1 Wafalme 2

1Wakati wa Daudi wa kufa ulipokaribia, alimpa mwanawe Sulemani maagizo haya: 2“Mimi ninaenda njia ya dunia yote. Basi uwe hodari, ujionyeshe kuwa mwanamume. 3Shika yale ambayo BWANA Mungu wako amekukabidhi: enenda katika njia zake, ushike kanuni zake, amri zake, maamuzi yake na masharti yake, kama yalivyoandikwa katika sheria ya Musa. Ndipo utatenda kwa hekima na kufanikiwa katika yote unayofanya na popote unapogeukia, 4ili BWANA atimize ahadi aliyoitoa juu yangu: ‘Wazao wako wakiwa waangalifu jinsi wanavyoishi, wakienenda mbele yangu kwa uaminifu kwa moyo wao wote na kwa roho yao yote, daima kutakuwa na mtu wa ukoo wako juu ya kiti cha enzi cha Israeli.’ 5Wewe pia unajua jinsi Yoabu mwana wa Seruya alivyonitendea, na yale aliyowatendea wakuu wawili wa majeshi ya Israeli, Abneri mwana wa Neri na Amasa mwana wa Yetheri. Aliwaua, akimwaga damu wakati wa amani kana kwamba ni wakati wa vita, akautia damu hiyo ya vita mshipi wa kiunoni mwake na viatu vya miguuni mwake. 6Tenda kama hekima yako inavyokuongoza, lakini usiache mvi zake zishuke Kuzimu kwa amani.

7Lakini uwaonyeshe fadhili wana wa Barzilai Mgileadi; uwape nafasi miongoni mwa wale wanaokula mezani pako, kwa maana walikuja upande wangu vivyo hivyo nilipokuwa nikimkimbia ndugu yako Absalomu. 8Tena yuko pamoja nawe Shimei mwana wa Gera, Mbenyamini wa Bahurimu. Alinitupia laana chungu siku nilipokwenda Mahanaimu. Lakini alishuka mpaka Yordani kunilaki, nami nikamwapia kwa BWANA: ‘Sitakuua kwa upanga.’ 9Lakini sasa usimchukulie kuwa hana hatia. Wewe ni mtu mwenye hekima; utajua la kumtendea. Zishushe mvi zake Kuzimu kwa damu.” 10Kisha Daudi akapumzika pamoja na babu zake, akazikwa katika mji wa Daudi.

11Utawala wa Daudi juu ya Israeli ulidumu miaka arobaini: miaka saba alitawala huko Hebroni, na thelathini na mitatu huko Yerusalemu. 12Basi Sulemani akaketi juu ya kiti cha enzi cha baba yake Daudi, na utawala wake ukaimarishwa sana. 13Kisha Adoniya mwana wa Hagithi akaja kwa Bathsheba, mama yake Sulemani. Akamwuliza, “Je, umekuja kwa amani?” Akajibu, “Ndiyo, kwa amani.” 14Kisha akasema, “Nina jambo la kukuambia.” Akajibu, “Sema.” 15Akasema, “Unajua kwamba ufalme ulikuwa wangu. Israeli wote walinitazamia niwe mfalme. Lakini ufalme ukahamia kwa ndugu yangu, kwa sababu ulimjia kutoka kwa BWANA. 16Sasa nina ombi moja kwako. Usinikatalie.” Akajibu, “Sema.” 17Akasema, “Tafadhali mwombe mfalme Sulemani, kwa maana hatakukatalia, anipe Abishagi Mshunami awe mke wangu.” 18Bathsheba akasema, “Vema. Nitazungumza na mfalme kwa niaba yako.” 19Basi Bathsheba akaenda kwa mfalme Sulemani kuzungumza naye kwa niaba ya Adoniya. Mfalme akasimama kumlaki, akainama mbele yake. Kisha akaketi juu ya kiti chake cha enzi, akaagiza kiti cha enzi kiwekwe kwa ajili ya mama wa mfalme, naye akaketi mkono wake wa kuume. 20Akasema, “Nina ombi moja dogo kwako. Usinikatalie.” Mfalme akamjibu, “Omba, mama yangu, kwa maana sitakukatalia.” 21Akasema, “Abishagi Mshunami na aozwe kwa ndugu yako Adoniya.” 22Mfalme Sulemani akamjibu mama yake, “Kwa nini unamwombea Adoniya Abishagi Mshunami? Afadhali umwombee na ufalme pia, kwa kuwa yeye ni ndugu yangu mkubwa. Mwombee yeye, na Abiathari kuhani, na Yoabu mwana wa Seruya pia!”

23Ndipo mfalme Sulemani akaapa kwa BWANA, “Mungu anitendee hivyo, na kuzidi, ikiwa ombi hili halitamgharimu Adoniya uhai wake! 24Sasa, kama BWANA aishivyo, aliyeniimarisha na kunikalisha juu ya kiti cha enzi cha baba yangu Daudi, na kunijengea nyumba kama alivyoahidi, Adoniya atauawa leo!” 25Basi mfalme Sulemani akamtuma Benaya mwana wa Yehoyada, naye akampiga Adoniya, akafa.

26Mfalme akamwambia Abiathari kuhani, “Nenda kwenye mashamba yako huko Anathothi. Unastahili kufa, lakini sitakuua sasa, kwa sababu ulilibeba sanduku la Bwana MUNGU mbele ya baba yangu Daudi, na ukashiriki katika taabu zote alizozipata baba yangu.” 27Basi Sulemani akamwondoa Abiathari asihudumu tena kama kuhani wa BWANA. Hivyo likatimia neno ambalo BWANA alikuwa amelinena juu ya nyumba ya Eli huko Shilo.

28Habari hizo zilipomfikia Yoabu, kwa kuwa alikuwa amemuunga mkono Adoniya, ingawa hakuwa amemuunga mkono Absalomu, Yoabu akakimbilia hema la BWANA, akazishika pembe za madhabahu. 29Mfalme Sulemani akaambiwa kwamba Yoabu amekimbilia hema la BWANA na yuko kando ya madhabahu. Ndipo Sulemani akamtuma Benaya mwana wa Yehoyada na agizo hili: “Nenda umpige.” 30Benaya akaenda kwenye hema la BWANA, akamwambia, “Mfalme anasema hivi: ‘Toka nje!’” Lakini akasema, “Hapana, nitafia hapa.” Benaya akarudi kumletea mfalme habari: “Hivi ndivyo Yoabu alivyosema, na hivi ndivyo alivyonijibu.” 31Mfalme akamwambia, “Fanya kama alivyosema. Mpige, umzike, nawe utaondoa kwangu na kwa nyumba ya baba yangu hatia ya damu ambayo Yoabu aliimwaga bila sababu. 32BWANA atairudisha damu yake juu ya kichwa chake mwenyewe, kwa sababu bila baba yangu Daudi kujua, aliwashambulia watu wawili wenye haki zaidi na bora kuliko yeye, akawaua kwa upanga: Abneri mwana wa Neri, mkuu wa jeshi la Israeli, na Amasa mwana wa Yetheri, mkuu wa jeshi la Yuda. 33Basi damu yao itarudi juu ya kichwa cha Yoabu na juu ya vichwa vya wazao wake milele. Lakini kwa Daudi na wazao wake, nyumba yake na kiti chake cha enzi, kutakuwa na amani kutoka kwa BWANA milele.” 34Basi Benaya mwana wa Yehoyada akapanda, akampiga na kumwua, naye akazikwa nyumbani kwake mwenyewe nyikani. 35Mfalme akamweka Benaya mwana wa Yehoyada kuwa juu ya jeshi mahali pa Yoabu, naye akamweka Sadoki kuhani mahali pa Abiathari. 36Kisha mfalme akamwita Shimei, akamwambia, “Ujijengee nyumba huko Yerusalemu, ufanye makao yako humo. Usiondoke humo kwenda mahali popote. 37Siku utakapotoka na kuvuka Bonde la Kidroni, ujue hakika kwamba utakufa. Damu yako itakuwa juu ya kichwa chako mwenyewe.” 38Shimei akamjibu mfalme, “Ulilosema ni haki. Mtumishi wako atafanya kama bwana wangu mfalme alivyosema.” Basi Shimei akakaa Yerusalemu kwa muda mrefu.

39Lakini baada ya miaka mitatu, watumwa wawili wa Shimei walitoroka kwenda kwa Akishi mwana wa Maaka, mfalme wa Gathi. Shimei akaambiwa, “Watumwa wako wako Gathi.” 40Basi Shimei akaondoka, akatandika punda wake, akaenda kwa Akishi huko Gathi kuwatafuta watumwa wake. Shimei akaenda, akawarudisha watumwa wake kutoka Gathi. 41Sulemani akapata habari kwamba Shimei alikuwa ameondoka Yerusalemu kwenda Gathi na kurudi. 42Kisha mfalme akamwita Shimei, akamwambia, “Je, sikukuapisha kwa BWANA, na kukuonya, ‘Siku utakapoondoka na kwenda mahali popote, ujue hakika kwamba utakufa’? Nawe ukaniambia, ‘Ulilosema ni haki; nitatii.’ 43Basi kwa nini hukukishika kiapo chako kwa BWANA na agizo nililokupa?” 44Mfalme akamwambia Shimei pia, “Unajua moyoni mwako mabaya yote uliyomtendea baba yangu Daudi. Sasa BWANA atayarudisha mabaya yako juu ya kichwa chako mwenyewe. 45Lakini mfalme Sulemani atabarikiwa, na kiti cha enzi cha Daudi kitasimama imara mbele za BWANA milele.” 46Kisha mfalme akampa Benaya mwana wa Yehoyada amri, naye akatoka akampiga Shimei, akafa. Hivyo ufalme ukaimarishwa mkononi mwa Sulemani.