2 Samweli 23

1Haya ndiyo maneno ya mwisho ya Daudi: tamko la Daudi mwana wa Yese, tamko la mtu aliyeinuliwa juu, yule aliyepakwa mafuta na Mungu wa Yakobo, mwimbaji mtamu wa nyimbo za Israeli. 2Roho wa BWANA amesema kupitia kwangu; neno lake liko ulimini mwangu. 3Mungu wa Israeli amesema; Mwamba wa Israeli ameniambia: “Yeye atawalaye watu kwa haki, atawalaye katika kumcha Mungu, 4ni kama nuru ya asubuhi jua linapochomoza, asubuhi isiyo na mawingu, kama mng’ao baada ya mvua unaochipusha majani kutoka ardhini.” 5Je, nyumba yangu si hivyo mbele za Mungu? Kwa maana amefanya nami agano la milele, lililopangwa vizuri kila upande na kuwekwa salama. Wokovu wangu wote na kila ninalotamani, je, hatayakuza? 6Lakini wasiofaa kitu wote ni kama miiba inayotupwa kando, kwa maana hakuna anayeiokota kwa mkono. 7Yeyote anayeigusa lazima awe na chuma au mpini wa mkuki, nayo huteketezwa kabisa kwa moto pale ilipo.

8Haya ndiyo majina ya mashujaa wa Daudi. Yosheb-bashebethi Mtakemoni alikuwa mkuu wa maafisa. Aliitwa pia Adino Mwesni, naye aliwaua watu mia nane wakati mmoja.

9Aliyefuata baada yake alikuwa Eleazari mwana wa Dodo Mwahohi. Yeye alikuwa mmoja wa mashujaa watatu waliokuwa pamoja na Daudi walipowatukana Wafilisti waliokuwa wamekusanyika huko kwa vita, nao watu wa Israeli wakarudi nyuma. 10Akasimama imara, akawapiga Wafilisti mpaka mkono wake ukachoka na kugandamana na upanga wake. Siku ile BWANA alileta ushindi mkuu, na askari wakarudi kwake ili kuwavua wafu tu.

11Aliyefuata baada yake alikuwa Shama mwana wa Age Mharari. Wafilisti walikuwa wamekusanyika kikosi mahali palipokuwa na kipande cha shamba kilichojaa dengu, na askari wakawakimbia Wafilisti. 12Lakini yeye akasimama imara katikati ya shamba hilo, akalilinda, akawapiga Wafilisti, na BWANA akaleta ushindi mkuu.

13Wakati mmoja, wakati wa mavuno, wakuu watatu wa wale Thelathini walishuka wakajiunga na Daudi kwenye pango la Adulamu, wakati kikosi cha Wafilisti kilipokuwa kimepiga kambi katika Bonde la Refaimu. 14Wakati huo Daudi alikuwa ngomeni, na kikosi cha askari wa Kifilisti kilikuwa Bethlehemu. 15Daudi akatamani akasema, “Laiti mtu angeniletea maji ya kunywa kutoka kisima cha Bethlehemu, kile kilicho karibu na lango!” 16Basi wale mashujaa watatu wakapenya kambi ya Wafilisti, wakateka maji kutoka kisima cha Bethlehemu kilichokuwa karibu na lango, wakamletea Daudi. Lakini hakukubali kuyanywa. Badala yake akayamimina kuwa sadaka kwa BWANA. 17Akasema, “Ee BWANA, mbali nami kufanya hivi! Je, haya si damu ya watu waliokwenda kwa kuhatarisha maisha yao?” Kwa hiyo hakukubali kuyanywa. Hayo ndiyo matendo ya wale mashujaa watatu.

18Abishai, ndugu wa Yoabu mwana wa Seruya, alikuwa mkuu wa wale Watatu. Aliuinua mkuki wake dhidi ya watu mia tatu akawaua, akapata jina pamoja na wale Watatu. 19Je, hakuheshimiwa kuliko wale Watatu? Akawa kamanda wao, lakini hakufikia cheo cha wale Watatu.

20Benaya mwana wa Yehoyada alikuwa mwana wa mtu shujaa wa Kabseeli aliyefanya matendo makuu. Aliwaua mashujaa wawili wa Moabu. Pia alishuka ndani ya shimo siku ya theluji akamwua simba. 21Pia alimwua Mmisri mmoja, mtu wa umbo la kutisha. Mmisri huyo alikuwa na mkuki mkononi, lakini Benaya akamwendea na rungu, akaunyakua mkuki kutoka mkononi mwa Mmisri, akamwua kwa silaha yake mwenyewe. 22Hayo ndiyo matendo ya Benaya mwana wa Yehoyada, naye akapata jina pamoja na wale mashujaa watatu. 23Aliheshimiwa kuliko wale Thelathini, lakini hakufikia cheo cha wale Watatu. Naye Daudi akamweka kuwa mkuu wa walinzi wake.

24Miongoni mwa wale Thelathini walikuwa Asaheli ndugu wa Yoabu, Elhanani mwana wa Dodo wa Bethlehemu, 25Shama Mharodi, Elika Mharodi,

26Helesi Mpalti, Ira mwana wa Ikeshi Mtekoa,

27Abiezeri Mwanathothi, Mebunai Mhushathi,

28Salmoni Mwahohi, Maharai Mnetofathi,

29Helebu mwana wa Baana Mnetofathi, Itai mwana wa Ribai kutoka Gibea ya Wabenyamini,

30Benaya Mpirathoni, Hidai wa mabonde ya Gaashi,

31Abi-alboni Mwarbathi, Azmawethi Mbarhumi,

32Eliaba Mshaalboni, wana wa Yasheni, Yonathani,

33Shama Mharari, Ahiamu mwana wa Sharari Mharari,

34Elifeleti mwana wa Ahasbai Mmaakathi, Eliamu mwana wa Ahithofeli Mgiloni,

35Hesrai Mkarmeli, Paarai Mwarbi,

36Igali mwana wa Nathani kutoka Soba, Bani Mgadi,

37Seleki Mwamoni, Naharai Mbeerothi, mbeba silaha wa Yoabu mwana wa Seruya,

38Ira Mwithri, Garebu Mwithri,

39na Uria Mhiti: watu thelathini na saba kwa jumla.