2 Samweli 10

1Baada ya hayo, mfalme wa Waamoni alikufa, na mwanawe Hanuni akawa mfalme mahali pake. 2Daudi akasema, “Nitamtendea Hanuni mwana wa Nahashi fadhili, kama baba yake alivyonitendea fadhili.” Basi Daudi alituma maafisa wake kumfariji Hanuni kwa kifo cha baba yake. Maafisa wa Daudi wakafika katika nchi ya Waamoni. 3Lakini maafisa wa Waamoni wakamwambia Hanuni bwana wao, “Je, kweli unadhani Daudi anamheshimu baba yako kwa kukutumia watu wa kukufariji? Je, Daudi hakuwatuma maafisa wake kwako ili wauchunguze mji, waupeleleze, na kuuangamiza?” 4Basi Hanuni aliwakamata maafisa wa Daudi, akamnyoa kila mmoja nusu ya ndevu zake, akayakata mavazi yao katikati hadi matakoni, akawaacha waende. 5Daudi alipoambiwa, alituma wajumbe kuwalaki, kwa sababu watu hao waliona aibu kubwa. Mfalme akasema, “Kaeni Yeriko mpaka ndevu zenu zitakapoota tena, kisha mrudi nyumbani.” 6Waamoni walipoona kwamba wamejifanya kuwa chukizo kwa Daudi, walituma watu wakaajiri askari wa miguu 20,000 kutoka kwa Waaramu wa Beth-rehobu na wa Soba, mfalme wa Maaka pamoja na watu 1,000, na watu 12,000 kutoka Tobu. 7Daudi aliposikia habari hiyo, alimtuma Yoabu pamoja na jeshi lote la mashujaa. 8Waamoni walitoka wakajipanga kwa vita kwenye lango la mji wao, huku Waaramu wa Soba na wa Rehobu, pamoja na watu wa Tobu na Maaka, wakijipanga peke yao mbugani. 9Yoabu aliona kwamba safu za vita zinamkabili mbele na nyuma. Basi akachagua baadhi ya askari bora wa Israeli, akawapanga kukabiliana na Waaramu. 10Askari waliobaki aliwaweka chini ya amri ya ndugu yake Abishai, naye akawapanga kukabiliana na Waamoni. 11Yoabu akasema, “Ikiwa Waaramu watanizidi nguvu, lazima uje kuniokoa. Lakini ikiwa Waamoni watakuzidi nguvu, nitakuja kukuokoa. 12Uwe hodari! Tuonyeshe ujasiri kwa ajili ya watu wetu na miji ya Mungu wetu. Na BWANA na afanye lile analoona kuwa jema.” 13Kisha Yoabu na askari waliokuwa pamoja naye wakasonga mbele kupigana na Waaramu, na Waaramu wakamkimbia. 14Waamoni walipoona Waaramu wakikimbia, wao pia wakamkimbia Abishai, wakaingia mjini. Kisha Yoabu akaacha kupigana na Waamoni, akarudi Yerusalemu. 15Waaramu walipoona kwamba wameshindwa na Israeli, walikusanya majeshi yao pamoja. 16Hadadezeri alituma watu wakawaleta Waaramu waliokuwa ng’ambo ya mto Frati. Wakafika Helamu, naye Shobaki, mkuu wa jeshi la Hadadezeri, akawaongoza. 17Daudi alipoambiwa, aliwakusanya Israeli wote, akavuka Yordani, akafika Helamu. Waaramu wakajipanga kwa vita dhidi ya Daudi, wakapigana naye. 18Lakini Waaramu walikimbia mbele ya Israeli, naye Daudi akaua watu wa magari yao ya vita 700 na wapanda farasi 40,000. Akampiga pia Shobaki, mkuu wa jeshi lao, naye akafa huko. 19Wafalme wote waliokuwa chini ya Hadadezeri walipoona kwamba Israeli wamewashinda, walifanya amani na Israeli, wakawa chini yao. Tangu hapo Waaramu waliogopa kuwasaidia Waamoni tena.