1 Wafalme 6

1Katika mwaka wa mia nne na themanini baada ya Waisraeli kutoka nchi ya Misri, katika mwaka wa nne wa utawala wa Sulemani juu ya Israeli, katika mwezi wa Zivu, ambao ni mwezi wa pili, alianza kujenga nyumba ya BWANA. 2Hekalu ambalo mfalme Sulemani alimjengea BWANA lilikuwa na urefu wa karibu mita 27, upana wa karibu mita 9 na kimo cha karibu mita 13.5. 3Baraza lililokuwa mbele ya ukumbi mkuu wa hekalu lilikuwa na urefu wa karibu mita 9, sawa na upana wa hekalu, nalo lilitokeza karibu mita 4.5 mbele ya hekalu. 4Akalifanyia hekalu madirisha yenye fremu zilizoingia ndani. 5Kuegemea ukuta wa hekalu alijenga jengo la pembeni lililolizunguka pande zote, kando ya kuta za ukumbi mkuu na za Patakatifu pa Patakatifu, akafanya vyumba vya pembeni pande zote. 6Ghorofa ya chini ilikuwa na upana wa karibu mita 2.25, ya katikati karibu mita 2.7, na ya tatu karibu mita 3.15. Alikuwa amefanya vipandio kuzunguka nje ya ukuta wa hekalu, ili boriti zisitiwe ndani ya kuta za hekalu. 7Hekalu lilijengwa kwa mawe yaliyochongwa huko machimboni, hivyo sauti ya nyundo, shoka au chombo chochote cha chuma haikusikika kamwe hekaluni wakati wa ujenzi. 8Mlango wa ghorofa ya katikati ya vyumba vya pembeni ulikuwa upande wa kusini wa hekalu, na ngazi zilipanda mpaka ghorofa ya katikati, na kutoka ya katikati mpaka ya tatu. 9Basi akalijenga hekalu na kulimaliza, akaliezeka kwa boriti na mbao za mierezi. 10Akajenga jengo la pembeni kuegemea hekalu lote, kila ghorofa ikiwa na kimo cha karibu mita 2.25, akaliunganisha na hekalu kwa boriti za mierezi.

11Kisha neno la BWANA likamjia Sulemani: 12“Kuhusu nyumba hii unayoijenga: ukienenda kwa kufuata kanuni zangu, ukatekeleza maamuzi yangu na kuzishika amri zangu zote kwa kuzifuata, nitatimiza kupitia kwako neno nililompa Daudi baba yako, 13nami nitaishi kati ya Waisraeli, wala sitawaacha watu wangu Israeli.”

14Basi Sulemani akalijenga hekalu, akalimaliza. 15Alizipiga kuta za ndani za hekalu mbao za mierezi, akazifunika kwa mbao tangu sakafu ya hekalu mpaka boriti za dari, naye akaifunika sakafu ya hekalu kwa mbao za misunobari. 16Alitenga karibu mita 9 upande wa nyuma wa hekalu kwa mbao za mierezi tangu sakafuni mpaka kwenye boriti, akakijenga ndani kuwa Patakatifu pa Patakatifu. 17Sehemu iliyobaki ya hekalu, yaani ukumbi mkuu ulio mbele ya Patakatifu pa Patakatifu, ilikuwa na urefu wa karibu mita 18. 18Ndani ya hekalu, mbao za mierezi zilichongwa mapambo ya vibuyu na maua yaliyochanua. Yote ilikuwa mierezi; hakuna jiwe lililoonekana. 19Akaandaa Patakatifu pa Patakatifu ndani ya hekalu ili kuliweka huko sanduku la agano la BWANA. 20Patakatifu pa Patakatifu palikuwa na urefu wa karibu mita 9, upana wa karibu mita 9 na kimo cha karibu mita 9, naye akapafunika kwa dhahabu safi. Akaifunika pia madhabahu ya mierezi. 21Ndani ya hekalu Sulemani alifunika kila kitu kwa dhahabu safi. Akavuta minyororo ya dhahabu mbele ya Patakatifu pa Patakatifu, napo akapafunika kwa dhahabu. 22Basi akalifunika hekalu lote kwa dhahabu mpaka likakamilika. Akaifunika pia kwa dhahabu madhabahu yote iliyokuwa ya Patakatifu pa Patakatifu. 23Akafanya makerubi mawili ya mti wa mzeituni kwa ajili ya Patakatifu pa Patakatifu, kila moja likiwa na kimo cha karibu mita 4.5. 24Bawa moja la kerubi lilikuwa na urefu wa karibu mita 2.25 na bawa lingine karibu mita 2.25, hivyo mabawa yake yalienea karibu mita 4.5 kutoka ncha moja mpaka nyingine. 25Kerubi la pili nalo lilikuwa na karibu mita 4.5. Makerubi hayo mawili yalikuwa na ukubwa mmoja na umbo moja. 26Kimo cha kerubi moja kilikuwa karibu mita 4.5, na vivyo hivyo cha lile lingine. 27Aliyaweka makerubi katikati ya Patakatifu pa Patakatifu pa hekalu. Mabawa yao yalikuwa yamenyooshwa, hata bawa la moja likagusa ukuta mmoja na bawa la lile lingine likagusa ukuta mwingine, nayo mabawa yao yakagusana katikati ya chumba. 28Akayafunika makerubi pia kwa dhahabu. 29Juu ya kuta zote za hekalu pande zote, katika vyumba vya ndani na vya nje, alichonga sanamu za makerubi, mitende na maua yaliyochanua. 30Akaifunika pia sakafu ya hekalu kwa dhahabu, katika vyumba vya ndani na vya nje. 31Kwa ajili ya mlango wa Patakatifu pa Patakatifu alifanya milango ya mti wa mzeituni, na kizingiti cha juu na miimo yake vilifanya fremu yenye pande tano. 32Juu ya milango hiyo miwili ya mti wa mzeituni alichonga makerubi, mitende na maua yaliyochanua, akaifunika kwa dhahabu, akiifua dhahabu juu ya makerubi na mitende. 33Vivyo hivyo alifanya miimo ya mti wa mzeituni kwa ajili ya mlango wa ukumbi mkuu, katika fremu yenye pande nne. 34Milango yake miwili ilikuwa ya mti wa msunobari. Kila mlango ulikuwa na mbawa mbili zilizokunjika. 35Akachonga juu yake makerubi, mitende na maua yaliyochanua, akaifunika kwa dhahabu iliyokaa sawasawa juu ya michoro. 36Aliujenga ua wa ndani kwa safu tatu za mawe yaliyochongwa na safu moja ya boriti za mierezi. 37Katika mwaka wa nne, katika mwezi wa Zivu, msingi wa nyumba ya BWANA uliwekwa. 38Katika mwaka wa kumi na moja, katika mwezi wa Buli, ambao ni mwezi wa nane, hekalu lilimalizika katika sehemu zake zote kama lilivyopangwa. Alikuwa amelijenga kwa miaka saba.