2 Samweli 22

1Daudi alimwimbia BWANA maneno ya wimbo huu siku ile BWANA alipomwokoa kutoka katika mamlaka ya adui zake wote na kutoka katika mamlaka ya Sauli. 2Alisema: “BWANA ni jabali langu, ngome yangu, yule anayeniweka huru, 3Mungu wangu, mwamba wangu, ninayejificha kwake, ngao yangu, wokovu wangu wenye nguvu, mnara wangu juu milimani na mahali pangu pa kukimbilia, mwokozi wangu; wewe unaniokoa na jeuri. 4Ninamwita BWANA, anayestahili kusifiwa, nami ninaokolewa kutoka kwa adui zangu. 5Kwa maana mawimbi ya kifo yalinizunguka pande zote; mafuriko ya uharibifu yalinilemea kwa hofu. 6Kamba za Kuzimu zilinizingira; mitego ya kifo ilikuwa mbele yangu kabisa. 7Nilipobanwa sana nilimwita BWANA; nilimwita Mungu wangu. Kutoka hekaluni mwake aliisikiliza sauti yangu; kilio changu kilifika masikioni mwake. 8Kisha dunia ikatetemeka na kuyumba; misingi ya mbingu ikatetemeka na kutikiswa, kwa sababu alikuwa amekasirika sana. 9Moshi ulipanda kutoka puani mwake, na moto unaoteketeza ukatoka kinywani mwake; makaa yanayowaka yakatoka ndani yake. 10Aliziinamisha mbingu chini akashuka; mawingu meusi ya dhoruba yalikuwa chini ya miguu yake. 11Akiwa amepanda kerubi, aliruka; alionekana juu ya mabawa ya upepo. 12Alilifanya giza kuwa hema pande zote zake, mawingu mengi ya mvua, mawingu mazito ya anga. 13Kutoka katika mwangaza ulio mbele yake makaa yanayowaka yalilipuka. 14BWANA alinguruma kutoka mbinguni; Aliye Juu Kabisa alipaza sauti yake. 15Aliiachilia mishale akawatawanya adui; alituma umeme akawachanganya. 16Vitanda vya bahari vikaonekana; misingi ya dunia ikawa wazi kwa karipio la BWANA, kwa mvumo wa pumzi kutoka puani mwake. 17Kutoka juu alinyoosha mkono wake akanishika; akanivuta kutoka katika maji makuu. 18Alininyakua kutoka kwa adui yangu mwenye nguvu, kutoka kwa wale walionichukia, kwa sababu walinizidi nguvu. 19Walinijia siku ya msiba wangu, lakini BWANA alinishika. 20Aliniongoza nje mpaka nchi iliyo wazi; aliniweka huru, kwa sababu alipendezwa nami. 21BWANA alinitendea kama mwenendo wangu wa haki ulivyostahili; alinilipa kwa sababu mikono yangu ilikuwa safi. 22Kwa maana nimeenenda katika njia za BWANA wala sikumwacha Mungu wangu ili kutenda mabaya. 23Maamuzi yake yote yamekuwa mbele yangu; sikugeuka kuziacha sheria zake. 24Nilikuwa mwaminifu kwake kwa moyo wote; nilijilinda nisitende dhambi. 25Kwa hiyo BWANA alinilipa kwa kutenda haki, kwa usafi aliouona ndani yangu. 26Kwa waaminifu wewe ni mwaminifu; kwa wenye nguvu walio na unyofu unaonyesha unyofu. 27Kwa walio safi unajithibitisha kuwa safi, lakini kwa wapotovu unatenda kwa werevu. 28Unawaokoa watu walionyenyekezwa, lakini macho yako yako juu ya wenye kiburi, nawe unawashusha chini. 29Wewe ni taa yangu, Ee BWANA; BWANA analiangaza giza langu. 30Pamoja nawe ninaweza kukivamia kikosi cha askari; kwa nguvu za Mungu wangu ninaweza kuruka ukuta. 31Huyu ndiye Mungu: njia yake haina dosari; neno la BWANA limejaribiwa na ni la kweli; yeye ni ngao kwa wote wanaomfanya kuwa kimbilio lao. 32Je, yuko Mungu mwingine ila BWANA? Je, upo mwamba mwingine ila Mungu wetu? 33Mungu aliye ngome yangu yenye nguvu, anayeiweka huru njia yangu na kuifanya salama, 34anayeifanya miguu yangu kuwa imara kama ya ayala na kunisimamisha imara juu ya vilele, 35anayeifundisha mikono yangu vita, hata mikono yangu inaweza kuuvuta upinde wa shaba. 36Umenikabidhi ngao yako ya wokovu, na jibu lako limenifanya mkuu. 37Unazipa hatua zangu nafasi, hivyo vifundo vyangu havigeuki. 38Niliwafukuza adui zangu nikawafutilia mbali; sikuacha kuwafuatia mpaka nilipowamaliza. 39Niliwamaliza na kuwavunjavunja, nao hawakusimama tena; walilala wameanguka miguuni pangu. 40Ulinifunga nguvu kwa ajili ya mapigano; uliwapigisha magoti chini yangu washambuliaji wangu. 41Uliwafanya adui zangu wanikimbie, nami nikawaangamiza wale walionichukia. 42Walitafuta msaada, lakini hakuna aliyekuja kuwaokoa; walimtazama BWANA, lakini hakuwapa jibu. 43Niliwasaga laini kama mavumbi ya ardhi; niliwaponda na kuwakanyaga kama matope barabarani. 44Uliniweka huru kutoka katika ugomvi wa watu wangu mwenyewe; ulinihifadhi juu ya mataifa kama kiongozi wao. Taifa ambalo sikulijua sasa linanitumikia. 45Wageni wananijia wakinyenyekea kwa woga; mara wanaposikia, wananitii. 46Wageni wanakata tamaa; wanajifunga mishipi na kutoka katika ngome zao. 47BWANA yu hai! Mwamba wangu na abarikiwe! Mungu, mwamba anayeniokoa, na ainuliwe juu, 48Mungu anayenilipizia kisasi na kuyashusha mataifa chini yangu, 49anayenitoa kutoka katikati ya adui zangu. Unaniinua juu ya washambuliaji wangu; unaniokoa kutoka kwa mtu mwenye jeuri. 50Ndiyo maana nitakushukuru kati ya mataifa, Ee BWANA, na kuliimbia sifa jina lako. 51Yeye ni mnara wa ushindi kwa mfalme wake; anaonyesha upendo usiokoma kwa yule aliyempaka mafuta, kwa Daudi na uzao wake nyakati zote.”