2 Samweli 19

1Yoabu akaambiwa, “Mfalme analia na kumwombolezea Absalomu.” 2Kwa hiyo ushindi wa siku ile ukageuka kuwa maombolezo kwa askari wote, kwa sababu askari walisikia watu wakisema siku ile, “Mfalme anaomboleza kwa ajili ya mwanawe.” 3Siku ile askari waliingia mjini kimya kimya, kama askari wanavyonyemelea wanapoona aibu kwa kuwa wamekimbia vitani. 4Mfalme akafunika uso wake, akalia kwa sauti kuu, “Mwanangu Absalomu! Absalomu, mwanangu, mwanangu!”

5Ndipo Yoabu akaingia nyumbani kwa mfalme akasema, “Leo umewaaibisha watumishi wako wote, ambao siku hii wameokoa uhai wako na uhai wa wana wako na binti zako, wa wake zako na wa masuria wako, 6kwa sababu unawapenda wanaokuchukia na kuwachukia wanaokupenda. Leo umeonyesha kwamba makamanda wako na watumishi wako si kitu kwako. Sasa najua kwamba kama sisi sote tungekufa leo na Absalomu angekuwa hai, ungeona ni sawa. 7Basi sasa inuka, utoke uwaambie watumishi wako maneno ya kuwatia moyo. Naapa kwa BWANA: usipotoka, hakuna hata mtu mmoja atakayebaki pamoja nawe usiku huu. Hayo yangekuwa maafa mabaya zaidi kwako kuliko yote yaliyokupata tangu ujana wako.”

8Basi mfalme akainuka akaketi langoni. Askari wote wakaambiwa, “Mfalme ameketi langoni,” nao wote wakaja mbele yake. Lakini Israeli walikuwa wamekimbia, kila mtu nyumbani kwake.

9Katika makabila yote ya Israeli watu walikuwa wakibishana wao kwa wao. Walisema, “Mfalme alituokoa kutoka katika nguvu za adui zetu. Alituokoa kutoka katika nguvu za Wafilisti. Lakini sasa amekimbia kutoka nchini kwa sababu ya Absalomu. 10Na Absalomu, tuliyempaka mafuta atutawale, amekufa vitani. Basi sasa, kwa nini hamsemi lolote kuhusu kumrudisha mfalme?”

11Mfalme Daudi akawatumia makuhani Sadoki na Abiathari ujumbe huu: “Waulizeni wazee wa Yuda, ‘Kwa nini ninyi muwe wa mwisho kabisa kumrudisha mfalme ikulu yake? Maneno ya Israeli wote yamemfikia mfalme nyumbani kwake. 12Ninyi ni ndugu zangu; ninyi ni mfupa wangu na nyama yangu. Basi kwa nini muwe wa mwisho kabisa kumrudisha mfalme?’ 13Na mwambieni Amasa, ‘Je, wewe si mfupa wangu na nyama yangu? Mungu anitendee hivyo, na kuzidi, ikiwa hutakuwa mkuu wa jeshi langu tangu sasa mahali pa Yoabu.’” 14Hivyo akaivuta mioyo ya watu wote wa Yuda, wakawa kama mtu mmoja, wakatuma ujumbe kwa mfalme: “Rudi, wewe na maafisa wako wote.” 15Basi mfalme akaanza kurudi, akafika mpaka Yordani. Watu wa Yuda walikuwa wamekuja Gilgali kumlaki mfalme na kumvusha Yordani. 16Shimei mwana wa Gera, Mbenyamini wa Bahurimu, akashuka upesi pamoja na watu wa Yuda kumlaki Mfalme Daudi. 17Pamoja naye walikuwa watu elfu moja wa Benyamini, na Siba mhudumu wa jamaa ya Sauli, pamoja na wanawe kumi na watano na watumishi wake ishirini. Wakashuka mbio mpaka Yordani kabla ya mfalme. 18Wakaendelea kuvuka huku na huku kwenye kivuko ili kuwavusha watu wa nyumba ya mfalme na kufanya lolote alilotaka. Mfalme alipokuwa karibu kuvuka Yordani, Shimei mwana wa Gera akaanguka mbele yake. 19Akamwambia mfalme, “Bwana wangu asinihesabie hatia. Usikumbuke kosa alilotenda mtumishi wako siku ile bwana wangu mfalme alipotoka Yerusalemu. Mfalme na aliondoe moyoni mwake. 20Mtumishi wako anajua kwamba nimetenda dhambi. Lakini tazama, leo nimekuja, wa kwanza katika nyumba yote ya Yusufu, kushuka kumlaki bwana wangu mfalme.”

21Abishai mwana wa Seruya akasema, “Je, Shimei hapaswi kuuawa kwa ajili ya hili? Alimlaani mfalme wa BWANA aliyempaka mafuta!”

22Daudi akasema, “Wana wa Seruya, jambo hili linawahusu nini ninyi? Kwa nini mnajifanya adui zangu leo? Je, mtu yeyote katika Israeli auawe siku hii? Je, sijui kwamba leo mimi ni mfalme juu ya Israeli?” 23Basi mfalme akamwambia Shimei, “Hutakufa.” Mfalme akamwapia.

24Mefiboshethi, mjukuu wa Sauli, naye akashuka kumlaki mfalme. Tangu siku mfalme alipoondoka mpaka siku aliyorudi salama, hakuwa ametunza miguu yake, wala kupunguza masharubu yake, wala kufua mavazi yake. 25Alipokuja kutoka Yerusalemu kumlaki mfalme, mfalme akamwuliza, “Kwa nini hukwenda pamoja nami, Mefiboshethi?” 26Akajibu, “Bwana wangu mfalme, mtumishi wangu alinidanganya. Mtumishi wako alisema, ‘Nitamtandikisha punda wangu ili nimpande niende pamoja na mfalme,’ kwa kuwa mtumishi wako ni kiwete. 27Amemwambia bwana wangu mfalme uongo kuhusu mtumishi wako. Lakini bwana wangu mfalme ni kama malaika wa Mungu, kwa hiyo fanya lolote unaloona ni jema. 28Jamaa yote ya baba yangu haikustahili kitu ila kifo kutoka kwa bwana wangu mfalme, lakini ulimpa mtumishi wako nafasi miongoni mwa wale wanaokula mezani pako. Basi nina haki gani ya kuendelea kumlalamikia mfalme?”

29Mfalme akamwambia, “Kwa nini uendelee kusema juu ya mambo yako? Nimeamua: wewe na Siba mtagawana ardhi.” 30Mefiboshethi akamwambia mfalme, “Na aichukue yote, kwa kuwa sasa bwana wangu mfalme amerudi nyumbani salama.”

31Barzilai Mgileadi naye alikuwa ameshuka kutoka Rogelimu, akavuka Yordani pamoja na mfalme ili kumsindikiza ng’ambo ya mto. 32Barzilai alikuwa mzee sana, mwenye umri wa miaka themanini. Alikuwa amemtimizia mfalme mahitaji yake alipokaa Mahanaimu, kwa kuwa alikuwa tajiri sana. 33Mfalme akamwambia Barzilai, “Vuka pamoja nami, nami nitakutunza huko Yerusalemu, karibu nami.” 34Lakini Barzilai akamjibu mfalme, “Nimebakiza miaka mingapi ya kuishi, hata nipande Yerusalemu pamoja na mfalme? 35Leo nina umri wa miaka themanini. Je, bado naweza kupambanua kinachopendeza na kisichopendeza? Je, mtumishi wako anaweza kuonja anachokula na kunywa? Je, bado naweza kusikia sauti za wanaume na wanawake wakiimba? Kwa nini mtumishi wako awe mzigo mwingine kwa bwana wangu mfalme? 36Mtumishi wako atakwenda mwendo mfupi tu ng’ambo ya Yordani pamoja na mfalme. Kwa nini mfalme anipe thawabu kama hii? 37Tafadhali mwache mtumishi wako arudi, nife katika mji wangu mwenyewe karibu na kaburi la baba yangu na mama yangu. Lakini huyu hapa mtumishi wako Kimhamu. Na avuke mto pamoja na bwana wangu mfalme, nawe umtendee lolote unaloona ni jema.”

38Mfalme akajibu, “Kimhamu atavuka pamoja nami, nami mwenyewe nitamtendea lolote unaloona ni jema. Na lolote utakaloniomba, nitakufanyia.” 39Basi watu wote wakavuka Yordani, na mfalme naye akavuka. Mfalme akambusu Barzilai na kumbariki, na Barzilai akarudi nyumbani kwake.

40Mfalme akaendelea mpaka Gilgali, na Kimhamu akaenda pamoja naye. Watu wote wa Yuda walikuwa wamemvusha mfalme, na nusu ya watu wa Israeli pia. 41Wakati huo watu wote wa Israeli wakaja kwa mfalme wakamwambia, “Kwa nini ndugu zetu watu wa Yuda wamekuiba? Kwa nini wao wamemvusha mfalme na jamaa yake Yordani, pamoja na watu wote wa Daudi?”

42Watu wote wa Yuda wakawajibu watu wa Israeli, “Tulifanya hivyo kwa sababu mfalme ni ndugu yetu wa karibu. Kwa nini mnakasirika hivi kwa jambo hili? Je, tumekula chochote kwa gharama ya mfalme? Je, tumepewa zawadi yoyote?”

43Watu wa Israeli wakawajibu watu wa Yuda, “Sisi tuna mafungu kumi katika mfalme, na hata katika Daudi fungu letu ni kubwa kuliko lenu. Basi kwa nini mnatudharau? Je, si sisi tuliokuwa wa kwanza kusema kwamba mfalme wetu arudishwe?” Lakini watu wa Yuda wakajibu kwa ukali zaidi kuliko watu wa Israeli.