2 Samweli 20

1Basi mtu mmoja asiyefaa kitu aitwaye Sheba mwana wa Bikri, Mbenyamini, alikuwepo huko. Akapiga tarumbeta akapaza sauti, “Hatuna sehemu katika Daudi, wala urithi katika mwana wa Yese! Kila mtu hemani kwake, Israeli!” 2Basi watu wote wa Israeli wakamwacha Daudi wakamfuata Sheba mwana wa Bikri. Lakini watu wa Yuda wakakaa karibu na mfalme wao njia yote tangu Yordani mpaka Yerusalemu. 3Daudi aliporudi ikulu yake huko Yerusalemu, mfalme akawachukua wale masuria kumi aliowaacha kuitunza ikulu, akawaweka chini ya ulinzi katika nyumba moja. Akawapa mahitaji yao, lakini hakulala nao. Wakakaa wamefungiwa mpaka siku walipokufa, wakiishi kama wajane ingawa mume wao alikuwa hai.

4Mfalme akamwambia Amasa, “Waite watu wa Yuda waje kwangu katika muda wa siku tatu, nawe mwenyewe uwe hapa.” 5Amasa akaenda kuwaita watu wa Yuda, lakini akachelewa kupita muda ambao mfalme alikuwa amempangia.

6Daudi akamwambia Abishai, “Sasa Sheba mwana wa Bikri atatudhuru kuliko Absalomu alivyotudhuru. Chukua watumishi wa bwana wako umfuatie, la sivyo atajipatia miji yenye ngome atuponyoke.” 7Basi watu wa Yoabu wakatoka wakimfuata Abishai, pamoja na Wakerethi, Wapelethi na mashujaa wote. Wakaondoka Yerusalemu kumfuatia Sheba mwana wa Bikri. 8Walipokuwa kwenye jiwe kubwa la Gibeoni, Amasa akaja kuwalaki. Yoabu alikuwa amevaa kanzu yake ya kijeshi, na juu yake alikuwa amejifunga kiunoni mshipi wenye upanga ndani ya ala yake. Alipopiga hatua mbele, upanga ukaanguka.

9Yoabu akamwambia Amasa, “Hujambo, ndugu yangu?” Kisha Yoabu akashika ndevu za Amasa kwa mkono wake wa kuume ili ambusu. 10Amasa hakujihadhari na upanga uliokuwa mkononi mwa Yoabu, naye Yoabu akamchoma tumboni nao, matumbo yake yakamwagika chini. Hakuhitaji kumpiga mara ya pili, naye Amasa akafa. Kisha Yoabu na ndugu yake Abishai wakaendelea kumfuatia Sheba mwana wa Bikri. 11Mmoja wa vijana wa Yoabu akasimama kando ya maiti ya Amasa akasema, “Yeyote anayemkubali Yoabu, na yeyote aliye upande wa Daudi, amfuate Yoabu!” 12Amasa alikuwa amelala katika dimbwi la damu yake mwenyewe katikati ya barabara. Yule mtu alipoona kwamba askari wote walikuwa wakisimama, akamburuta Amasa kutoka barabarani mpaka shambani, akamtupia joho juu yake, kwa sababu aliona kwamba kila aliyepita karibu naye alisimama. 13Amasa alipokwisha kuondolewa barabarani, watu wote wakaendelea kumfuata Yoabu kumfuatia Sheba mwana wa Bikri. 14Sheba akapita katika makabila yote ya Israeli mpaka Abeli-beth-maaka. Waberi wote wakakusanyika, wakamfuata huko pia. 15Majeshi ya Yoabu yakaja yakamzingira Sheba huko Abeli-beth-maaka. Wakarundika boma la kuzingira mji, nalo likasimama dhidi ya ukuta wa nje. Askari wote waliokuwa pamoja na Yoabu walikuwa wakiugonga ukuta ili kuubomoa. 16Ndipo mwanamke mmoja mwenye hekima akaita kutoka mjini, “Sikilizeni! Sikilizeni! Tafadhali mwambieni Yoabu, ‘Njoo hapa ili niseme nawe.’” 17Akamkaribia, na yule mwanamke akauliza, “Je, wewe ndiwe Yoabu?” Akajibu, “Ndiye mimi.” Akamwambia, “Sikiliza mtumishi wako anachotaka kusema.” Akajibu, “Ninasikiliza.” 18Akaendelea, “Zamani watu walikuwa wakisema, ‘Nenda ukaulize huko Abeli,’ na hivyo ndivyo walivyomaliza mambo. 19Mimi ni mmoja wa watu wapenda amani na waaminifu katika Israeli. Wewe unataka kuangamiza mji ulio mama katika Israeli. Kwa nini uumeze urithi wa BWANA?”

20Yoabu akajibu, “Mbali nami, mbali kabisa, kwamba nimeze au niangamize! 21Mambo si hivyo. Mtu mmoja wa nchi ya milima ya Efraimu aitwaye Sheba mwana wa Bikri ameinua mkono wake dhidi ya mfalme, dhidi ya Daudi. Mtoeni yeye peke yake, nami nitaondoka kuuacha mji.” Yule mwanamke akamwambia Yoabu, “Utaona: kichwa chake kitatupwa kwako juu ya ukuta.” 22Kisha yule mwanamke akaenda kwa watu wote na ushauri wake wa hekima, nao wakamkata kichwa Sheba mwana wa Bikri, wakamtupia Yoabu. Basi Yoabu akapiga tarumbeta, na watu wake wakaondoka mjini wakatawanyika, kila mtu nyumbani kwake. Yoabu akarudi kwa mfalme huko Yerusalemu.

23Yoabu alikuwa mkuu wa jeshi lote la Israeli; Benaya mwana wa Yehoyada alikuwa juu ya Wakerethi na Wapelethi; 24Adoramu alikuwa msimamizi wa kazi ya kulazimishwa; Yehoshafati mwana wa Ahiludi alikuwa mwandishi wa kumbukumbu; 25Sheva alikuwa katibu; Sadoki na Abiathari walikuwa makuhani; 26na Ira Myairi naye alikuwa kuhani wa Daudi.