1 Wafalme 3

1Sulemani alifanya mapatano ya ndoa na Farao mfalme wa Misri. Akamwoa binti Farao, akamleta akae katika mji wa Daudi mpaka alipomaliza kujenga ikulu yake, nyumba ya BWANA, na ukuta wa kuuzunguka Yerusalemu. 2Hata hivyo watu walikuwa bado wakitoa dhabihu mahali pa juu, kwa sababu siku zile hapakuwa bado na nyumba iliyojengwa kwa ajili ya jina la BWANA.

3Sulemani alimpenda BWANA, akaishi kwa kufuata kanuni za baba yake Daudi; ila yeye pia alitoa dhabihu na kufukiza sadaka mahali pa juu. 4Mfalme alikwenda Gibeoni kutoa dhabihu huko, kwa sababu hapo palikuwa mahali pa juu palipokuwa muhimu kuliko pote. Juu ya madhabahu ile Sulemani alitoa sadaka elfu moja za kuteketezwa. 5Huko Gibeoni BWANA alimtokea Sulemani katika ndoto usiku. Mungu akasema, “Omba lolote unalotaka nikupe.” 6Sulemani akajibu, “Ulimwonyesha mtumishi wako, baba yangu Daudi, fadhili kuu, kwa sababu aliishi mbele yako kwa uaminifu na haki na kwa moyo mnyofu. Nawe umeendelea kumwonyesha fadhili hizi kuu kwa kumpa mwana wa kuketi juu ya kiti chake cha enzi, kama ilivyo leo. 7Sasa, BWANA Mungu wangu, umemfanya mtumishi wako kuwa mfalme mahali pa baba yangu Daudi. Lakini mimi ni mtoto mdogo tu; sijui jinsi ya kutoka na kuingia kama kiongozi. 8Naye mtumishi wako yuko hapa miongoni mwa watu wako uliowachagua, taifa kubwa mno lisiloweza kuhesabika wala kutolewa idadi. 9Basi mpe mtumishi wako moyo unaosikiliza, ili awahukumu watu wako na kutofautisha mema na mabaya. Kwa maana ni nani awezaye kuwahukumu watu wako walio wengi namna hii?” 10Ilimpendeza Bwana kwamba Sulemani aliomba jambo hili. 11Basi Mungu akamwambia, “Kwa sababu umeomba jambo hili, wala hukujiombea maisha marefu, wala mali, wala kifo cha adui zako, bali umeomba ufahamu ili upate kusikiliza mashauri na kuyaamua kwa haki, 12basi nitafanya ulichoomba. Ninakupa moyo wenye hekima na ufahamu. Kabla yako hapajakuwa na mtu kama wewe, wala baada yako hatainuka mtu kama wewe. 13Ninakupa pia yale usiyoyaomba: mali na heshima. Maisha yako yote hapatakuwa na mfalme mwingine anayelingana nawe. 14Nawe ukienenda katika njia zangu na kuzishika kanuni zangu na amri zangu, kama baba yako Daudi alivyofanya, nitakupa maisha marefu.”

15Kisha Sulemani akaamka, akatambua kwamba ilikuwa ndoto. Akaenda Yerusalemu, akasimama mbele ya sanduku la agano la Bwana. Akatoa sadaka za kuteketezwa na sadaka za amani, akawafanyia maafisa wake wote karamu.

16Baadaye makahaba wawili walikuja kwa mfalme, wakasimama mbele yake. 17Mwanamke wa kwanza akasema, “Tafadhali, bwana wangu, mimi na mwanamke huyu tunaishi nyumba moja. Nilijifungua mtoto akiwa pamoja nami humo. 18Siku tatu baada ya mtoto wangu kuzaliwa, mwanamke huyu naye akajifungua. Tulikuwa peke yetu; hapakuwa na mtu mwingine nyumbani pamoja nasi, ila sisi wawili tu. 19Mwana wa mwanamke huyu alikufa usiku, kwa sababu alimlalia. 20Basi usiku wa manane aliamka, akamchukua mwanangu kutoka ubavuni mwangu mtumishi wako alipokuwa amelala. Akamweka mikononi mwake, na mwanawe aliyekufa akamweka mikononi mwangu. 21Nilipoamka asubuhi kumnyonyesha mwanangu, kumbe alikuwa amekufa! Lakini nilipomtazama kwa makini kwenye mwanga wa asubuhi, nikaona kwamba hakuwa mwana niliyemzaa.” 22Lakini yule mwanamke mwingine akasema, “Hapana! Aliye hai ni mwanangu, na aliyekufa ni wako.” Mwanamke wa kwanza akaendelea kusema, “Hapana! Aliyekufa ni mwanao, na aliye hai ni wangu.” Hivyo wakabishana mbele ya mfalme. 23Mfalme akasema, “Huyu anasema, ‘Mwanangu ndiye aliye hai, na mwanao amekufa,’ na yule anasema, ‘Hapana! Mwanao amekufa, na wangu yu hai.’”

24Kisha mfalme akasema, “Nileteeni upanga.” Basi wakamletea mfalme upanga. 25Ndipo mfalme akasema, “Mkateni mtoto aliye hai vipande viwili, mpeni mwanamke mmoja nusu na mwingine nusu.” 26Ndipo mama wa mtoto aliye hai akamwambia mfalme, kwa kuwa upendo kwa mwanawe uliwaka ndani yake, “Tafadhali, bwana wangu, mpe yeye mtoto aliye hai! Usimwue kamwe!” Lakini yule mwanamke mwingine akaendelea kusema, “Hatakuwa wangu wala wako. Mkateni vipande viwili!” 27Kisha mfalme akajibu, “Mpeni mtoto aliye hai yule mwanamke aliyemtetea. Msimwue. Yeye ndiye mama yake.” 28Israeli wote walisikia habari ya hukumu aliyotoa mfalme, wakamcha, kwa sababu waliona kwamba hekima ya Mungu ilikuwa ndani yake ili atende haki.