2 Samweli 14

1Yoabu mwana wa Seruya alijua kwamba moyo wa mfalme ulimwelekea Absalomu. 2Basi Yoabu alituma watu Tekoa, akamleta mwanamke mwenye hekima kutoka huko. Akamwambia, “Jifanye kuwa uko katika maombolezo. Vaa mavazi ya maombolezo, wala usijipake mafuta. Ujifanye kama mwanamke ambaye amekuwa akimlilia mfu kwa muda mrefu. 3Kisha nenda kwa mfalme useme naye hivi.” Yoabu akatia maneno kinywani mwake. 4Mwanamke wa Tekoa alipomwendea mfalme kusema naye, alijitupa kifudifudi chini, akasujudu. Akasema, “Nisaidie, Mtukufu mfalme!”

5Mfalme akamwuliza, “Ni nini kinachokusumbua?” Akajibu, “Ole wangu, mimi ni mjane. Mume wangu amekufa. 6Mtumishi wako alikuwa na wana wawili. Wawili hao wakagombana huko shambani, wala hapakuwa na mtu wa kuwatenganisha, na mmoja akampiga mwenzake akamwua. 7Sasa ukoo wote umeinuka dhidi ya mtumishi wako. Wanasema, ‘Mtoe yule aliyempiga ndugu yake. Tutamwua kulipa uhai wa ndugu yake aliyemwua, na hivyo tumwangamize na mrithi pia.’ Hivyo wangelizima kaa la moto moja nililobakiwa nalo, wasimwachie mume wangu jina wala mzao juu ya uso wa dunia.”

8Mfalme akamwambia yule mwanamke, “Nenda nyumbani. Nitatoa amri kuhusu shauri lako.” 9Mwanamke wa Tekoa akamjibu mfalme, “Bwana wangu mfalme, hatia na iwe juu yangu na juu ya jamaa ya baba yangu, na mfalme na kiti chake cha enzi wasiwe na lawama.”

10Mfalme akasema, “Mtu yeyote akikuambia lolote, mlete kwangu, naye hatakusumbua tena kamwe.” 11Akasema, “Tafadhali mfalme amtaje BWANA Mungu wako, ili mlipiza kisasi cha damu asiongeze maangamizi, na mwanangu asiangamizwe.” Akasema, “Kama BWANA aishivyo, hakuna hata unywele mmoja wa kichwa cha mwanao utakaoanguka chini.” 12Kisha yule mwanamke akasema, “Tafadhali mruhusu mtumishi wako aseme jambo moja zaidi kwa bwana wangu mfalme.” Akasema, “Sema.”

13Yule mwanamke akasema, “Kwa nini basi umepanga jambo kama hili dhidi ya watu wa Mungu? Kwa kusema hivyo, mfalme anajihukumu mwenyewe, kwa kuwa mfalme hajamrudisha nyumbani mwanawe mwenyewe aliyefukuzwa. 14Sisi sote ni lazima tufe; tu kama maji yaliyomwagika chini, ambayo hayawezi kuzolewa tena. Lakini Mungu haondoi uhai; badala yake yeye hutafuta njia ili aliyefukuzwa asibaki mbali naye. 15Sasa nimekuja kumwambia bwana wangu mfalme jambo hili kwa sababu watu waliniogopesha. Mtumishi wako akawaza, ‘Nitasema na mfalme. Huenda mfalme atamtimizia mtumishi wake ombi lake.’ 16Kwa maana mfalme atasikiliza na kumwokoa mtumishi wake kutoka mkononi mwa mtu anayetaka kutuangamiza mimi na mwanangu, na kutuondoa katika urithi aliotupa Mungu. 17Mtumishi wako akawaza, ‘Neno la bwana wangu mfalme na liniletee utulivu, kwa kuwa bwana wangu mfalme ni kama malaika wa Mungu katika kupambanua jema na baya.’ BWANA Mungu wako na awe pamoja nawe!”

18Kisha mfalme akamjibu yule mwanamke, “Usinifiche jambo lolote nitakalokuuliza.” Yule mwanamke akasema, “Bwana wangu mfalme na aseme.” 19Mfalme akauliza, “Je, Yoabu ameshiriki pamoja nawe katika haya yote?” Mwanamke akajibu, “Bwana wangu mfalme, kama uishivyo, hakuna mtu awezaye kugeuka kulia au kushoto akakwepa lolote analosema bwana wangu mfalme. Naam, ni mtumishi wako Yoabu aliyeniagiza. Yeye ndiye aliyetia maneno haya yote kinywani mwa mtumishi wako. 20Mtumishi wako Yoabu alifanya hivi ili kubadili hali ya mambo. Lakini bwana wangu ana hekima kama ya malaika wa Mungu, naye anajua kila kitu kinachotokea nchini.”

21Kisha mfalme akamwambia Yoabu, “Vema, nitafanya hivyo. Nenda ukamrudishe kijana Absalomu.” 22Yoabu akajitupa kifudifudi chini, akasujudu, akambariki mfalme. Yoabu akasema, “Leo mtumishi wako anajua kwamba bwana wangu mfalme ananitazama kwa kibali, kwa sababu mfalme amemtimizia mtumishi wako ombi lake.” 23Basi Yoabu akaondoka, akaenda Geshuri, akamrudisha Absalomu Yerusalemu.

24Lakini mfalme akasema, “Na aende nyumbani kwake mwenyewe. Asije mbele yangu.” Basi Absalomu akaenda nyumbani kwake, wala hakuja mbele ya mfalme.

25Katika Israeli yote hapakuwa na mtu aliyesifiwa sana kwa uzuri wake kama Absalomu; hakuwa na dosari hata kidogo tangu wayo wa mguu hadi utosi wa kichwa. 26Kila alipokata nywele zake, jambo alilofanya mara moja kwa mwaka kwa sababu zilimlemea, alizipima, nazo zilifikia kama kilo 2.3 kwa kipimo cha kifalme. 27Absalomu alipata wana watatu na binti mmoja. Binti yake aliitwa Tamari, naye alikuwa mwanamke mzuri.

28Absalomu aliishi Yerusalemu miaka miwili kamili bila kuja mbele ya mfalme. 29Kisha Absalomu alimwita Yoabu, akikusudia kumtuma kwa mfalme, lakini Yoabu hakutaka kuja kwake. Akatuma mara ya pili, lakini bado Yoabu hakutaka kuja. 30Basi akawaambia watumishi wake, “Mnaona shamba la Yoabu kando ya langu, ambalo ana shayiri ndani yake. Nendeni mkalitie moto.” Watumishi wa Absalomu wakalitia moto shamba hilo.

31Ndipo Yoabu akaenda moja kwa moja kwa Absalomu nyumbani kwake, akamwambia, “Kwa nini watumishi wako wamelitia moto shamba langu?” 32Absalomu akamjibu Yoabu, “Nilituma ujumbe kwako uje hapa, ili nikutume kwa mfalme kuuliza, ‘Kwa nini nilirudi kutoka Geshuri? Ingekuwa afadhali kwangu kama ningebaki huko.’ Sasa niruhusiwe kufika mbele ya mfalme. Ikiwa nina hatia yoyote, na aniue.” 33Basi Yoabu akaenda kwa mfalme akamwambia, na mfalme akamwita Absalomu. Absalomu akaja kwa mfalme, akainama mbele yake kifudifudi hadi chini, na mfalme akambusu Absalomu.