2 Samweli 9

1Daudi akauliza, “Je, bado yuko mtu yeyote aliyebaki wa nyumba ya Sauli, ili nimtendee fadhili kwa ajili ya Yonathani?” 2Basi palikuwa na mtumishi wa nyumba ya Sauli aitwaye Siba, nao wakamwita aje kwa Daudi. Mfalme akamwambia, “Wewe ndiwe Siba?” Akajibu, “Mimi ni mtumishi wako.” 3Mfalme akauliza, “Je, hakuna aliyebaki wa nyumba ya Sauli, ambaye naweza kumtendea fadhili za Mungu?” Siba akamjibu mfalme, “Bado yupo mwana mmoja wa Yonathani. Amelemaa miguu yote miwili.” 4Mfalme akamwuliza, “Yuko wapi?” Siba akamjibu mfalme, “Yuko nyumbani kwa Makiri mwana wa Amieli, huko Lo-debari.” 5Basi mfalme Daudi alituma watu wakamleta kutoka nyumbani kwa Makiri mwana wa Amieli, huko Lo-debari. 6Mefiboshethi mwana wa Yonathani, mwana wa Sauli, alikuja kwa Daudi, akaanguka kifudifudi, akasujudu. Daudi akasema, “Mefiboshethi!” Akajibu, “Mimi hapa, mtumishi wako.” 7Daudi akamwambia, “Usiogope. Hakika nitakutendea fadhili kwa ajili ya baba yako Yonathani. Nitakurudishia ardhi yote iliyokuwa ya babu yako Sauli, nawe mwenyewe utakula mezani pangu daima.” 8Akasujudu tena, akasema, “Mtumishi wako ni nani, hata unijali mimi, mbwa mfu kama mimi?” 9Kisha mfalme akamwita Siba, mhudumu wa Sauli, akamwambia, “Nimempa mjukuu wa bwana wako kila kitu kilichokuwa cha Sauli na cha jamaa yake yote. 10Wewe, wana wako na watumishi wako mtamlimia ardhi hiyo na kuleta mavuno yake, ili mjukuu wa bwana wako apate chakula cha kula. Lakini Mefiboshethi mwenyewe, mjukuu wa bwana wako, atakula mezani pangu daima.” Siba alikuwa na wana kumi na watano na watumishi ishirini. 11Siba akamwambia mfalme, “Mtumishi wako atafanya kila kitu ambacho bwana wangu mfalme anamwamuru mtumishi wake.” Basi mfalme akasema, “Mefiboshethi atakula mezani pangu kama mmoja wa wana wa mfalme.” 12Mefiboshethi alikuwa na mwana mdogo aitwaye Mika. Watu wote walioishi katika nyumba ya Siba wakawa watumishi wa Mefiboshethi. 13Basi Mefiboshethi aliweka makao yake Yerusalemu, kwa sababu alikula mezani pa mfalme daima. Alikuwa kiwete wa miguu yote miwili.