2 Samweli 6

1Daudi aliwakusanya tena watu wote wateule wa Israeli, elfu thelathini. 2Kisha Daudi na watu wote waliokuwa pamoja naye waliondoka Baale-yuda ili kulipandisha kutoka huko sanduku la Mungu, sanduku linaloitwa kwa jina, jina la BWANA wa majeshi, anayeketi katika enzi juu ya makerubi yaliyo juu yake. 3Waliliweka sanduku la Mungu juu ya gari jipya la kukokotwa, wakalitoa nyumbani kwa Abinadabu kilimani, huku Uza na Ahio, wana wa Abinadabu, wakiliendesha gari hilo jipya. 4Basi walilitoa gari hilo nyumbani kwa Abinadabu kilimani likiwa na sanduku la Mungu juu yake, naye Ahio alikuwa akitembea mbele ya sanduku. 5Daudi na nyumba yote ya Israeli walikuwa wakishangilia mbele za BWANA kwa kila aina ya vyombo vya muziki vilivyotengenezwa kwa mti wa mvinje, kwa vinubi, zeze, matari, njuga na matoazi. 6Walipofika kwenye uwanja wa kupuria wa Nakoni, Uza alinyosha mkono wake akalishika sanduku la Mungu, kwa sababu ng’ombe walikuwa wamejikwaa. 7Ndipo hasira ya BWANA ikawaka dhidi ya Uza, naye Mungu akampiga hapo kwa kosa lake. Akafa hapo kando ya sanduku la Mungu. 8Daudi alikasirika kwa sababu BWANA alikuwa amemfurikia Uza kwa hasira, akapaita mahali pale Peres-uza, jina ambalo pana mpaka leo. 9Siku ile Daudi alimwogopa BWANA, akasema, “Sanduku la BWANA litawezaje kuja kwangu?” 10Basi Daudi hakutaka kulileta sanduku la BWANA katika mji wa Daudi likae pamoja naye. Badala yake aligeuka akalipeleka nyumbani kwa Obed-edomu Mgiti. 11Sanduku la BWANA lilikaa nyumbani kwa Obed-edomu Mgiti kwa miezi mitatu, naye BWANA akambariki Obed-edomu na watu wote wa nyumbani mwake. 12Mfalme Daudi aliambiwa, “BWANA ameibariki jamaa ya Obed-edomu na kila kitu alicho nacho kwa sababu ya sanduku la Mungu.” Basi Daudi akaenda akalipandisha sanduku la Mungu kutoka nyumbani kwa Obed-edomu mpaka mji wa Daudi kwa shangwe. 13Wale waliolibeba sanduku la BWANA walipokuwa wamepiga hatua sita, Daudi alitoa dhabihu ya ng’ombe na ndama aliyenona. 14Daudi alikuwa akicheza mbele za BWANA kwa nguvu zake zote, naye alikuwa amevaa efodi ya kitani. 15Basi Daudi na nyumba yote ya Israeli walilipandisha sanduku la BWANA kwa kelele kuu za shangwe na kwa sauti ya baragumu. 16Sanduku la BWANA lilipokuwa likiingia katika mji wa Daudi, Mikali binti Sauli alichungulia dirishani. Akamwona mfalme Daudi akirukaruka na kucheza mbele za BWANA, naye akamdharau moyoni mwake. 17Waliliingiza sanduku la BWANA wakaliweka mahali pake ndani ya hema ambalo Daudi alikuwa amelipigia. Kisha Daudi akatoa sadaka za kuteketezwa na sadaka za amani mbele za BWANA. 18Daudi alipomaliza kutoa sadaka za kuteketezwa na sadaka za amani, aliwabariki watu kwa jina la BWANA wa majeshi. 19Aliwagawia pia watu wote chakula, umati wote wa Israeli, wanaume na wanawake: kila mmoja mkate mmoja, andazi la tende na andazi la zabibu kavu. Kisha watu wote wakaenda, kila mtu nyumbani kwake. 20Daudi aliporudi nyumbani kuibariki jamaa yake, Mikali binti Sauli alitoka kumlaki. Akasema, “Jinsi mfalme wa Israeli alivyojipatia heshima leo! Amejifunua leo mbele ya macho ya wajakazi wa maafisa wake, bila haya, kama mtu yeyote asiyefaa kitu!” 21Daudi akamwambia Mikali, “Nilicheza mbele za BWANA, aliyenichagua kuliko baba yako na jamaa yake yote, akaniweka kuwa kiongozi juu ya Israeli, watu wa BWANA. Nitashangilia mbele za BWANA. 22Nitajishusha hata zaidi kuliko hivi, nami nitakuwa mnyenyekevu machoni pangu mwenyewe. Lakini wale wajakazi uliowasema, wao ndio watakaoniheshimu.” 23Naye Mikali binti Sauli hakupata mtoto mpaka siku alipokufa.