2 Samweli 17

1Ahithofeli akamwambia Absalomu, “Niruhusu nichague watu elfu kumi na mbili, nami nitaondoka nimfuatie Daudi usiku huu. 2Nitamshambulia akiwa amechoka na kukata tamaa, nimtie hofu kuu. Watu wote walio pamoja naye watakimbia, nami nitampiga mfalme peke yake. 3Ndipo nitawarudisha watu wote kwako. Mtu yule unayemtafuta ni sawa na kurudi kwa wote. Watu wote watakuwa na amani.” 4Mpango huo ukaonekana mzuri kwa Absalomu na kwa wazee wote wa Israeli.

5Lakini Absalomu akasema, “Mwiteni na Hushai Mwarki, tusikie atakalosema yeye pia.” 6Hushai alipofika kwa Absalomu, Absalomu akamwambia, “Hivi ndivyo Ahithofeli alivyoshauri. Je, tufanye kama asemavyo? Kama sivyo, tuambie unavyoona wewe.”

7Hushai akamjibu Absalomu, “Wakati huu ushauri aliotoa Ahithofeli si mzuri.” 8Hushai akaendelea, “Unamjua baba yako na watu wake. Ni mashujaa, tena wana hasira kali kama dubu wa porini aliyenyang’anywa watoto wake. Baba yako ni mpiganaji mzoefu, naye hatalala usiku pamoja na askari. 9Hata sasa amejificha katika mojawapo ya mapango au mahali pengine. Baadhi ya askari watakapoanguka katika shambulio la kwanza, yeyote atakayesikia habari atasema, ‘Askari wanaomfuata Absalomu wameuawa kwa wingi.’ 10Ndipo hata mtu shujaa kuliko wote, mwenye moyo kama wa simba, atakata tamaa kabisa, kwa maana Israeli wote wanajua kwamba baba yako ni mpiganaji, na kwamba watu walio pamoja naye ni hodari. 11Kwa hiyo ushauri wangu ni huu: Israeli wote wakusanywe kwako, tangu Dani mpaka Beer-sheba, wengi kama mchanga wa pwani, nawe mwenyewe uwaongoze vitani. 12Kisha tutamshambulia popote atakapopatikana, na kumshukia kama umande unavyoanguka juu ya ardhi. Hatabaki yeye wala yeyote wa watu walio pamoja naye, hata mmoja. 13Akijificha ndani ya mji, Israeli wote wataleta kamba kwenye mji huo, nasi tutauburuta mji wote mpaka bondeni hata kisibaki huko hata kijiwe kimoja.”

14Ndipo Absalomu na watu wote wa Israeli wakasema, “Ushauri wa Hushai Mwarki ni bora kuliko ule wa Ahithofeli.” Kwa maana BWANA alikuwa ameamua kwamba ushauri mzuri wa Ahithofeli ubatilishwe, ili BWANA amletee Absalomu maafa.

15Hushai akawaambia Sadoki na Abiathari makuhani, “Ahithofeli alimshauri Absalomu na wazee wa Israeli wafanye hivi na hivi, lakini mimi nimeshauri hivi na hivi. 16Sasa tumeni ujumbe upesi mkamwambie Daudi, ‘Usipige kambi usiku huu katika nyanda zilizo kando ya nyika. Vuka bila kukosa, la sivyo mfalme na watu wote walio pamoja naye wataangamizwa.’” 17Yonathani na Ahimaasi walikuwa wakingoja huko En-rogeli. Mjakazi mmoja angekwenda kuwapa habari, nao wangekwenda kumwambia Mfalme Daudi, kwa sababu hawangeweza kuthubutu kuonekana wakiingia mjini. 18Lakini kijana mmoja akawaona, akamwambia Absalomu. Basi wale wawili wakaondoka upesi, wakaenda Bahurimu nyumbani kwa mtu mmoja aliyekuwa na kisima uani mwake, nao wakashuka ndani yake. 19Mwanamke wa nyumba ile akachukua kifuniko, akakitandaza juu ya mdomo wa kisima, akaanika nafaka juu yake, hata hakuna kilichoweza kuonekana. 20Watumishi wa Absalomu walipofika nyumbani wakamwuliza yule mwanamke, “Ahimaasi na Yonathani wako wapi?” Yule mwanamke akawaambia, “Wamevuka kijito.” Wakawatafuta lakini hawakuwapata, basi wakarudi Yerusalemu.

21Watu wale walipokwisha kuondoka, wale wawili wakapanda kutoka kisimani, wakaenda kumwambia Mfalme Daudi. Wakamwambia Daudi, “Inuka uvuke maji mara moja, kwa maana hivi ndivyo Ahithofeli alivyoshauri dhidi yako.” 22Basi Daudi na watu wote waliokuwa pamoja naye wakaondoka, wakavuka Yordani. Kufikia mapambazuko hakubaki hata mmoja ambaye hakuwa amevuka Yordani. 23Ahithofeli alipoona kwamba ushauri wake haukufuatwa, akamtandika punda wake, akaondoka kwenda nyumbani, katika mji wake mwenyewe. Akaiweka nyumba yake katika utaratibu, kisha akajinyonga. Hivyo akafa, wakamzika katika kaburi la baba yake.

24Daudi alikuwa amekwisha kufika Mahanaimu wakati Absalomu alipovuka Yordani pamoja na watu wote wa Israeli. 25Absalomu alikuwa amemweka Amasa kuwa mkuu wa jeshi badala ya Yoabu. Baba yake Amasa alikuwa mtu aitwaye Yithra Mwisraeli, aliyekuwa amelala na Abigaili binti Nahashi, dada wa Seruya, mama yake Yoabu. 26Israeli na Absalomu wakapiga kambi katika nchi ya Gileadi.

27Daudi alipofika Mahanaimu, Shobi mwana wa Nahashi kutoka Raba ya Waamoni, Makiri mwana wa Amieli kutoka Lo-debari, na Barzilai Mgileadi kutoka Rogelimu 28wakaleta vitanda, mabakuli na vyungu vya udongo, ngano na shayiri, unga na bisi, maharagwe na dengu, 29asali na maziwa mgando, kondoo, na jibini ya ng’ombe, ili viwe chakula cha Daudi na watu waliokuwa pamoja naye. Walisema, “Watu wamepatwa na njaa, uchovu na kiu huko nyikani.”