2 Samweli 5

1Kisha makabila yote ya Israeli walikuja kwa Daudi huko Hebroni. Wakamwambia, “Tazama, sisi ni mfupa wako na nyama yako mwenyewe. 2Hapo zamani, hata Sauli alipokuwa akitawala juu yetu, wewe ndiwe uliyewaongoza Israeli kwenda vitani na kuwarudisha. Naye BWANA alikuambia, ‘Wewe ndiwe utakayewachunga watu wangu Israeli; utakuwa kiongozi juu ya Israeli.’” 3Wazee wote wa Israeli walipokuwa wamefika kwa mfalme huko Hebroni, mfalme Daudi alifanya agano nao huko mbele za BWANA, nao wakampaka Daudi mafuta awe mfalme juu ya Israeli.

4Daudi alikuwa na umri wa miaka thelathini alipoanza kutawala, naye akatawala miaka arobaini. 5Huko Hebroni alitawala juu ya Yuda kwa miaka saba na miezi sita, na huko Yerusalemu alitawala juu ya Israeli wote na Yuda kwa miaka thelathini na mitatu. 6Kisha mfalme na watu wake walikwenda Yerusalemu kuwashambulia Wayebusi waliokaa katika nchi ile. Wakamwambia Daudi, “Hutaingia humu; hata vipofu na viwete wanaweza kukuzuia.” Walimaanisha, “Daudi hawezi kuingia humu.” 7Lakini Daudi aliiteka ngome ya Sayuni, ambayo sasa ni mji wa Daudi. 8Siku ile Daudi alisema, “Yeyote atakayewashinda Wayebusi lazima apande kupitia mfereji wa maji ili awafikie hao viwete na vipofu, ambao Daudi anawachukia.” Ndiyo sababu watu husema, “Vipofu na viwete hawataingia nyumbani.” 9Daudi alifanya makao yake katika ngome hiyo, akaiita mji wa Daudi. Akajenga eneo lililoizunguka, kuanzia Milo kuelekea ndani. 10Daudi alizidi kuwa mkuu zaidi na zaidi, kwa maana BWANA, Mungu wa majeshi, alikuwa pamoja naye.

11Hiramu mfalme wa Tiro alituma wajumbe kwa Daudi, pamoja na magogo ya mierezi, mafundi seremala na mafundi wa mawe, nao wakamjengea Daudi jumba la kifalme. 12Ndipo Daudi akajua kwamba BWANA amemwimarisha kuwa mfalme juu ya Israeli, na ameuinua juu ufalme wake kwa ajili ya watu wake Israeli.

13Daudi alichukua masuria na wake wengine kutoka Yerusalemu baada ya kuondoka Hebroni, na wana na binti wengine wakazaliwa kwake. 14Majina ya watoto waliozaliwa kwake huko Yerusalemu ni haya: Shamua, Shobabu, Nathani, Sulemani, 15Ibhari, Elishua, Nefegi, Yafia, 16Elishama, Eliada na Elifeleti.

17Habari zilipowafikia Wafilisti kwamba Daudi amepakwa mafuta kuwa mfalme juu ya Israeli, jeshi lote la Wafilisti likapanda kumsaka. Lakini Daudi akasikia habari hiyo, akashuka kwenda ngomeni. 18Basi Wafilisti walikuwa wamekuja wakaenea katika Bonde la Warefai. 19Basi Daudi akamwuliza BWANA, “Je, nipande kupigana na Wafilisti? Je, utawatia mikononi mwangu?” BWANA akamjibu Daudi, “Panda, kwa maana hakika nitawatia Wafilisti mikononi mwako.” 20Basi Daudi alikwenda Baal-perasimu akawashinda huko. Akasema, “BWANA amewavunja adui zangu mbele yangu, kama maji yanavyobomoa kingo.” Ndiyo sababu mahali pale paliitwa Baal-perasimu. 21Wafilisti waliziacha sanamu za miungu yao huko, naye Daudi na watu wake wakazichukua.

22Kwa mara nyingine Wafilisti walipanda wakaenea katika Bonde la Warefai. 23Daudi alipomwuliza BWANA, alimjibu, “Usipande moja kwa moja. Zunguka nyuma yao, uwashambulie ukitokea upande wa miti ya balsamu. 24Mara utakaposikia sauti ya watu wanaotembea juu ya vilele vya miti ya balsamu, fanya haraka, kwa maana hiyo itamaanisha kwamba BWANA ametoka akutangulie kulishinda jeshi la Wafilisti.” 25Daudi alifanya kama vile BWANA alivyomwamuru, akawapiga Wafilisti njia yote kutoka Geba mpaka Gezeri.