kati ya njia mbili? Ikiwa BWANA ndiye Mungu, mfuateni yeye. Ikiwa ni Baali, mfuateni Baali.” Lakini watu hawakujibu neno. 22Kisha Eliya akawaambia watu, “Mimi peke yangu ndiye niliyebaki kati ya manabii wa BWANA, lakini Baali ana manabii 450. 23Tuletewe mafahali wawili. Manabii wa Baali wajichagulie fahali mmoja, wamkate vipande vipande, wamweke juu ya kuni bila kuwasha moto. Nami nitamwandaa yule fahali mwingine, nimweke juu ya kuni, nami pia sitawasha moto. 24Kisha ninyi liitieni jina la mungu wenu, nami nitaliitia jina la BWANA. Mungu atakayejibu kwa moto, yeye ndiye Mungu.” Watu wote wakajibu, “Umesema vema.” 25Kisha Eliya akawaambia manabii wa Baali, “Jichagulieni mmoja wa mafahali, mmwandae kwanza, kwa kuwa ninyi ni wengi. Liitieni jina la mungu wenu, lakini msiwashe moto.” 26Basi wakamchukua fahali waliyepewa, wakamwandaa. Kisha wakaliitia jina la Baali tangu asubuhi mpaka adhuhuri, wakilia, “Baali, utujibu!” Lakini hapakuwa na sauti yoyote, wala hakuna aliyejibu. Wakaendelea kucheza kwa kuchechemea kuizunguka madhabahu waliyoijenga. 27Adhuhuri Eliya akaanza kuwadhihaki. Akasema, “Iteni kwa sauti kubwa zaidi! Yeye ni mungu, sivyo? Labda amezama katika mawazo, au amekwenda kando kidogo, au ameenda safari. Au labda amelala usingizi, na lazima aamshwe!” 28Basi wakapiga kelele zaidi, na kama ilivyokuwa desturi yao, wakajikatakata kwa panga na mikuki mpaka damu ikawatiririka. 29Adhuhuri ikapita, nao wakaendelea kupagawa kwa kutabiri mpaka wakati wa sadaka ya jioni. Lakini hapakuwa na sauti, wala jibu, wala mtu aliyejali. 30Kisha Eliya akawaambia watu wote, “Njooni hapa kwangu.” Walipokwisha kumkaribia wote, akaitengeneza madhabahu ya BWANA iliyokuwa imebomolewa. 31Eliya akachukua mawe kumi na mawili, moja kwa kila kabila lililotoka kwa wana wa Yakobo, yule ambaye neno la BWANA lilimjia: “Jina lako litakuwa Israeli.” 32Akayatumia mawe hayo kujenga madhabahu katika jina la BWANA, na kuizunguka madhabahu akachimba mfereji mkubwa wa kutosha kuchukua karibu lita 14 za mbegu. 33Akazipanga kuni, akamkata fahali vipande vipande, akamweka juu ya kuni. Kisha akasema, “Jazeni mitungi minne maji, myamwage juu ya sadaka ya kuteketezwa na juu ya kuni.” Akasema, “Tena,” nao wakafanya tena. Akasema, “Mara nyingine,” nao wakafanya mara ya tatu. 35Maji yakatiririka pande zote za madhabahu, naye akaujaza mfereji maji pia. 36Wakati wa sadaka ya jioni, Eliya nabii akasogea mbele akasema, “BWANA, Mungu wa Abrahamu, Isaka na Israeli, leo ijulikane kwamba wewe ndiwe Mungu katika Israeli, kwamba mimi ni mtumishi wako, na kwamba nimefanya haya yote kwa neno lako. 37Unijibu, BWANA, unijibu, ili watu hawa wajue kwamba wewe, BWANA, ndiwe Mungu, na kwamba unaigeuza mioyo yao irudi tena.” 38Ndipo moto kutoka kwa BWANA ukashuka. Ukaiteketeza sadaka ya kuteketezwa, kuni, mawe na udongo, ukayaramba maji yaliyokuwa mferejini. 39Watu wote walipoona hayo, wakaanguka kifudifudi, wakasema, “BWANA, yeye ndiye Mungu! BWANA, yeye ndiye Mungu!” 40Eliya akawaambia, “Wakamateni manabii wa Baali. Msimwache hata mmoja wao atoroke!” Wakawakamata, naye Eliya akawapeleka chini mpaka mto Kishoni, akawaua huko. 41Kisha Eliya akamwambia Ahabu, “Panda, ule na unywe. Kuna sauti ya mvua kubwa inayovuma.” 42Basi Ahabu akapanda kula na kunywa, naye Eliya akapanda mpaka kilele cha Karmeli. Akainama mpaka chini, akauweka uso wake kati ya magoti yake. 43Akamwambia mtumishi wake, “Panda utazame upande wa bahari.” Mtumishi akapanda akatazama, akasema, “Hakuna kitu huko.” Mara saba Eliya akamwambia, “Rudi.” 44Mara ya saba mtumishi akasema, “Tazama, wingu dogo kama mkono wa mtu linapanda kutoka baharini.” Eliya akasema, “Panda umwambie Ahabu, ‘Funga farasi garini ushuke kabla mvua haijakuzuia.’” 45Muda mfupi tu baadaye, anga likawa jeusi kwa mawingu na upepo, ikanyesha mvua kubwa. Ahabu akapanda gari lake akaenda Yezreeli. 46Mkono wa BWANA ukamjia Eliya. Akaikaza kanzu yake kiunoni, akakimbia mbele ya Ahabu njia yote mpaka Yezreeli.