2 Samweli 24

1Kwa mara nyingine hasira ya BWANA ikawaka dhidi ya Israeli, naye akamchochea Daudi dhidi yao, akisema, “Nenda ukawahesabu Israeli na Yuda.” 2Basi mfalme akamwambia Yoabu, mkuu wa jeshi aliyekuwa pamoja naye, “Pita katika makabila yote ya Israeli, tangu Dani mpaka Beer-sheba, uwaandikishe watu, ili nijue wako wangapi.”

3Lakini Yoabu akamwambia mfalme, “BWANA Mungu wako na awazidishe watu mara mia kuliko walivyo sasa, na bwana wangu mfalme ajionee kwa macho yake mwenyewe! Lakini kwa nini bwana wangu mfalme anataka kufanya jambo hili?” 4Lakini amri ya mfalme ikashinda maoni ya Yoabu na makamanda wa jeshi, kwa hiyo Yoabu na makamanda wa jeshi wakaondoka mbele ya mfalme kwenda kuwaandikisha watu wa Israeli. 5Wakavuka Yordani wakapiga kambi Aroeri, upande wa kusini wa mji ulio katikati ya bonde; kisha wakapita Gadi mpaka Yazeri. 6Kisha wakaenda Gileadi na nchi ya Tahtim-hodshi, wakaendelea mpaka Dani-yaani, wakazunguka kuelekea Sidoni. 7Wakafika kwenye ngome ya Tiro na miji yote ya Wahivi na Wakanaani, kisha wakatoka kwenda Negebu ya Yuda, huko Beer-sheba. 8Walipokwisha kupita katika nchi yote, wakarudi Yerusalemu mwisho wa miezi tisa na siku ishirini. 9Yoabu akampa mfalme jumla ya watu walioandikishwa: katika Israeli walikuwa wanaume elfu mia nane wenye nguvu walioweza kutumia upanga, na katika Yuda elfu mia tano. 10Lakini baada ya Daudi kuwahesabu watu, dhamiri yake ikamshtaki. Daudi akamwambia BWANA, “Nimetenda dhambi kubwa kwa kufanya hivi. Sasa, Ee BWANA, tafadhali uondoe hatia ya mtumishi wako, kwa maana nimetenda kwa upumbavu sana.” 11Daudi alipoamka asubuhi, neno la BWANA lilikuwa limekwisha kumjia nabii Gadi, mwonaji wa Daudi: 12“Nenda ukamwambie Daudi, ‘BWANA asema hivi: Ninaweka mambo matatu mbele yako. Chagua moja wapo, nami nitakutendea hilo.’” 13Basi Gadi akaenda kwa Daudi akamwambia, “Je, iijie nchi yako miaka saba ya njaa? Au miezi mitatu ya kuwakimbia adui zako wakikufukuza? Au siku tatu za tauni katika nchi yako? Sasa fikiri uamue jibu nitakalompelekea yule aliyenituma.”

14Daudi akamwambia Gadi, “Nimo katika dhiki kubwa. Na tuanguke mkononi mwa BWANA, kwa maana rehema zake ni nyingi; lakini nisianguke mikononi mwa wanadamu.” 15Basi BWANA akaleta tauni juu ya Israeli tangu asubuhi ile mpaka wakati ulioamriwa, na watu elfu sabini wakafa, tangu Dani mpaka Beer-sheba. 16Lakini malaika alipounyosha mkono wake kuelekea Yerusalemu ili kuuangamiza, BWANA akaghairi kuleta maafa hayo. Akamwambia malaika aliyekuwa akiwaangamiza watu, “Inatosha! Sasa zuia mkono wako.” Wakati huo malaika wa BWANA alikuwa karibu na uwanja wa kupuria wa Arauna Myebusi.

17Daudi alipomwona malaika aliyekuwa akiwapiga watu, akamwambia BWANA, “Mimi ndiye niliyetenda dhambi; mimi ndiye niliyekosa. Lakini kondoo hawa wamefanya nini? Tafadhali mkono wako uwe juu yangu na juu ya jamaa ya baba yangu.”

18Siku ile ile Gadi akaja kwa Daudi akamwambia, “Panda ukamjengee BWANA madhabahu katika uwanja wa kupuria wa Arauna Myebusi.” 19Basi Daudi akapanda kama Gadi alivyomwambia, sawasawa na BWANA alivyoamuru. 20Arauna alipotazama chini na kumwona mfalme na maafisa wake wakija kwake, akatoka akainama mbele ya mfalme kifudifudi hadi chini. 21Arauna akauliza, “Kwa nini bwana wangu mfalme amekuja kwa mtumishi wake?” Daudi akajibu, “Nimekuja kununua uwanja wako wa kupuria, ili nimjengee BWANA madhabahu na tauni iliyowapata watu ikomeshwe.” 22Arauna akamwambia Daudi, “Bwana wangu mfalme na achukue chochote anachoona ni bora, akitoe sadaka. Tazama, hawa hapa ng’ombe kwa ajili ya sadaka ya kuteketezwa, na mbao za kupuria na nira za ng’ombe kwa ajili ya kuni. 23Haya yote, mfalme wangu, Arauna anampa mfalme.” Arauna akamwambia mfalme, “BWANA Mungu wako na akukubali.” 24Lakini mfalme akamwambia Arauna, “Hapana, ni lazima nikulipe bei yake. Sitamtolea BWANA Mungu wangu sadaka za kuteketezwa ambazo hazinigharimu chochote.” Basi Daudi akanunua uwanja wa kupuria na ng’ombe kwa kama gramu 575 za fedha. 25Daudi akamjengea BWANA madhabahu huko, akatoa sadaka za kuteketezwa na sadaka za amani. Kisha BWANA akajibu maombi kwa ajili ya nchi, na tauni iliyowapata Israeli ikakoma.