2 Samweli 21

1Katika siku za Daudi kulikuwa na njaa kwa miaka mitatu mfululizo, kwa hiyo Daudi akautafuta uso wa BWANA. BWANA akasema, “Ni kwa sababu ya Sauli na jamaa yake yenye hatia ya damu, kwa sababu aliwaua Wagibeoni.” 2Basi mfalme akawaita Wagibeoni akasema nao. (Wagibeoni hawakuwa Waisraeli; walikuwa mabaki ya Waamori. Waisraeli walikuwa wamewaapia, lakini Sauli, kwa wivu wake kwa ajili ya Waisraeli na Yuda, alijaribu kuwaangamiza.) 3Daudi akawauliza Wagibeoni, “Niwafanyie nini? Nifanyeje upatanisho, ili mpate kuubariki urithi wa BWANA?” 4Wagibeoni wakamjibu, “Madai yetu juu ya Sauli na jamaa yake si jambo la fedha au dhahabu, wala si haki yetu kumwua mtu yeyote katika Israeli.” Daudi akasema, “Basi mnataka niwafanyie nini?” 5Wakamwambia mfalme, “Kuhusu yule mtu aliyekaribia kutufuta kabisa na kufanya hila dhidi yetu, hata hatuna mahali popote palipobaki katika nchi yote ya Israeli, 6tupewe wazao wake saba wa kiume, nasi tutawatundika mbele za BWANA huko Gibea ya Sauli, yule ambaye BWANA alimchagua.” Mfalme akasema, “Nitawakabidhi kwenu.” 7Lakini mfalme akamhurumia Mefiboshethi mwana wa Yonathani, mwana wa Sauli, kwa sababu ya kiapo mbele za BWANA kilichowafunga Daudi na Yonathani mwana wa Sauli. 8Badala yake mfalme akawachukua wana wawili ambao Rispa binti Aya alimzalia Sauli, Armoni na Mefiboshethi, pamoja na wana watano ambao Mikali binti Sauli alimzalia Adrieli mwana wa Barzilai wa Mehola. 9Akawakabidhi kwa Wagibeoni, nao wakawatundika mlimani mbele za BWANA. Wote saba wakafa pamoja. Waliuawa katika siku za kwanza za mavuno, mwanzoni mwa mavuno ya shayiri. 10Kisha Rispa binti Aya akachukua gunia, akalitandika juu ya mwamba kuwa mahali pake. Tangu mwanzo wa mavuno mpaka mvua iliponyesha juu ya maiti kutoka angani, hakuwaacha ndege watue juu yao mchana, wala wanyama wa porini usiku. 11Habari zikamfikia Daudi juu ya yale aliyoyafanya Rispa binti Aya, suria wa Sauli. 12Daudi akaenda akachukua mifupa ya Sauli na ya mwanawe Yonathani kutoka kwa viongozi wa Yabeshi ya Gileadi. Wao walikuwa wameichukua kwa siri kutoka uwanja wa wazi wa Beth-sheani, ambako Wafilisti walikuwa wamewatundika siku ile walipompiga Sauli huko Gilboa. 13Akaileta kutoka huko mifupa ya Sauli na ya mwanawe Yonathani, na mifupa ya watu waliotundikwa nayo ikakusanywa. 14Wakaizika mifupa ya Sauli na mwanawe Yonathani katika kaburi la Kishi, baba yake Sauli, huko Sela katika nchi ya Benyamini. Wakafanya yote aliyoamuru mfalme, na baada ya hayo Mungu akajibu maombi kwa ajili ya nchi.

15Kwa mara nyingine kulikuwa na vita kati ya Wafilisti na Israeli. Daudi akashuka pamoja na watu wake, wakapigana na Wafilisti, naye Daudi akachoka sana. 16Ishbi-benobu, mmoja wa wazao wa Rafa, ambaye mkuki wake wa shaba ulikuwa na uzito wa kama kilo 3.5, na aliyekuwa amejifunga silaha mpya, akakusudia kumwua Daudi. 17Lakini Abishai mwana wa Seruya akaja kumsaidia Daudi. Akampiga yule Mfilisti akamwua. Ndipo watu wa Daudi wakaapa mbele yake: “Kamwe hutatoka tena pamoja nasi vitani. Hupaswi kuiacha taa ya Israeli izimike.”

18Baada ya hayo kulikuwa na vita vingine na Wafilisti huko Gobu. Wakati huo Sibekai Mhushathi akamwua Safu, mmoja wa wazao wa Rafa.

19Kulikuwa na vita vingine na Wafilisti huko Gobu, na Elhanani mwana wa Yaare-oregimu, wa Bethlehemu, akamwua Goliathi wa Gathi, ambaye mkuki wake ulikuwa na mpini kama mti wa mfumaji.

20Kulikuwa na vita vingine huko Gathi, ambako palikuwa na mtu mrefu sana mwenye vidole sita kila mkono na vidole sita kila mguu, ishirini na vinne kwa jumla. Yeye pia alikuwa mzao wa Rafa. 21Alipowatukana Israeli, Yonathani mwana wa Shimea, ndugu wa Daudi, akamwua. 22Hawa wanne walikuwa wazao wa Rafa huko Gathi, nao wakaanguka kwa mikono ya Daudi na watu wake.