2 Samweli 11

1Mwaka ulipozunguka tena, majira ambayo wafalme hutoka kwenda vitani, Daudi alimtuma Yoabu pamoja na maafisa wake na jeshi lote la Israeli. Wakaiharibu nchi ya Waamoni na kuuzingira mji wa Raba. Lakini Daudi mwenyewe alibaki Yerusalemu.

2Jioni ilipokaribia, Daudi aliinuka kutoka mahali alipokuwa amelala, akatembeatembea juu ya dari ya jumba la kifalme. Kutoka darini akamwona mwanamke akioga, naye alikuwa mzuri sana wa sura. 3Daudi alimtuma mtu kuuliza habari za mwanamke huyo, naye akaletewa jibu, “Je, huyo si Bathsheba binti Eliamu, mke wa Uria Mhiti?” 4Daudi alituma wajumbe akamleta. Akaja kwake, naye akalala naye; wakati huo alikuwa akijitakasa kutoka katika unajisi wake. Kisha akarudi nyumbani kwake. 5Mwanamke huyo aligundua kwamba amepata mimba, akatuma ujumbe kumjulisha Daudi: “Nina mimba.” 6Kisha Daudi akatuma amri kwa Yoabu: “Mtume Uria Mhiti aje kwangu.” Basi Yoabu akamtuma Uria kwa Daudi. 7Uria alipofika, Daudi alimwuliza Yoabu hajambo, askari hawajambo, na vita vinaendeleaje. 8Kisha Daudi akamwambia Uria, “Shuka nyumbani kwako ukanawe miguu yako.” Uria akatoka katika jumba la kifalme, na zawadi kutoka kwa mfalme ikapelekwa nyuma yake. 9Lakini Uria alilala usiku ule mlangoni pa jumba la kifalme pamoja na watumishi wote wa bwana wake. Hakushuka kwenda nyumbani kwake. 10Daudi alipata habari kwamba Uria hakushuka nyumbani kwake. Basi Daudi akamwuliza, “Je, si umetoka safarini sasa hivi? Kwa nini hukushuka nyumbani kwako?” 11Uria akamjibu Daudi, “Sanduku, Israeli na Yuda wanakaa katika vibanda, na bwana wangu Yoabu na watu wa bwana wangu wamepiga kambi nje mbugani. Je, mimi niende nyumbani kwangu, nile na kunywa na kulala na mke wangu? Naapa kwa uhai wako, naam, kwa uhai wako mwenyewe, sitafanya jambo hili!” 12Kisha Daudi akamwambia Uria, “Kaa hapa siku moja zaidi, na kesho nitakuacha uende.” Basi Uria akakaa Yerusalemu siku ile na iliyofuata. 13Daudi alimwalika, naye Uria akala na kunywa mbele yake, na Daudi akamlewesha. Lakini jioni Uria alitoka kwenda kulala kwenye mkeka wake pamoja na watumishi wa bwana wake; hakushuka nyumbani kwake. 14Kesho yake asubuhi Daudi alimwandikia Yoabu barua, akampa Uria aipeleke. 15Katika barua aliandika, “Mweke Uria katika safu ya mbele, mahali ambapo vita ni vikali kuliko vyote. Kisha mrudi nyuma, mmwache, ili apigwe afe.”

16Yoabu aliulinda mji kwa karibu, naye akamweka Uria mahali alipojua kwamba adui walikuwa na wapiganaji wao hodari kuliko wote. 17Watetezi wa mji walitoka wakapigana na majeshi ya Yoabu. Baadhi ya askari, watu wa Daudi, wakaanguka, naye Uria Mhiti akafa pia. 18Yoabu alimtuma mjumbe kumweleza Daudi kila kitu kilichotokea vitani. 19Alimpa mjumbe maagizo haya: “Utakapomaliza kumweleza mfalme habari yote ya vita, 20kama mfalme atawaka hasira na kukuuliza, ‘Kwa nini mlikwenda karibu hivyo na mji kupigana? Je, hamkujua kwamba wangepiga mishale kutoka juu ya ukuta? 21Ni nani aliyemwua Abimeleki mwana wa Yerubeshethi? Je, si mwanamke? Alimwangushia jiwe la juu la kusagia kutoka juu ya ukuta, naye akafa huko Thebesi. Kwa nini mlikwenda karibu na ukuta?’ ndipo umwambie, ‘Mtumishi wako Uria Mhiti naye amekufa.’” 22Basi mjumbe akaondoka, na alipofika alimweleza Daudi kila kitu ambacho Yoabu alimtuma kusema. 23Mjumbe akamwambia Daudi, “Adui walikuwa na nguvu kuliko sisi wakatushambulia mbugani, lakini tukawarudisha nyuma mpaka langoni. 24Kisha wapiga mishale waliwapiga watu wako kutoka juu ya ukuta. Baadhi ya watu wa mfalme wamekufa, naye mtumishi wako Uria Mhiti amekufa pia.”

25Daudi akamwambia mjumbe, “Mwambie Yoabu hivi: ‘Jambo hili lisionekane baya machoni pako. Upanga hula sasa huyu, sasa yule. Zidisha mashambulizi yako juu ya mji ukaubomoe.’ Basi umtie moyo.” 26Habari zilimfikia mke wa Uria kwamba mumewe Uria amekufa, naye akamwombolezea mumewe. 27Siku zake za maombolezo zilipokwisha, Daudi alituma watu wakamleta nyumbani kwake. Akawa mke wake, akamzalia mwana. Lakini jambo alilofanya Daudi lilikuwa baya machoni pa BWANA.