2 Samweli 4

1Mwana wa Sauli aliposikia kwamba Abneri amekufa huko Hebroni, alikata tamaa, na Israeli wote wakaingiwa na hofu. 2Mwana wa Sauli alikuwa na watu wawili waliokuwa wakuu wa vikosi vya wavamizi. Mmoja aliitwa Baana na mwingine Rekabu, nao wote wawili walikuwa wana wa Rimoni Mbeerothi, wa kabila la Benyamini, kwa kuwa Beerothi nayo inahesabiwa kuwa sehemu ya Benyamini. 3Wabeerothi walikuwa wamekimbilia Gittaimu, nao wameishi huko kama wageni mpaka leo.

4(Yonathani mwana wa Sauli alikuwa na mwana aliyelemaa miguu yote miwili. Alikuwa na umri wa miaka mitano habari za Sauli na Yonathani zilipofika kutoka Yezreeli. Yaya wake alimchukua akakimbia, lakini alipokuwa akiharakisha kukimbia, mtoto akaanguka akawa kiwete. Jina lake lilikuwa Mefiboshethi.) 5Rekabu na Baana, wana wa Rimoni Mbeerothi, walikwenda wakafika nyumbani kwa Ishboshethi wakati wa joto la mchana, alipokuwa akipumzika adhuhuri. 6Waliingia ndani ya nyumba kana kwamba wanakuja kuchukua ngano, wakamchoma tumboni. Kisha Rekabu na ndugu yake Baana wakatoroka. 7Walikuwa wameingia nyumbani alipokuwa amelala kitandani katika chumba chake cha kulala, wakampiga, wakamwua, wakamkata kichwa. Wakakichukua kichwa hicho, wakasafiri usiku kucha kwa njia ya Araba. 8Walimletea Daudi kichwa cha Ishboshethi huko Hebroni, wakamwambia mfalme, “Tazama, hiki ni kichwa cha Ishboshethi mwana wa Sauli, adui yako, aliyekuwa akitafuta kukuua. Leo BWANA amempa bwana wangu mfalme kisasi juu ya Sauli na wazao wake.”

9Daudi aliwajibu Rekabu na ndugu yake Baana, wana wa Rimoni Mbeerothi, akawaambia, “Kama BWANA aishivyo, aliyeniokoa kutoka katika kila taabu, 10yule mtu aliyeniambia, ‘Tazama, Sauli amekufa,’ akidhani analeta habari njema, nilimkamata nikamwua huko Siklagi. Hiyo ndiyo zawadi niliyompa kwa habari zake, 11sembuse watu waovu wanapomwua mtu asiye na hatia ndani ya nyumba yake mwenyewe, kitandani mwake! Basi sasa, je, sitaidai damu yake mikononi mwenu na kuwafutilia mbali kutoka duniani?” 12Kisha Daudi aliwaamuru vijana wake, nao wakawaua. Wakakata mikono na miguu yao, wakaitundika miili yao kando ya bwawa huko Hebroni. Lakini kichwa cha Ishboshethi walikichukua wakakizika katika kaburi la Abneri huko Hebroni.