1 Wafalme 20

1Ben-hadadi mfalme wa Aramu alilikusanya jeshi lake lote. Wafalme thelathini na wawili walikuwa pamoja naye, pamoja na farasi na magari ya vita. Akapanda, akauzingira Samaria, akaushambulia. 2Akatuma wajumbe ndani ya mji kwa Ahabu mfalme wa Israeli, akamwambia, “Hivi ndivyo Ben-hadadi asemavyo: ‘Fedha yako na dhahabu yako ni mali yangu, na wake zako na wana wako walio bora ni wangu pia.’” 4Mfalme wa Israeli akajibu, “Ni kama ulivyosema, bwana wangu mfalme. Mimi ni wako, pamoja na vyote nilivyo navyo.” 5Wajumbe wakarudi, wakasema, “Hivi ndivyo Ben-hadadi asemavyo: ‘Nilikutumia ujumbe kwamba lazima unipe fedha yako na dhahabu yako, wake zako na wana wako, 6lakini kesho wakati kama huu nitawatuma maafisa wangu kwako, nao wataipekua ikulu yako na nyumba za maafisa wako. Wataweka mikono yao juu ya kila kitu unachokithamini na kukichukua.’” 7Kisha mfalme wa Israeli akawaita wazee wote wa nchi, akawaambia, “Tazameni mwone jinsi mtu huyu anavyotaka kutudhuru! Alituma kwangu kudai wake zangu na wana wangu, fedha yangu na dhahabu yangu, nami sikumkatalia.” 8Wazee wote na watu wote wakamwambia, “Usimsikilize, wala usikubali.” 9Basi akawaambia wajumbe wa Ben-hadadi, “Mwambieni bwana wangu mfalme, ‘Nitafanya yote uliyomdai mtumishi wako mara ya kwanza, lakini hili siwezi kulifanya.’” Wajumbe wakaondoka, wakampelekea Ben-hadadi jibu hilo. 10Kisha Ben-hadadi akamtumia ujumbe huu: “Miungu na wanitendee hivyo, na kuzidi, ikiwa mavumbi ya Samaria yatatosha kumpa konzi moja kila askari anayenifuata!” 11Mfalme wa Israeli akajibu, “Mwambieni: ‘Mtu anayejifunga silaha zake asijisifu kama yule anayezifungua.’” 12Ben-hadadi alisikia jibu hilo alipokuwa akinywa pamoja na wafalme katika vibanda vyao. Akawaambia maafisa wake, “Shikeni nafasi zenu!” Basi wakajipanga kuushambulia mji. 13Wakati huo huo nabii mmoja akamjia Ahabu mfalme wa Israeli, akasema, “Hivi ndivyo BWANA asemavyo: ‘Je, unaliona jeshi hili kubwa mno? Leo nalitia mkononi mwako, nawe utajua kwamba mimi ndimi BWANA.’” 14Ahabu akauliza, “Kwa kupitia nani?” Akajibu, “Hivi ndivyo BWANA asemavyo: ‘Kwa vijana wa maafisa wa majimbo.’” Ahabu akauliza, “Ni nani atakayeanza vita?” Akajibu, “Wewe.” 15Basi Ahabu akawakusanya vijana wa maafisa wa majimbo, 232. Baada yao akawakusanya askari wote, Waisraeli wote, jumla 7,000. 16Walitoka adhuhuri, wakati Ben-hadadi alikuwa akilewa vibandani pamoja na wafalme thelathini na wawili walioungana naye. 17Vijana wa maafisa wa majimbo walitoka kwanza. Ben-hadadi akatuma wapelelezi, nao wakamletea habari, “Kuna watu wanaotoka Samaria.” 18Akasema, “Kama wametoka kufanya amani, wakamateni wakiwa hai. Kama wametoka kupigana, wakamateni wakiwa hai.” 19Basi hawa wakatoka mjini: vijana wa maafisa wa majimbo, na jeshi lililokuwa nyuma yao. 20Kila mmoja wao akamuua mtu wake. Waaramu wakakimbia, na Israeli wakawafukuza, lakini Ben-hadadi mfalme wa Aramu akatoroka juu ya farasi pamoja na wapanda farasi kadhaa. 21Mfalme wa Israeli akatoka, akawashambulia farasi na magari ya vita, akawashinda Waaramu kwa kipigo kikubwa. 22Kisha nabii akamjia mfalme wa Israeli, akamwambia, “Nenda ukajiimarishe. Fikiri kwa makini utakalofanya, kwa sababu mwanzoni mwa mwaka ujao mfalme wa Aramu atapanda kukushambulia.”

23Wakati huo maafisa wa mfalme wa Aramu wakamshauri, “Miungu yao ni miungu ya milima, ndiyo sababu walitushinda. Lakini tupigane nao katika nchi tambarare, nasi hakika tutakuwa na nguvu kuliko wao. 24Tena fanya hivi: mwondoe kila mmoja wa wafalme katika cheo chake, uweke watawala mahali pao. 25Kisha ujiundie jeshi kama lile ulilolipoteza, farasi kwa farasi na gari kwa gari, na tupigane nao katika nchi tambarare. Hakika tutakuwa na nguvu kuliko wao.” Akakubali shauri lao, akafanya hivyo.

26Mwanzoni mwa mwaka uliofuata Ben-hadadi akawakusanya Waaramu, akapanda mpaka Afeki kupigana na Israeli. 27Waisraeli wakakusanywa na kupewa chakula, wakatoka kukutana nao. Waisraeli wakapiga kambi wakiwaelekea kama makundi mawili madogo ya mbuzi, wakati Waaramu walikuwa wameijaza nchi yote. 28Kisha mtu wa Mungu akamjia mfalme wa Israeli, akasema, “Hivi ndivyo BWANA asemavyo: ‘Kwa sababu Waaramu wamesema kwamba BWANA ni mungu wa milima, wala si mungu wa mabonde, nitalitia jeshi hili lote kubwa mkononi mwako, nawe utajua kwamba mimi ndimi BWANA.’” 29Kwa siku saba majeshi hayo mawili yalipiga kambi yakielekeana. Siku ya saba vita vikaanza, nao Waisraeli wakawaua askari wa miguu wa Kiaramu 100,000 kwa siku moja. 30Waliobaki wakakimbilia ndani ya mji wa Afeki, na ukuta ukawaangukia watu 27,000 kati ya waliobaki. Ben-hadadi naye akakimbilia mjini, akajificha katika chumba cha ndani.

31Maafisa wake wakamwambia, “Sikiliza, tumesikia kwamba wafalme wa nyumba ya kifalme ya Israeli ni wafalme wenye fadhili. Na tujifunge magunia viunoni na kuweka kamba vichwani, tumwendee mfalme wa Israeli. Huenda atakuachia uhai wako.” 32Basi wakajifunga magunia viunoni na kamba vichwani, wakaja mbele ya mfalme wa Israeli, wakamwambia, “Mtumishi wako Ben-hadadi anaomba, ‘Tafadhali niachie uhai wangu.’” Ahabu akajibu, “Je, bado yu hai? Yeye ni ndugu yangu.” 33Watu hao waliona hiyo kuwa ishara njema, wakalidaka neno lake upesi, wakasema, “Ndiyo, ndugu yako Ben-hadadi!” Akasema, “Nendeni mkamlete.” Ben-hadadi alipotoka kwake, Ahabu akampandisha katika gari lake. 34Ben-hadadi akamwambia, “Nitairudisha miji ambayo baba yangu aliitwaa kutoka kwa baba yako, nawe unaweza kujiwekea mitaa ya biashara huko Dameski, kama baba yangu alivyofanya huko Samaria.” Ahabu akasema, “Kwa masharti ya agano nitakuachilia.” Basi akafanya agano naye, akamwacha aende zake.

35Kwa neno la BWANA, mmoja wa kundi la manabii akamwambia mwenzake, “Tafadhali nipige.” Lakini mtu huyo hakukubali kumpiga. 36Basi akamwambia, “Kwa kuwa hukumtii BWANA, mara utakapoondoka kwangu simba atakuua.” Alipoondoka kwake, simba akamkuta, akamuua. 37Akamkuta mtu mwingine, akamwambia, “Tafadhali nipige.” Mtu huyo akampiga, akamwacha na jeraha. 38Kisha nabii akaenda akamngoja mfalme kando ya njia. Akajibadilisha kwa kujifunga kitambaa juu ya macho yake. 39Mfalme alipokuwa akipita, nabii akamlilia, “Mtumishi wako alikwenda katikati ya vita, na ghafla mtu mmoja akageuka, akaniletea mateka. Akasema, ‘Mlinde mtu huyu. Akipotea, uhai wako utakuwa badala ya uhai wake, la sivyo utalipa karibu kilo 34 za fedha.’ 40Lakini mtumishi wako alipokuwa akishughulika na hili na lile, mtu huyo akatoweka.” Mfalme wa Israeli akamwambia, “Hiyo ndiyo hukumu yako. Wewe mwenyewe umeitamka.” 41Ndipo mtu huyo akakiondoa upesi kitambaa machoni pake, na mfalme wa Israeli akamtambua kuwa ni mmoja wa manabii. 42Nabii akamwambia, “Hivi ndivyo BWANA asemavyo: ‘Kwa kuwa umemwachilia mtu niliyemweka wakfu kwa maangamizi, uhai wako utatolewa badala ya uhai wake, na watu wako badala ya watu wake.’” 43Mfalme wa Israeli akaondoka kwenda ikulu yake akiwa na uchungu na hasira, akafika Samaria.