Ufunuo 1

1Huu ni ufunuo wa Yesu Kristo. Mungu alimpa ufunuo huu ili awaonyeshe watumishi wake mambo ambayo lazima yatokee hivi karibuni. Alimtuma malaika wake kwa mtumishi wake Yohana, na kupitia malaika huyo akayajulisha mambo hayo. 2Yohana ameshuhudia yote aliyoyaona, yaani neno la Mungu na ushuhuda wa Yesu Kristo. 3Heri mtu anayesoma kwa sauti maneno ya unabii huu, na heri wale wanaoyasikia na kuyashika yaliyoandikwa humu! Wakati umekaribia. 4Kutoka kwa Yohana, kwa makanisa saba yaliyo katika jimbo la Asia. Neema na amani ziwe kwenu kutoka kwa yeye aliyepo, aliyekuwepo, na anayekuja; kutoka kwa roho saba zilizo mbele ya kiti chake cha enzi; 5na kutoka kwa Yesu Kristo, shahidi aliye mwaminifu, mzaliwa wa kwanza kutoka kwa wafu, na mtawala juu ya wafalme wa dunia. Kwa yeye anayetupenda, na aliyetuweka huru mbali na dhambi zetu kwa damu yake, 6na aliyetufanya kuwa ufalme, makuhani wanaomtumikia Mungu na Baba yake: utukufu na uweza viwe kwake milele na milele. Amina.

7Tazama! Anakuja pamoja na mawingu. Kila jicho litamwona, hata wale waliomchoma, na makabila yote ya dunia yatajipiga vifua kwa huzuni kwa sababu yake. Ndiyo! Amina.

8“Mimi ni Alfa na Omega,” anasema Bwana Mungu, yeye aliyepo, aliyekuwepo, na anayekuja, Mwenyezi.

9Mimi Yohana ni ndugu yenu, na katika Yesu ninashiriki pamoja nanyi dhiki, ufalme, na uvumilivu. Nilikuwa katika kisiwa kinachoitwa Patmo kwa sababu ya neno la Mungu na ushuhuda wa Yesu. 10Siku ya Bwana nilikuwa katika Roho, nikasikia nyuma yangu sauti kubwa iliyosikika kama tarumbeta. 11Ilisema, “Andika katika gombo kile unachokiona, ukalipeleke kwa makanisa saba: Efeso, Smirna, Pergamo, Thiatira, Sardi, Filadelfia na Laodikia.”

12Niligeuka nione ni sauti ya nani iliyokuwa ikisema nami, na nilipogeuka niliona vinara saba vya taa vilivyotengenezwa kwa dhahabu. 13Katikati ya vinara hivyo alikuwapo mmoja aliye kama mwana wa mtu. Alikuwa amevaa vazi refu lililofika miguuni mwake, na mshipi wa dhahabu ulikuwa umefungwa kifuani mwake. 14Kichwa chake na nywele zake vilikuwa vyeupe kama sufu, vyeupe kama theluji, na macho yake yalikuwa kama moto unaowaka. 15Miguu yake ilikuwa kama shaba bora iliyopashwa moto katika tanuru, na sauti yake ilikuwa kama sauti ya maji mengi. 16Alikuwa ameshika nyota saba katika mkono wake wa kulia, upanga mkali wenye makali kuwili ulitoka kinywani mwake, na uso wake ulikuwa ukiangaza kama jua linapong’aa kwa nguvu zake zote.

17Nilipomwona, nilianguka miguuni pake kama mtu aliyekufa. Akaweka mkono wake wa kulia juu yangu, akasema, “Usiogope. Mimi ni wa kwanza na wa mwisho, 18na ndiye aliye hai. Nilikuwa nimekufa, na tazama, niko hai milele na milele, na funguo za kifo na za Kuzimu ni zangu. 19Kwa hiyo yaandike yale uliyoyaona, yale yaliyopo, na yale yatakayotokea baada ya haya. 20Kuhusu siri ya nyota saba ulizoziona katika mkono wangu wa kulia, na ya vinara saba vya taa vya dhahabu: nyota saba ni malaika wa makanisa saba, na vinara saba ni makanisa saba.”