2 Samweli 12

1BWANA alimtuma Nathani kwa Daudi. Akaja kwake akamwambia, “Katika mji fulani walikuwepo watu wawili, mmoja wao tajiri na mwingine maskini. 2Yule tajiri alikuwa na kondoo na ng’ombe wengi mno. 3Lakini yule maskini hakuwa na chochote isipokuwa mwana-kondoo mmoja mdogo wa kike aliyekuwa amemnunua. Alimtunza, naye akakua pamoja naye na watoto wake. Alishiriki kipande chake cha mkate, akanywa katika kikombe chake na kulala mikononi mwake; alikuwa kwake kama binti. 4Kisha mgeni alifika kwa yule tajiri. Hakutaka kuchukua mmoja wa kondoo au ng’ombe wake mwenyewe ili kumwandalia mgeni aliyekuja kwake. Basi akamchukua mwana-kondoo wa yule maskini akamwandalia mgeni wake.” 5Hasira ya Daudi iliwaka sana dhidi ya mtu huyo. Akamwambia Nathani, “Kama BWANA aishivyo, mtu aliyefanya jambo hili anastahili kufa! 6Lazima alipe mara nne kwa ajili ya yule mwana-kondoo, kwa sababu alifanya jambo hili na kwa sababu hakuwa na huruma.” 7Nathani akamwambia Daudi, “Mtu huyo ni wewe! Hivi ndivyo BWANA, Mungu wa Israeli, asemavyo: ‘Nilikupaka mafuta uwe mfalme juu ya Israeli, nami nikakuokoa kutoka katika nguvu za Sauli. 8Nilikupa nyumba ya bwana wako, nikawaweka wake za bwana wako mikononi mwako. Nikakupa pia nyumba ya Israeli na Yuda. Na kama hayo yangekuwa machache, ningekupa mengi zaidi. 9Kwa nini umelidharau neno la BWANA kwa kufanya yaliyo mabaya machoni pangu? Umempiga Uria Mhiti kwa upanga, ukamtwaa mke wake awe mke wako. Umemwua kwa upanga wa Waamoni. 10Kwa hiyo sasa upanga hautaondoka kamwe katika nyumba yako, kwa sababu umenidharau mimi ukamtwaa mke wa Uria Mhiti kuwa mke wako.’

11Hivi ndivyo BWANA asemavyo: ‘Nitakuletea maafa kutoka ndani ya nyumba yako mwenyewe. Mbele ya macho yako nitawachukua wake zako na kumpa mtu aliye karibu nawe, naye atalala na wake zako mchana kweupe. 12Wewe ulifanya kwa siri, lakini mimi nitafanya jambo hili mbele ya Israeli wote, mchana kweupe.’”

13Daudi akamwambia Nathani, “Nimemtenda dhambi BWANA.” Nathani akamwambia Daudi, “BWANA ameiondoa dhambi yako. Hutakufa. 14Lakini kwa sababu kwa kufanya jambo hili umewapa adui za BWANA kila sababu ya kumdharau, mwana aliyezaliwa kwako hakika atakufa.” 15Baada ya Nathani kwenda nyumbani kwake, BWANA alimpiga mtoto ambaye mke wa Uria alimzalia Daudi, naye mtoto akaugua sana. 16Daudi alimsihi Mungu kwa ajili ya mtoto. Akafunga, akaingia ndani akakesha usiku akilala chini ardhini. 17Wazee wa nyumba yake walisimama kando yake ili wamwinue kutoka ardhini, lakini alikataa, wala hakula chakula pamoja nao. 18Mtoto alikufa siku ya saba, na watumishi wa Daudi waliogopa kumpa habari hiyo. Walisema, “Mtoto alipokuwa bado hai, tulizungumza naye, naye hakutusikiliza. Tutawezaje kumwambia kwamba mtoto amekufa? Huenda akafanya jambo la kudhuru.” 19Daudi alipowaona watumishi wake wakinong’onezana, alitambua kwamba mtoto amekufa. Basi akawauliza watumishi wake, “Je, mtoto amekufa?” Wakajibu, “Amekufa.” 20Kisha Daudi akainuka kutoka ardhini. Akaoga, akajipaka mafuta na kubadili mavazi yake. Akaingia katika nyumba ya BWANA akasujudu kuabudu. Baada ya hapo akaenda nyumbani kwake akaomba chakula, nao walipomwandalia, akala. 21Watumishi wake wakamwambia, “Ni nini hiki ulichofanya? Mtoto alipokuwa hai ulifunga na kumlilia, lakini sasa mtoto amekufa, unainuka na kula!” 22Akasema, “Mtoto alipokuwa bado hai, nilifunga na kulia. Niliwaza, ‘Ni nani ajuaye? Huenda BWANA akanihurumia na kumwacha mtoto aishi.’ 23Lakini sasa amekufa. Kwa nini niendelee kufunga? Je, ninaweza kumrudisha? Siku moja nitakwenda kwake, lakini yeye hatarudi kwangu.” 24Kisha Daudi akamfariji mke wake Bathsheba. Akaenda kwake akalala naye, naye akazaa mwana, akampa jina Sulemani. BWANA alimpenda, 25naye akatuma ujumbe kupitia Nathani nabii, naye akamwita Yedidia kwa ajili ya BWANA.

26Wakati huo Yoabu alipigana na Raba ya Waamoni, akauteka mji wa kifalme. 27Yoabu alituma wajumbe kumwambia Daudi, “Nimepigana na Raba, nami nimeteka chanzo cha maji cha mji. 28Sasa wakusanye askari waliobaki, upige kambi kuuzunguka mji na kuuteka. La sivyo nitauteka mji mimi mwenyewe, nao utaitwa kwa jina langu.” 29Basi Daudi aliwakusanya askari wote akaenda Raba. Akapigana nao akauteka. 30Alichukua taji kutoka kichwani mwa mfalme wao. Lilikuwa na uzito wa karibu kilo 34 ya dhahabu, na lilikuwa na jiwe la thamani, nalo likawekwa juu ya kichwa cha Daudi. Akatoa pia nyara nyingi sana kutoka mjini. 31Akawatoa watu waliokuwa mjini akawatumikisha kwa misumeno, sururu za chuma na mashoka ya chuma, akawafanyisha kazi kwenye viunzi vya matofali. Alifanya vivyo hivyo kwa miji yote ya Waamoni. Kisha Daudi na askari wote wakarudi Yerusalemu.