2 Samweli 18

1Daudi aliwahesabu askari waliokuwa pamoja naye, akaweka juu yao makamanda wa maelfu na makamanda wa mamia. 2Kisha Daudi akawatuma askari katika vikosi vitatu: kimoja chini ya Yoabu, kimoja chini ya Abishai mwana wa Seruya, ndugu wa Yoabu, na kimoja chini ya Itai Mgiti. Mfalme akawaambia askari, “Mimi mwenyewe nitatoka pamoja nanyi.” 3Lakini askari wakasema, “Hupaswi kutoka. Ikiwa tutalazimika kukimbia, hawatatujali. Hata nusu yetu wakifa, hawatatujali. Lakini wewe una thamani ya watu elfu kumi kati yetu. Kwa hiyo ni afadhali utusaidie ukiwa mjini.”

4Mfalme akawajibu, “Nitafanya lolote mnaloona ni bora.” Basi mfalme akasimama kando ya lango wakati askari wote walipokuwa wakitoka kwa vikosi vya mamia na vya maelfu. 5Mfalme akawapa Yoabu, Abishai na Itai amri hii: “Kwa ajili yangu, mtendeeni kwa upole kijana Absalomu.” Askari wote wakamsikia mfalme akiwapa makamanda wote amri hiyo kuhusu Absalomu. 6Jeshi likatoka kwenda nchi wazi kupambana na Israeli, na vita vikapiganwa katika msitu wa Efraimu. 7Huko jeshi la Israeli lilishindwa na watu wa Daudi, na mauaji yalikuwa makubwa siku ile: watu elfu ishirini. 8Mapigano yakaenea katika nchi yote, na msitu ukaua watu wengi siku ile kuliko upanga. 9Absalomu akakutana kwa ghafla na baadhi ya watu wa Daudi. Alikuwa amepanda nyumbu wake, na nyumbu alipopita chini ya matawi yaliyosongamana ya mwaloni mkubwa, kichwa cha Absalomu kikanaswa kwa nguvu katika mti huo. Akabaki ananing’inia kati ya mbingu na nchi, huku nyumbu aliyekuwa chini yake akiendelea na safari. 10Mtu mmoja akaona, akamwambia Yoabu, “Nimemwona Absalomu sasa hivi akining’inia katika mwaloni!” 11Yoabu akamwambia yule mtu aliyempa habari, “Umemwona? Basi kwa nini hukumpiga akaanguka chini papo hapo? Ningekupa kama gramu 115 za fedha na mshipi.” 12Lakini yule mtu akamjibu Yoabu, “Hata kama ningehisi uzito wa kama kilo 11.5 za fedha mikononi mwangu, nisingeinua mkono wangu dhidi ya mwana wa mfalme. Sisi sote tulimsikia mfalme akikuamuru wewe na Abishai na Itai, ‘Yeyote mlivyo, mlindeni kijana Absalomu.’ 13Na kama ningetenda kwa hila na kuhatarisha uhai wangu mwenyewe, wewe mwenyewe ungesimama mbali usijihusishe, kwa sababu hakuna jambo linalofichika kwa mfalme.” 14Yoabu akasema, “Sitapoteza muda zaidi nawe hivi.” Akachukua fimbo tatu mkononi mwake, akazichoma ndani ya kifua cha Absalomu, alipokuwa bado hai katikati ya mti. 15Kisha vijana kumi, wabeba silaha wa Yoabu, wakamzunguka Absalomu, wakampiga na kumwua. 16Ndipo Yoabu akapiga tarumbeta, na askari wakarudi wasiendelee kuwafuatia Israeli, kwa sababu Yoabu alilizuia jeshi. 17Wakamchukua Absalomu wakamtupa katika shimo kubwa msituni, kisha wakarundika juu yake chungu kubwa mno la mawe. Na Israeli wote wakakimbia, kila mtu nyumbani kwake.

18Alipokuwa bado hai, Absalomu alikuwa amechukua nguzo akajisimamishia katika Bonde la Mfalme, kwa sababu alisema, “Sina mwana wa kulifanya jina langu likumbukwe.” Akaiita nguzo hiyo kwa jina lake mwenyewe, nayo inaitwa Mnara wa Absalomu hata leo.

19Kisha Ahimaasi mwana wa Sadoki akasema, “Niache nikimbie nimpelekee mfalme habari kwamba BWANA amemtetea kwa kumwokoa kutoka kwa adui zake.” 20Lakini Yoabu akamwambia, “Wewe si mtu wa kupeleka habari leo. Utapeleka habari siku nyingine, lakini si leo, kwa sababu mwana wa mfalme amekufa.” 21Kisha Yoabu akamwambia Mkushi, “Nenda ukamwambie mfalme uliyoyaona.” Mkushi akamsujudia Yoabu, akaondoka mbio. 22Ahimaasi mwana wa Sadoki akasema tena na Yoabu, “Liwalo na liwe, tafadhali niache mimi pia nikimbie nyuma ya Mkushi.” Yoabu akajibu, “Kwa nini unataka kukimbia, mwanangu? Huna habari itakayokuletea zawadi yoyote.” 23Ahimaasi akasema, “Liwalo na liwe, nataka kukimbia.” Yoabu akamwambia, “Basi kimbia.” Ahimaasi akakimbia kwa njia ya uwanda, akamtangulia Mkushi. 24Daudi alikuwa ameketi kati ya lango la ndani na lango la nje. Mlinzi akapanda juu ya paa la lango, ukutani. Akatazama mbali, akaona mtu akikimbia peke yake. 25Mlinzi akaita akamwambia mfalme. Mfalme akasema, “Ikiwa yuko peke yake, analeta habari.” Yule mtu akazidi kukaribia. 26Kisha mlinzi akaona mtu mwingine akikimbia, akamwita bawabu, “Tazama, kuna mtu anakimbia peke yake!” Mfalme akasema, “Huyu naye analeta habari.” 27Mlinzi akasema, “Ninavyoona, yule wa kwanza anakimbia kama Ahimaasi mwana wa Sadoki.” Mfalme akasema, “Yeye ni mtu mwema. Anakuja na habari njema.” 28Ahimaasi akamwita mfalme kwa sauti, “Mambo yote ni salama!” Akainama mbele ya mfalme kifudifudi hadi chini, akasema, “Na abarikiwe BWANA Mungu wako, aliyewatia mikononi mwako watu walioinua mikono yao dhidi ya bwana wangu mfalme!” 29Mfalme akauliza, “Je, kijana Absalomu yu salama?” Ahimaasi akajibu, “Niliona ghasia kubwa wakati Yoabu alipokuwa akimtuma mtumishi wa mfalme na mtumishi wako, lakini sijui ilikuwa kuhusu nini.” 30Mfalme akasema, “Sogea kando usimame hapa.” Basi akasogea kando akasimama pale. 31Wakati huo huo Mkushi akafika, akasema, “Habari njema kwa bwana wangu mfalme! Leo BWANA amekutetea kwa kukuokoa kutoka kwa wote walioinuka dhidi yako.”

32Mfalme akamwuliza Mkushi, “Je, kijana Absalomu yu salama?” Mkushi akajibu, “Adui zako wote, bwana wangu mfalme, na wote wanaoinuka kukudhuru, na wapatwe na yaliyompata kijana huyo!”

33Mfalme akatikiswa sana. Akapanda kwenye chumba kilichokuwa juu ya lango akalia, na alipokuwa akipanda alisema hivi: “Mwanangu Absalomu! Mwanangu, mwanangu Absalomu! Heri mimi ningekufa mahali pako, Absalomu, mwanangu, mwanangu!”