2 Samweli 13

1Baada ya muda, Absalomu mwana wa Daudi alikuwa na dada mzuri jina lake Tamari, naye Amnoni mwana wa Daudi akampenda. 2Amnoni aliteseka sana kwa ajili ya dada yake Tamari hata akaugua. Tamari alikuwa bikira, na Amnoni aliona haiwezekani kumfanyia lolote. 3Basi Amnoni alikuwa na rafiki aitwaye Yonadabu mwana wa Shimea, ndugu yake Daudi. Yonadabu alikuwa mtu mwerevu sana. 4Akamwuliza, “Mwana wa mfalme, kwa nini unaonekana umedhoofika hivi kila asubuhi? Je, hutaniambia?” Amnoni akamjibu, “Ninampenda Tamari, dada yake ndugu yangu Absalomu.” 5Yonadabu akamwambia, “Lala kitandani ujifanye kuwa mgonjwa. Kisha baba yako akija kukutazama, mwambie, ‘Nakuomba, mwache dada yangu Tamari aje anilishe. Aandae chakula hapa mbele yangu, ili nipate kumtazama, kisha nile kutoka mkononi mwake.’” 6Basi Amnoni akalala, akajifanya mgonjwa. Mfalme alipokuja kumwona, Amnoni akamwambia, “Nakuomba, mwache dada yangu Tamari aje hapa anitengenezee mikate michache mbele yangu, ili nile kutoka mkononi mwake.” 7Daudi akatuma ujumbe kwa Tamari ikulu: “Tafadhali nenda nyumbani kwa ndugu yako Amnoni umwandalie chakula.” 8Basi Tamari akaenda nyumbani kwa ndugu yake Amnoni, ambako alikuwa amelala kitandani. Akachukua unga, akaukanda, akatengeneza mikate huku akimtazama, akaioka. 9Kisha akachukua kikaango, akampakulia mikate mbele yake, lakini akakataa kula. Amnoni akasema, “Watoeni watu wote humu,” nao wote wakatoka. 10Kisha Amnoni akamwambia Tamari, “Lete chakula humu chumbani mwangu, nami nitakula kutoka mkononi mwako.” Basi Tamari akaichukua mikate aliyoitengeneza, akamletea ndugu yake Amnoni chumbani. 11Lakini alipomsogezea ili ale, akamshika kwa nguvu akamwambia, “Njoo ulale nami, dada yangu.” 12Akamwambia, “Hapana, ndugu yangu! Usinichafue! Jambo kama hili halitendwi katika Israeli. Usitende uovu huu wa aibu. 13Mimi ningeenda wapi na aibu yangu? Nawe ungehesabiwa miongoni mwa wapumbavu waovu kabisa katika Israeli. Sasa tafadhali, sema na mfalme. Hatakunyima mimi.” 14Lakini hakutaka kumsikiliza. Kwa kuwa alikuwa na nguvu kuliko yeye, akamchafua, akalala naye kwa nguvu. 15Kisha Amnoni akamgeukia kwa chuki kali. Chuki aliyokuwa nayo juu yake sasa ilizidi upendo aliokuwa nao kwake hapo kwanza. Amnoni akamwambia, “Inuka uende zako!” 16Akamwambia, “Hapana! Kunifukuza kungekuwa uovu mkubwa zaidi kuliko ule ulionitendea tayari.” Lakini hakutaka kumsikiliza. 17Akamwita kijana aliyemtumikia, akasema, “Mtoe mwanamke huyu chumbani mwangu, ufunge mlango kwa komeo nyuma yake.” 18Alikuwa amevaa joho refu lenye mikono mirefu, aina ya joho walilovaa binti za mfalme ambao hawakuwa wameolewa. Mtumishi wake akamtoa nje, akafunga mlango kwa komeo nyuma yake. 19Tamari akajitia majivu kichwani, akalirarua lile joho refu lenye mikono mirefu alilokuwa amevaa. Akaweka mkono wake kichwani, akaenda zake akilia kwa sauti kuu. 20Absalomu, ndugu yake, akamwuliza, “Je, ndugu yako Amnoni amekuwa pamoja nawe? Sasa, dada yangu, nyamaza. Yeye ni ndugu yako. Usilitie jambo hili moyoni.” Basi Tamari akakaa nyumbani kwa ndugu yake Absalomu, mwanamke mkiwa. 21Mfalme Daudi aliposikia habari za mambo hayo yote, alikasirika sana. 22Absalomu hakumwambia Amnoni neno lolote, jema wala baya. Alimchukia Amnoni kwa sababu alikuwa amemchafua dada yake Tamari.

23Miaka miwili kamili baadaye, Absalomu alikuwa na watu wakikata manyoya ya kondoo wake huko Baal-hazori, karibu na Efraimu, naye akawaalika wana wote wa mfalme. 24Absalomu akaja kwa mfalme akasema, “Mtumishi wako ana watu wanaokata manyoya ya kondoo. Tafadhali mfalme na maafisa wake waje pamoja na mtumishi wako.” 25Mfalme akamwambia Absalomu, “Hapana, mwanangu. Tusiende sote; tungekuwa mzigo kwako tu.” Absalomu akamsisitiza, lakini hakukubali kwenda, ingawa alimpa baraka zake. 26Ndipo Absalomu akasema, “Ikiwa wewe hutakuja, basi tafadhali mwache ndugu yangu Amnoni aende pamoja nasi.” Mfalme akamwuliza, “Kwa nini aende pamoja nawe?” 27Lakini Absalomu akaendelea kumsisitiza, basi akawaruhusu Amnoni na wana wote wa mfalme waende pamoja naye.

28Absalomu akawapa watumishi wake amri hii: “Angalieni kwa makini. Amnoni atakapochangamka kwa divai, nami nikawaambia, ‘Mpigeni Amnoni,’ basi mwueni. Msiogope. Je, si mimi mwenyewe niliyewapa amri? Kuweni hodari, mwe watu jasiri.” 29Basi watumishi wa Absalomu wakamtendea Amnoni sawasawa na alivyoamuru Absalomu. Ndipo wana wote wa mfalme wakainuka, wakapanda nyumbu wao, wakakimbia. 30Walipokuwa bado njiani, habari ikamfikia Daudi: “Absalomu amewaua wana wote wa mfalme; hakuna hata mmoja wao aliyesalia!”

31Mfalme akainuka, akararua mavazi yake, akalala chini. Maafisa wake wote wakasimama karibu naye, mavazi yao yakiwa yameraruliwa.

32Lakini Yonadabu mwana wa Shimea, ndugu wa Daudi, akasema, “Bwana wangu asidhani kwamba wamewaua vijana wote, wana wa mfalme. Amnoni peke yake ndiye aliyekufa. Absalomu ameazimia kufanya hivi tangu siku ile Amnoni alipomchafua dada yake Tamari. 33Kwa hiyo sasa, bwana wangu mfalme asiitie moyoni habari kwamba wana wote wa mfalme wamekufa. Amnoni peke yake ndiye aliyekufa.”

34Wakati huo Absalomu alikimbia. Kijana aliyekuwa mlinzi akainua macho, akaona watu wengi wakija kwa njia iliyokuwa nyuma yake, wakishuka kando ya kilima. 35Yonadabu akamwambia mfalme, “Tazama, wana wa mfalme wamefika! Imetokea sawasawa na mtumishi wako alivyosema.” 36Alikuwa hajamaliza kusema, wana wa mfalme wakaingia wakilia kwa sauti. Mfalme na maafisa wake wote nao wakalia kwa uchungu mwingi. 37Absalomu alikimbia, akaenda kwa Talmai mwana wa Amihudi, mfalme wa Geshuri. Daudi akamwombolezea mwanawe siku baada ya siku. 38Basi Absalomu alikimbia akaenda Geshuri, akakaa huko miaka mitatu. 39Mfalme Daudi akatamani sana kwenda kwa Absalomu, kwa kuwa alikuwa amefarijika kuhusu kifo cha Amnoni.