2 Samweli 2

1Baada ya hayo, Daudi alimwuliza BWANA, “Je, nipande kwenda katika mji wowote wa Yuda?” BWANA akamwambia, “Panda.” Daudi akauliza, “Niende wapi?” Akajibu, “Hebroni.” 2Basi Daudi alipanda huko, na wake zake wawili wakaenda pamoja naye: Ahinoamu wa Yezreeli, na Abigaili, aliyekuwa mke wa Nabali wa Karmeli. 3Daudi aliwapandisha pia watu wake, kila mmoja pamoja na jamaa yake, nao wakafanya makao yao katika miji iliyozunguka Hebroni. 4Kisha watu wa Yuda walikuja, wakampaka Daudi mafuta huko awe mfalme juu ya nyumba ya Yuda. Daudi akaambiwa, “Watu wa Yabeshi ya Gileadi ndio waliomzika Sauli.”

5Daudi alituma wajumbe kwa watu wa Yabeshi ya Gileadi kuwaambia, “BWANA awabariki, kwa sababu mlimtendea bwana wenu Sauli fadhili hizi kwa kumzika. 6Sasa BWANA awaonyeshe fadhili na uaminifu. Nami pia nitawatendea mema, kwa sababu mmefanya jambo hili. 7Basi sasa iweni hodari na mashujaa, kwa maana Sauli bwana wenu amekufa, na nyumba ya Yuda imenipaka mafuta niwe mfalme juu yao.”

8Wakati huo Abneri mwana wa Neri, mkuu wa jeshi la Sauli, alikuwa amemchukua Ishboshethi mwana wa Sauli na kumvusha mpaka Mahanaimu. 9Alimfanya mfalme juu ya Gileadi, Waashuri na Yezreeli, juu ya Efraimu na Benyamini, na juu ya Israeli yote.

10Ishboshethi mwana wa Sauli alikuwa na umri wa miaka arobaini alipoanza kutawala juu ya Israeli, naye akatawala miaka miwili. Ila nyumba ya Yuda tu ndiyo iliyomfuata Daudi. 11Daudi alikuwa mfalme huko Hebroni juu ya nyumba ya Yuda kwa miaka saba na miezi sita.

12Abneri mwana wa Neri aliondoka Mahanaimu kwenda Gibeoni pamoja na watu wa Ishboshethi mwana wa Sauli. 13Yoabu mwana wa Seruya na watu wa Daudi nao walitoka, na majeshi hayo mawili yakakutana kwenye bwawa la Gibeoni. Wakaketi wakielekeana, kundi moja kila upande wa bwawa. 14Kisha Abneri akamwambia Yoabu, “Baadhi ya vijana wainuke wafanye shindano mbele yetu.” Yoabu akajibu, “Na wainuke.” 15Basi wakainuka, wakasogea mbele mmoja mmoja walipokuwa wakihesabiwa: kumi na wawili kwa ajili ya Benyamini na Ishboshethi mwana wa Sauli, na kumi na wawili wa watu wa Daudi. 16Kila mtu alimkamata mpinzani wake kichwani, akamchoma upanga ubavuni, nao wakaanguka pamoja. Kwa hiyo mahali pale katika Gibeoni pakaitwa Helkath-hazurimu. 17Vita vikali sana vilifuata siku ile, na watu wa Daudi wakamshinda Abneri na watu wa Israeli. 18Wana watatu wa Seruya walikuwa huko: Yoabu, Abishai na Asaheli. Asaheli alikuwa mwepesi wa miguu kama swala wa porini. 19Asaheli alimfuatia Abneri, akaendelea kumfuata bila kugeuka kulia wala kushoto. 20Abneri akatazama nyuma akasema, “Je, ni wewe, Asaheli?” Akajibu, “Ndiye mimi.” 21Abneri akamwambia, “Geuka upande wa kulia au wa kushoto. Mkamate mmoja wa vijana ujichukulie silaha zake.” Lakini Asaheli hakukubali kuacha kumfuata. 22Abneri akamwonya Asaheli tena, “Acha kunifuata! Kwa nini nilazimike kukuangusha? Ningewezaje kumtazama ndugu yako Yoabu usoni?” 23Lakini Asaheli alikataa kugeuka. Basi Abneri akampiga tumboni kwa ncha ya nyuma ya mkuki wake, na mkuki ukatokea mgongoni. Akaanguka pale akafa papo hapo. Kila mtu aliyefika mahali pale Asaheli alipoanguka akafa alisimama kimya. 24Lakini Yoabu na Abishai waliendelea kumfuatia Abneri. Jua lilipokuwa likizama walifika kilima cha Ama, kinachoelekea Gia, katika njia ya kwenda nyika ya Gibeoni. 25Watu wa Benyamini walikusanyika kumzunguka Abneri, wakawa kikosi kimoja, wakasimama imara juu ya kilele cha kilima. 26Abneri akamwita Yoabu kwa sauti, “Je, upanga utaendelea kuua milele? Huoni kwamba jambo hili litaishia katika uchungu? Mpaka lini ndipo utawaamuru askari waache kuwafuatia ndugu zao wenyewe?” 27Yoabu akajibu, “Kama Mungu aishivyo, kama usingalisema, askari wangaliendelea kuwafuatia ndugu zao mpaka asubuhi.” 28Yoabu alipiga tarumbeta, na jeshi lote likasimama. Wakaacha kuwafuatia Israeli, na vita vikaisha. 29Abneri na watu wake walitembea usiku ule wote kupitia Araba. Wakavuka Yordani, wakapita katika Bithroni yote, wakafika Mahanaimu. 30Yoabu aliporudi kutoka kumfuatia Abneri, aliwakusanya askari wote. Watu kumi na tisa wa Daudi walikosekana, pamoja na Asaheli. 31Lakini watu wa Daudi walikuwa wamewaua watu wa Benyamini na wa jeshi la Abneri, na 360 kati yao walikufa. 32Walimchukua Asaheli wakamzika katika kaburi la baba yake huko Bethlehemu. Kisha Yoabu na watu wake wakatembea usiku kucha, na kulipopambazuka walifika Hebroni.