1 Wafalme 17

1Eliya Mtishbi, mmoja wa walowezi wa Gileadi, alimwambia Ahabu, “Kama BWANA, Mungu wa Israeli, aishivyo, ambaye ninamtumikia, hakutakuwa na umande wala mvua katika miaka inayokuja, mpaka nitakaposema.”

2Kisha neno la BWANA likamjia Eliya: 3“Ondoka mahali hapa uelekee mashariki. Ujifiche karibu na kijito cha Kerithi, mashariki ya Yordani. 4Utakunywa maji ya kijito, nami nimewaamuru kunguru wakuletee chakula huko.” 5Basi Eliya akafanya kama BWANA alivyomwambia. Akaenda akakaa karibu na kijito cha Kerithi, mashariki ya Yordani. 6Kunguru walimletea mkate na nyama kila asubuhi na kila jioni, naye akanywa maji ya kijito. 7Baada ya muda kijito kikakauka, kwa sababu hapakuwa na mvua katika nchi.

8Kisha neno la BWANA likamjia Eliya: 9“Inuka uende Sarepta, mji wa Sidoni, ukae huko. Nimemwamuru mjane mmoja huko akupe chakula.” 10Basi akainuka akaenda Sarepta. Alipofika kwenye lango la mji, mjane mmoja alikuwa huko akiokota kuni. Akamwita, “Tafadhali niletee maji kidogo katika kikombe ninywe.” 11Alipokuwa akienda kuyaleta, akamwita, “Tafadhali uniletee pia kipande cha mkate.” 12Akajibu, “Kama BWANA Mungu wako aishivyo, sina chochote kilichookwa, ila konzi ya unga katika mtungi na mafuta kidogo katika chupa. Ninaokota vijiti viwili hivi ili niende nyumbani niupike kwa ajili yangu na mwanangu. Tutaula, kisha tutakufa.” 13Eliya akamwambia, “Usiogope. Nenda ufanye kama ulivyosema. Lakini kwanza unioke mkate mdogo kutokana na ulicho nacho, uniletee hapa nje. Baada ya hapo, ujipikie wewe na mwanao.

14Kwa maana hivi ndivyo BWANA, Mungu wa Israeli, asemavyo: ‘Mtungi wa unga hautaisha, wala chupa ya mafuta haitakauka, mpaka siku BWANA atakaponyesha mvua juu ya nchi.’” 15Akaenda akafanya kama Eliya alivyosema, naye pamoja na Eliya na jamaa yake wakapata chakula kwa siku nyingi. 16Mtungi wa unga haukuisha, wala chupa ya mafuta haikukauka, kama BWANA alivyosema kupitia Eliya.

17Baada ya muda, mwana wa yule mwanamke mwenye nyumba aliugua. Ugonjwa wake ukawa mzito mno, hata mwishowe hakubaki na pumzi ndani yake. 18Akamwambia Eliya, “Una nini juu yangu, mtu wa Mungu? Umekuja kwangu ili uifichue dhambi yangu na kumuua mwanangu!” 19Akamwambia, “Nipe mwanao.” Akamchukua mvulana kutoka mikononi mwake, akampandisha katika chumba cha ghorofani alimokuwa akikaa, akamlaza juu ya kitanda chake mwenyewe. 20Kisha akamlilia BWANA, “BWANA Mungu wangu, je, wewe umemletea maafa hata mjane huyu aliyenipa mahali pa kukaa, kwa kumfanya mwanawe afe?” 21Kisha akajinyoosha juu ya mvulana mara tatu, akamlilia BWANA, “BWANA Mungu wangu, tafadhali uhai wa mvulana huyu urudi ndani yake!” 22BWANA akakisikia kilio cha Eliya, na uhai wa mvulana ukarudi ndani yake, akawa hai. 23Eliya akamchukua mvulana, akamshusha kutoka chumba cha ghorofani mpaka ndani ya nyumba, akampa mama yake. Eliya akasema, “Tazama, mwanao yu hai!” 24Ndipo yule mwanamke akamwambia Eliya, “Sasa najua kwamba wewe ni mtu wa Mungu, na kwamba neno la BWANA unalolisema ni kweli.”