1 Wafalme 9

1Baada ya Sulemani kumaliza nyumba ya BWANA na ikulu ya mfalme, na kila kitu kingine alichokuwa ameweka moyo wake kukifanya,

2BWANA alimtokea Sulemani mara ya pili, kama alivyomtokea huko Gibeoni. 3BWANA akamwambia, “Nimesikia sala yako na dua ya rehema uliyoniomba. Nimeiweka wakfu nyumba hii uliyoijenga, nami nimeliweka jina langu huko milele. Macho yangu na moyo wangu vitakuwa huko daima. 4Na wewe, ukiishi mbele yangu kama baba yako Daudi alivyoishi, kwa moyo mkamilifu na kwa unyofu, ukitenda yote niliyokuamuru na kushika kanuni zangu na maamuzi yangu, 5ndipo nitakiimarisha kiti cha enzi cha ufalme wako juu ya Israeli milele, kama nilivyomwahidi baba yako Daudi niliposema, ‘Daima kutakuwa na mtu wa ukoo wako juu ya kiti cha enzi cha Israeli.’ 6Lakini ninyi au wazao wenu mkigeuka na kuacha kunifuata, wala msizishike amri zangu na kanuni zangu nilizoweka mbele yenu, badala yake mkaenda kuitumikia miungu mingine na kuisujudia, 7ndipo nitawakatilia mbali Israeli kutoka katika nchi niliyowapa, na nyumba hii niliyoiweka wakfu kwa ajili ya jina langu nitaitupa mbali na macho yangu. Israeli watakuwa mithali na kitu cha dhihaka kati ya mataifa yote. 8Na nyumba hii, ijapokuwa sasa imeinuka juu, kila apitaye karibu nayo atashangaa. Watazomea na kuuliza, ‘Kwa nini BWANA ameitendea hivi nchi hii na nyumba hii?’ 9Na watu watajibu, ‘Ni kwa sababu walimwacha BWANA Mungu wao, aliyewatoa babu zao katika nchi ya Misri, wakaikumbatia miungu mingine, wakaiabudu na kuitumikia. Ndiyo sababu BWANA ameleta juu yao maafa haya yote.’”

10Mwisho wa miaka ishirini ambayo Sulemani alitumia kujenga nyumba zile mbili, nyumba ya BWANA na ikulu ya mfalme, 11kwa kuwa Hiramu mfalme wa Tiro alikuwa amempatia Sulemani mbao zote za mierezi na misunobari na dhahabu aliyotaka, mfalme Sulemani alimpa Hiramu miji ishirini katika eneo la Galilaya. 12Lakini Hiramu alipotoka Tiro kuja kuiona miji ambayo Sulemani alimpa, haikumpendeza. 13Akasema, “Ni miji ya namna gani hii uliyonipa, ndugu yangu?” Hivyo imeitwa nchi ya Kabuli mpaka leo.

14Hiramu alikuwa amempelekea mfalme karibu kilo 4,080 za dhahabu. 15Hii ndiyo habari ya watu wa kazi ya kulazimishwa ambao mfalme Sulemani aliwaandikisha ili kujenga nyumba ya BWANA, ikulu yake mwenyewe, Milo, ukuta wa Yerusalemu, na miji ya Hazori, Megido na Gezeri. 16Farao mfalme wa Misri alikuwa amepanda akaiteka Gezeri. Aliuteketeza kwa moto, akawaua Wakanaani walioishi mjini, akampa binti yake, mke wa Sulemani, mji huo kuwa mahari. 17Basi Sulemani akaijenga upya Gezeri, na Beth-horoni ya Chini, 18Baalathi, na Tamari nyikani, ndani ya nchi, 19na miji yote ya ghala aliyokuwa nayo Sulemani, miji ya magari yake ya vita na ya wapanda farasi wake, na chochote Sulemani alichotamani kujenga huko Yerusalemu, Lebanoni na katika nchi yote aliyoitawala. 20Kuhusu watu wote waliosalia wa Waamori, Wahiti, Waperizi, Wahivi na Wayebusi, ambao hawakuwa Waisraeli, 21wazao wao waliosalia katika nchi, ambao Waisraeli hawakuweza kuwaangamiza kabisa, Sulemani aliwaandikisha kwa kazi ya kulazimishwa kama watumwa, mpaka leo. 22Lakini Sulemani hakumfanya mtumwa yeyote wa Waisraeli. Wao walikuwa askari wake, maafisa wake, majemadari wake, wakuu wake, na wakuu wa magari yake ya vita na wapanda farasi wake.

23Hawa ndio waliokuwa maafisa wakuu wa kazi ya Sulemani: mia tano na hamsini, waliowaongoza watu walioifanya kazi. 24Binti Farao alipokwisha kuhama kutoka mji wa Daudi kwenda nyumba ambayo Sulemani alimjengea, ndipo Sulemani alipoijenga Milo. 25Mara tatu kwa mwaka Sulemani alitoa sadaka za kuteketezwa na sadaka za amani juu ya madhabahu aliyomjengea BWANA mwenyewe, na pamoja nazo alifukiza uvumba mbele za BWANA. Hivyo akaimaliza nyumba. 26Mfalme Sulemani alijenga pia merikebu huko Esion-geberi, karibu na Elothi katika nchi ya Edomu, pwani ya Bahari ya Shamu. 27Hiramu alituma watumishi wake pamoja na merikebu, mabaharia walioijua bahari, wafanye kazi pamoja na watumishi wa Sulemani. 28Walikwenda Ofiri, wakaleta kutoka huko karibu kilo 14,280 za dhahabu, wakamkabidhi mfalme Sulemani.