1 Wafalme 11

1Mfalme Sulemani aliwapenda wanawake wengi wa kigeni zaidi ya binti Farao: wanawake wa Moabu, Amoni, Edomu, Sidoni na Wahiti, 2wa mataifa ambayo BWANA alikuwa amewaonya Waisraeli juu yake: “Msioane nao, wala msiwaache waoane nanyi, kwa maana hakika watageuza mioyo yenu ifuate miungu yao.” Hata hivyo Sulemani aliwashikilia wanawake hao kwa upendo. 3Alikuwa na wake mia saba wa ukoo wa kifalme na masuria mia tatu, nao wake zake wakaugeuza moyo wake. 4Sulemani alipokuwa mzee, wake zake waliugeuza moyo wake ufuate miungu mingine, na moyo wake haukuwa umejitoa kikamilifu kwa BWANA Mungu wake, kama moyo wa baba yake Daudi ulivyokuwa. 5Sulemani alimfuata Ashtorethi, mungu wa kike wa Wasidoni, na Milkomu, mungu chukizo wa Waamoni. 6Basi Sulemani alifanya maovu machoni pa BWANA, wala hakumfuata BWANA kwa moyo wote kama baba yake Daudi alivyofanya.

7Wakati huo Sulemani alijenga mahali pa juu kwa ajili ya Kemoshi, mungu chukizo wa Moabu, juu ya mlima ulio mashariki ya Yerusalemu, na mahali pengine kwa ajili ya Moleki, mungu chukizo wa Waamoni. 8Alifanya vivyo hivyo kwa ajili ya wake zake wote wa kigeni, waliofukiza sadaka na kutoa dhabihu kwa miungu yao. 9BWANA alimkasirikia Sulemani, kwa kuwa moyo wake ulikuwa umemgeukia mbali BWANA, Mungu wa Israeli, aliyemtokea mara mbili 10na kumwamuru kuhusu jambo hili hasa, kwamba asifuate miungu mingine. Lakini Sulemani hakushika yale BWANA aliyoamuru.

11Basi BWANA akamwambia Sulemani, “Kwa kuwa umefanya hivi, wala hukulishika agano langu na kanuni zangu nilizokuamuru, hakika nitaurarua ufalme kutoka kwako na kumpa mtumishi wako. 12Hata hivyo sitafanya hivyo wakati wa maisha yako, kwa ajili ya baba yako Daudi. Nitaurarua kutoka mkononi mwa mwanao. 13Lakini sitaurarua ufalme wote. Nitampa mwanao kabila moja kwa ajili ya mtumishi wangu Daudi, na kwa ajili ya Yerusalemu, niliouchagua.” 14Kisha BWANA akamwinulia Sulemani adui: Hadadi Mwedomu, aliyekuwa wa jamaa ya kifalme ya Edomu. 15Zamani, Daudi alipokuwa vitani na Edomu, Yoabu mkuu wa jeshi alipanda kuwazika waliouawa, akamwua kila mwanamume katika Edomu; 16Kwa maana Yoabu na Israeli wote walikaa huko miezi sita, mpaka alipomwangamiza kila mwanamume katika Edomu. 17Lakini Hadadi alikimbilia Misri pamoja na baadhi ya maafisa wa Edomu waliomtumikia baba yake. Wakati huo Hadadi alikuwa mvulana mdogo tu. 18Waliondoka Midiani wakafika Parani. Wakachukua watu pamoja nao kutoka Parani, wakaenda Misri kwa Farao mfalme wa Misri. Farao akampa Hadadi nyumba na chakula, akampa pia ardhi. 19Hadadi alipata kibali kikubwa machoni pa Farao hata Farao akamwoza dada wa mke wake mwenyewe, dada wa malkia Tahpenesi. 20Dada wa Tahpenesi alimzalia mwana, Genubathi, ambaye Tahpenesi alimwachisha kunyonya katika ikulu ya Farao. Genubathi aliishi katika nyumba ya Farao pamoja na wana wa Farao mwenyewe. 21Akiwa Misri, Hadadi alisikia kwamba Daudi amepumzika pamoja na babu zake na kwamba Yoabu mkuu wa jeshi amekufa. Basi Hadadi akamwambia Farao, “Niruhusu niende, nirudi nchi yangu.” 22Farao akamwambia, “Umepungukiwa na nini hapa kwangu, hata sasa unataka kurudi nchi yako?” Hadadi akajibu, “Hakuna kitu, lakini tafadhali niache niende!” 23Mungu alimwinulia Sulemani adui mwingine, Rezoni mwana wa Eliada, aliyekuwa amemkimbia bwana wake, Hadadezeri mfalme wa Soba. 24Alikusanya watu kumzunguka, akawa kiongozi wa kikosi cha wavamizi baada ya Daudi kuyaua majeshi ya Soba. Wakaenda Dameski, wakakaa huko, wakatawala Dameski. 25Rezoni alikuwa adui wa Israeli muda wote Sulemani alipoishi, akiongeza madhara aliyoyafanya Hadadi. Aliwachukia sana Israeli, naye akatawala juu ya Aramu.

26Yeroboamu mwana wa Nebati, Mwefraimu wa Sereda, alikuwa mmoja wa maafisa wa Sulemani. Mama yake aliitwa Serua, naye alikuwa mjane. Yeroboamu alimwasi mfalme. 27Hivi ndivyo alivyokuja kumwasi mfalme. Sulemani alikuwa ameijenga Milo na kuziba pengo katika ukuta wa mji wa Daudi baba yake. 28Yeroboamu alikuwa mtu hodari na mwenye uwezo. Sulemani alipoona jinsi kijana huyo alivyofanya kazi yake vizuri, alimweka kuwa msimamizi wa kazi yote ya kulazimishwa ya nyumba ya Yusufu.

29Wakati ule, Yeroboamu alipokuwa akitoka Yerusalemu, nabii Ahiya Mshiloni alikutana naye njiani. Ahiya alikuwa amevaa joho jipya, nao wawili walikuwa peke yao mashambani. 30Ahiya akalishika joho jipya alilokuwa amevaa, akalirarua vipande kumi na viwili. 31Kisha akamwambia Yeroboamu, “Chukua vipande kumi, kwa maana hivi ndivyo BWANA, Mungu wa Israeli, asemavyo: ‘Ninakaribia kuurarua ufalme kutoka mkononi mwa Sulemani na kukupa makabila kumi, 32lakini kabila moja litabaki lake kwa ajili ya mtumishi wangu Daudi na kwa ajili ya Yerusalemu, mji niliouchagua kati ya makabila yote ya Israeli, 33kwa sababu wameniacha na kumwabudu Ashtorethi mungu wa kike wa Wasidoni, Kemoshi mungu wa Moabu, na Milkomu mungu wa Waamoni. Hawakuenenda katika njia zangu, wakitenda yaliyo sawa machoni pangu na kushika kanuni zangu na maamuzi yangu, kama baba yake Daudi alivyofanya. 34Hata hivyo sitauchukua ufalme wote kutoka mkononi mwake. Nitamwacha kuwa kiongozi siku zote za maisha yake, kwa ajili ya mtumishi wangu Daudi, niliyemchagua na aliyezishika amri zangu na kanuni zangu. 35Lakini nitauchukua ufalme kutoka mkononi mwa mwanawe na kukupa makabila kumi ya ufalme huo. 36Mwanawe nitampa kabila moja, ili mtumishi wangu Daudi awe na taa daima mbele yangu huko Yerusalemu, mji niliojichagulia ili kuliweka jina langu huko. 37Na wewe, nitakutwaa, nawe utatawala juu ya yote unayoyatamani; utakuwa mfalme juu ya Israeli. 38Ukisikiliza yote ninayokuamuru, ukaenenda katika njia zangu, na kutenda yaliyo sawa machoni pangu kwa kushika kanuni zangu na amri zangu, kama mtumishi wangu Daudi alivyofanya, nitakuwa pamoja nawe. Nitakujengea nyumba imara, kama nilivyomfanyia Daudi, nami nitakupa Israeli kuwa yako. 39Kwa sababu ya jambo hili nitawanyenyekeza wazao wa Daudi, lakini si milele.’”

40Sulemani alijaribu kumwua Yeroboamu, lakini Yeroboamu akakimbilia Misri kwa Shishaki mfalme wa Misri, akakaa huko mpaka Sulemani alipokufa. 41Mambo mengine ya Sulemani, yote aliyoyafanya na hekima yake, yameandikwa katika Kitabu cha Matendo ya Sulemani. 42Sulemani alitawala huko Yerusalemu juu ya Israeli wote kwa miaka arobaini. 43Kisha Sulemani akapumzika pamoja na babu zake, akazikwa katika mji wa Daudi baba yake. Na mwanawe Rehoboamu akawa mfalme mahali pake.