2 Samweli 15

1Baada ya muda, Absalomu alijipatia gari la vita na farasi, pamoja na watu hamsini wa kukimbia mbele yake. 2Absalomu alikuwa akiamka mapema na kusimama kando ya njia iliyoelekea lango la mji. Kila mtu aliyekuwa na shauri la kumletea mfalme ili alihukumu, Absalomu alimwita na kumwuliza, “Wewe ni wa mji gani?” Naye angejibu, “Mtumishi wako ni wa kabila fulani la Israeli.” 3Absalomu angemwambia, “Tazama, madai yako ni mazuri na ya haki, lakini hakuna mtu wa mfalme wa kusikiliza shauri lako.” 4Absalomu angesema pia, “Laiti mtu angenifanya mwamuzi katika nchi hii! Ndipo kila mtu mwenye shauri au madai angeweza kuja kwangu, nami ningehakikisha anapata haki.” 5Kila mtu alipomkaribia ili kumsujudia, Absalomu alinyosha mkono wake, akamshika mtu huyo na kumbusu. 6Absalomu aliwatendea hivyo Waisraeli wote waliokuja kwa mfalme ili wapate hukumu. Kwa njia hiyo Absalomu akaiba mioyo ya watu wa Israeli.

7Miaka arobaini ilipokwisha, Absalomu alimwambia mfalme, “Tafadhali niruhusu niende Hebroni nikatimize nadhiri niliyomwekea BWANA. 8Kwa maana mtumishi wako aliweka nadhiri nilipokuwa nikiishi Geshuri katika Aramu. Nilisema, ‘Ikiwa BWANA atanirudisha kweli Yerusalemu, nitamwabudu BWANA.’” 9Mfalme akamwambia, “Nenda kwa amani.” Basi akaondoka akaenda Hebroni.

10Wakati huo Absalomu alituma wajumbe wa siri katika makabila yote ya Israeli kusema, “Mara mtakaposikia sauti ya pembe ya kondoo dume, semeni, ‘Absalomu amekuwa mfalme huko Hebroni!’” 11Watu mia mbili kutoka Yerusalemu walikwenda pamoja na Absalomu. Walikuwa wamealikwa kama wageni, wakaenda bila hila yoyote, wasijue lolote kuhusu njama hiyo. 12Absalomu alipokuwa akitoa dhabihu, alituma pia kumwita Ahithofeli Mgiloni, mshauri wa Daudi, kutoka mji wake wa Gilo. Basi njama ikapata nguvu, na idadi ya watu waliomuunga mkono Absalomu ikazidi kuongezeka. 13Mjumbe akaja kwa Daudi akasema, “Mioyo ya watu wa Israeli imemgeukia Absalomu.” 14Ndipo Daudi akawaambia maafisa wake wote waliokuwa pamoja naye Yerusalemu, “Inukeni! Ni lazima tukimbie, la sivyo hakuna hata mmoja wetu atakayeokoka mkononi mwa Absalomu. Ondokeni mara moja, la sivyo atakuja upesi, atatukamata, atatuletea maafa na kuuangamiza mji kwa upanga.” 15Maafisa wa mfalme wakamwambia mfalme, “Lolote atakaloamua bwana wangu mfalme, watumishi wako tuko tayari.” 16Basi mfalme akaondoka, na watu wote wa nyumbani mwake wakamfuata. Lakini akawaacha masuria kumi ili kuitunza ikulu. 17Basi mfalme akatoka pamoja na watu wote wakimfuata, wakasimama kwenye nyumba ya mwisho. 18Maafisa wake wote wakapita mbele yake, pamoja na Wakerethi wote na Wapelethi wote. Na Wagiti wote, wale watu mia sita waliomfuata kutoka Gathi, wakapita mbele ya mfalme. 19Ndipo mfalme akamwambia Itai Mgiti, “Kwa nini wewe pia uje pamoja nasi? Rudi ukae na mfalme. Wewe ni mgeni, tena umehamishwa kutoka nchi yako mwenyewe. 20Ulikuja jana tu. Je, nikufanye utangetange pamoja nasi leo, wakati mimi mwenyewe sijui ninakokwenda? Rudi, uwachukue ndugu zako pamoja nawe. Fadhili na uaminifu viende pamoja nawe.” 21Lakini Itai akamjibu mfalme, “Kama BWANA aishivyo, na kwa uhai wa bwana wangu mfalme, mahali popote atakapokuwa bwana wangu mfalme, iwe ni kufa au kuishi, huko ndiko atakakokuwa mtumishi wako.” 22Daudi akamwambia Itai, “Basi nenda, endelea mbele.” Hivyo Itai Mgiti akaendelea mbele pamoja na watu wake wote na jamaa zote zilizokuwa pamoja naye. 23Watu wote wa nchi walilia kwa sauti kubwa watu walipokuwa wakipita. Mfalme akavuka bonde la Kidroni, na watu wote wakaendelea kuelekea njia ya nyikani. 24Sadoki naye alikuwepo, pamoja na Walawi wote wakilibeba sanduku la agano la Mungu. Wakaliweka chini sanduku la Mungu, na Abiathari akapanda, mpaka watu walipomaliza kutoka mjini. 25Ndipo mfalme akamwambia Sadoki, “Lirudishe sanduku la Mungu mjini. Nikipata kibali machoni pa BWANA, atanirudisha nyumbani, nami nitaliona tena sanduku na makao yake. 26Lakini akisema, ‘Sipendezwi nawe,’ basi niko hapa; na anitendee kama yeye aonavyo vema.”

27Mfalme akamwambia pia Sadoki kuhani, “Je, unaelewa? Rudi mjini kwa amani, uwachukue wana wenu wawili pamoja nanyi: mwanao Ahimaasi na Yonathani mwana wa Abiathari. 28Tazama, nitangoja kwenye vivuko vilivyo nyikani mpaka habari zije kutoka kwenu kunijulisha yanayotokea.” 29Basi Sadoki na Abiathari wakalirudisha sanduku la Mungu Yerusalemu, wakakaa huko. 30Daudi akapanda mteremko wa mlima wa Mizeituni, akilia alipokuwa akienda. Kichwa chake kilikuwa kimefunikwa, naye alitembea bila viatu. Watu wote waliokuwa pamoja naye nao wakafunika vichwa vyao, wakapanda wakilia walipokuwa wakipanda. 31Kisha Daudi akaambiwa, “Ahithofeli yumo miongoni mwa wale waliofanya njama pamoja na Absalomu.” Daudi akaomba, “Ee BWANA, tafadhali ugeuze ushauri wa Ahithofeli kuwa upumbavu.” 32Daudi alipofika kileleni, mahali ambapo Mungu aliabudiwa, Hushai Mwarki akaja kumlaki huko. Joho lake lilikuwa limeraruka, na alikuwa na udongo kichwani. 33Daudi akamwambia, “Ukiendelea pamoja nami, utanilemea tu. 34Lakini ukirudi mjini ukamwambia Absalomu, ‘Ee mfalme, nitakuwa mtumishi wako. Hapo kwanza nilikuwa mtumishi wa baba yako, lakini sasa nitakuwa wako,’ basi utaweza kunivunjia ushauri wa Ahithofeli. 35Sadoki na Abiathari makuhani watakuwa huko pamoja nawe, sivyo? Waambie kila kitu utakachosikia kutoka ikulu ya mfalme. 36Wana wao wawili wako huko pamoja nao, Ahimaasi mwana wa Sadoki na Yonathani mwana wa Abiathari. Watumeni kwangu na kila mtakalosikia.” 37Basi Hushai, rafiki wa Daudi, akaingia mjini wakati ule ule Absalomu alipokuwa akiingia Yerusalemu.