2 Samweli 16

1Daudi alipokuwa amepita kidogo kutoka kilele cha kilima, Siba, mhudumu wa Mefiboshethi, akakutana naye. Alikuwa na punda wawili waliotandikwa, wakiwa wamebeba mikate 200, vishada 100 vya zabibu kavu, mafungu 100 ya matunda ya kiangazi na kiriba cha divai. 2Mfalme akamwuliza Siba, “Unakusudia nini kwa vitu hivi?” Siba akajibu, “Punda ni kwa ajili ya watu wa nyumbani mwa mfalme kupanda. Mikate na matunda ya kiangazi ni chakula cha vijana, na divai ni kwa ajili ya yeyote atakayechoka sana nyikani.” 3Mfalme akauliza, “Na mjukuu wa bwana wako yuko wapi?” Siba akamjibu mfalme, “Amebaki Yerusalemu. Amesema, ‘Leo nyumba ya Israeli itanirudishia ufalme wa babu yangu.’” 4Ndipo mfalme akamwambia Siba, “Kila kitu kilichokuwa cha Mefiboshethi sasa ni chako.” Siba akasema, “Ninasujudu mbele yako. Nipate kibali kwako, bwana wangu mfalme.” 5Mfalme Daudi alipofika Bahurimu, mtu mmoja wa ukoo wa jamaa ya Sauli akatoka huko. Jina lake lilikuwa Shimei mwana wa Gera, na alipokuwa akitoka aliendelea kulaani. 6Akawatupia mawe Daudi na maafisa wote wa Mfalme Daudi, ingawa watu wote na mashujaa wote walikuwa upande wa kulia wa Daudi na upande wake wa kushoto. 7Shimei alipokuwa akilaani, alisema, “Toka! Toka, wewe mtu wa damu, wewe mtu usiyefaa kitu! 8BWANA amekulipiza damu yote ya jamaa ya Sauli, ambaye ulimnyang’anya kiti chake cha enzi. BWANA ameutia ufalme mikononi mwa mwanao Absalomu. Na tazama, maafa yamekupata, kwa sababu wewe ni mtu wa damu!” 9Ndipo Abishai mwana wa Seruya akamwambia mfalme, “Kwa nini umwache mbwa huyu mfu amlaani bwana wangu mfalme? Tafadhali niruhusu nivuke nikakate kichwa chake.”

10Lakini mfalme akasema, “Jambo hili linawahusu nini ninyi, wana wa Seruya? Mwacheni alaani hivyo, kwa sababu BWANA amemwambia, ‘Mlaani Daudi.’ Basi ni nani awezaye kuuliza, ‘Kwa nini umefanya hivi?’”

11Daudi akamwambia Abishai na maafisa wake wote, “Tazama, mwanangu mwenyewe, aliyetoka katika mwili wangu, anajaribu kuniua. Sembuse sasa Mbenyamini huyu! Mwacheni alaani, kwa sababu BWANA amemwambia afanye hivyo. 12Huenda BWANA ataiangalia taabu yangu na kunilipa mema badala ya laana yake leo.” 13Basi Daudi na watu wake wakaendelea na njia yao, huku Shimei akienda sambamba naye kwenye mteremko wa kilima upande wa pili, akilaani alipokuwa akienda, akimtupia mawe na kurusha mavumbi.

14Mfalme na watu wote waliokuwa pamoja naye wakafika wakiwa wamechoka sana, naye akapumzika huko akapata nguvu tena. 15Wakati huo Absalomu akaja Yerusalemu pamoja na watu wote, watu wa Israeli, na Ahithofeli alikuwa pamoja naye. 16Hushai Mwarki, rafiki wa Daudi, alipokuja kwa Absalomu, Hushai akamwambia, “Mfalme na aishi maisha marefu! Mfalme na aishi maisha marefu!” 17Absalomu akamwambia Hushai, “Je, hizi ndizo fadhili zako kwa rafiki yako? Kwa nini hukwenda pamoja na rafiki yako?” 18Hushai akamjibu Absalomu, “Hapana! Nitakuwa wa yule ambaye BWANA, watu hawa na watu wote wa Israeli wamemchagua, nami nitakaa pamoja naye. 19Zaidi ya hayo, nimtumikie nani? Je, isiwe ni mwanawe? Kama nilivyomtumikia baba yako, ndivyo nitakavyokutumikia wewe.”

20Kisha Absalomu akamwambia Ahithofeli, “Tupe ushauri wako. Tufanye nini?” 21Ahithofeli akamjibu Absalomu, “Lala na masuria wa baba yako, aliowaacha kuitunza ikulu. Ndipo Israeli wote watasikia kwamba umejifanya kuwa chukizo kwa baba yako, na wote walio pamoja nawe watatiwa nguvu.” 22Basi wakampigia Absalomu hema juu ya paa, na Absalomu akalala na masuria wa baba yake machoni pa Israeli wote. 23Siku hizo, ushauri aliotoa Ahithofeli ulikuwa kama kuomba neno kutoka kwa Mungu. Hivyo ndivyo Daudi na Absalomu walivyouona ushauri wote wa Ahithofeli.