2 Samweli 8

1Baada ya hayo, Daudi aliwashinda Wafilisti akawaweka chini ya mamlaka yake. Akautwaa Methegi-ama kutoka mikononi mwa Wafilisti. 2Aliwashinda pia Moabu. Akawalaza Wamoabu chini, akawapima kwa kamba: urefu wa kamba mbili waliuawa, na urefu mmoja mzima waliachwa hai. Basi Wamoabu wakawa chini ya Daudi, wakamletea kodi. 3Daudi alimshinda pia Hadadezeri mwana wa Rehobu, mfalme wa Soba, Hadadezeri alipokwenda kurudisha mamlaka yake kwenye mto Frati. 4Daudi aliteka kwake wapanda farasi 1,700 na askari wa miguu 20,000. Akawakata mishipa ya miguu farasi wote wa magari ya vita, lakini akabakiza wa kutosha magari mia moja. 5Waaramu wa Dameski walipokuja kumsaidia Hadadezeri mfalme wa Soba, Daudi aliwaua Waaramu 22,000. 6Kisha Daudi akaweka vikosi vya askari katika Aramu wa Dameski. Waaramu wakawa chini ya Daudi, wakamletea kodi. BWANA alimpa Daudi ushindi kila alikokwenda. 7Daudi alichukua ngao za dhahabu walizokuwa wamebeba maafisa wa Hadadezeri, akazileta Yerusalemu. 8Kutoka Beta na Berothai, miji ya Hadadezeri, mfalme Daudi alichukua shaba nyingi sana.

9Toi mfalme wa Hamathi aliposikia kwamba Daudi amelishinda jeshi lote la Hadadezeri, 10alimtuma mwanawe Yoramu kwa mfalme Daudi kumsalimu na kumpongeza kwa kupigana na Hadadezeri na kumshinda, kwa maana Hadadezeri na Toi walikuwa wamepigana vita mara nyingi. Yoramu alileta pamoja naye vyombo vya fedha, vya dhahabu na vya shaba. 11Mfalme Daudi alimwekea BWANA wakfu vitu hivyo pia, kama alivyofanya kwa fedha na dhahabu aliyotwaa kutoka mataifa yote aliyoyaweka chini ya mamlaka yake: 12kutoka Aramu, Moabu, Waamoni, Wafilisti na Amaleki, na kutoka nyara alizotwaa kwa Hadadezeri mwana wa Rehobu, mfalme wa Soba. 13Daudi alijipatia jina aliporudi kutoka kuwaua Waaramu 18,000 katika Bonde la Chumvi. 14Aliweka vikosi vya askari katika Edomu, katika Edomu yote, na Waedomu wote wakawa chini ya Daudi. BWANA alimpa Daudi ushindi kila alikokwenda. 15Basi Daudi alitawala juu ya Israeli wote, naye akawatendea watu wake wote yaliyo ya haki na ya adili. 16Yoabu mwana wa Seruya alikuwa mkuu wa jeshi; Yehoshafati mwana wa Ahiludi alikuwa mwandishi wa kumbukumbu; 17Sadoki mwana wa Ahitubu na Ahimeleki mwana wa Abiathari walikuwa makuhani; Seraya alikuwa katibu; 18Benaya mwana wa Yehoyada alikuwa mkuu wa Wakerethi na Wapelethi; na wana wa Daudi walikuwa makuhani.