Ufunuo 2

1Kwa malaika wa kanisa la Efeso, andika: “Huu ndio ujumbe wa yule anayezishika kwa nguvu nyota saba katika mkono wake wa kulia, anayetembea katikati ya vinara saba vya taa vya dhahabu: 2Najua matendo yako, jinsi ulivyojitaabisha katika kazi na jinsi ulivyovumilia. Najua kwamba huwezi kuwastahimili watu wanaotenda maovu. Wale wanaojiita mitume, ingawa sio, uliwapima ukagundua kuwa ni waongo. 3Unaendelea kuvumilia. Kwa ajili ya jina langu umestahimili mizigo mizito, wala hujachoka. 4Lakini hili ndilo ninalokulaumu: ule upendo uliokuwa nao mwanzoni umeuacha. 5Kwa hiyo kumbuka umeanguka kutoka juu kiasi gani. Tubu, ukatende kama ulivyotenda mwanzoni. La sivyo, ninakuja kwako, nami nitakiondoa kinara chako cha taa mahali kilipo, usipotubu. 6Hata hivyo, una jambo hili jema: unayachukia mambo wanayoyafanya Wanikolai, nami pia nayachukia. 7Kila mwenye masikio na asikilize kile Roho anachoyaambia makanisa. Kila anayeshinda nitamruhusu kula matunda ya mti wa uzima ulio katika paradiso ya Mungu.”

8Kwa malaika wa kanisa la Smirna, andika: “Huu ndio ujumbe wa yule aliye wa kwanza na wa mwisho, aliyekufa akawa hai tena: 9Najua dhiki yako na umaskini wako, ingawa kwa kweli wewe ni tajiri. Najua pia matusi unayotukanwa na wale wanaojidai kuwa Wayahudi ilhali sio. Wao ni sinagogi la Shetani. 10Usiogope lolote kati ya mateso yatakayokupata. Tazama, Ibilisi anakaribia kuwatupa baadhi yenu gerezani, ili mjaribiwe, nanyi mtapata dhiki kwa siku kumi. Dumu katika uaminifu hata kufikia kifo, nami nitakupa taji la uzima. 11Kila mwenye masikio na asikilize kile Roho anachoyaambia makanisa. Kifo cha pili hakitamdhuru kamwe yeyote anayeshinda.”

12Kwa malaika wa kanisa la Pergamo, andika: “Huu ndio ujumbe wa yule aliye na upanga mkali wenye makali kuwili: 13Najua unakoishi: ni mahali kilipo kiti cha enzi cha Shetani. Hata hivyo unalishika jina langu kwa nguvu. Hata katika siku za Antipa, shahidi wangu na mwaminifu wangu, aliyeuawa kwenu, mahali Shetani anapoishi, hukuikana imani yako kwangu. 14Lakini nina mambo machache ya kukulaumu. Unao huko watu wanaoshikilia mafundisho ya Balaamu. Yeye ndiye aliyemwonyesha Balaki jinsi ya kuwategea Waisraeli mtego, ili wale vyakula vilivyotolewa sadaka kwa sanamu na kufanya uasherati. 15Vivyo hivyo, wewe pia unao watu wanaong’ang’ania mafundisho ya Wanikolai. 16Basi tubu. La sivyo, ninakuja kwako hivi karibuni, nami nitapigana vita dhidi yao kwa upanga unaotoka kinywani mwangu. 17Kila mwenye masikio na asikilize kile Roho anachoyaambia makanisa. Kila anayeshinda nitampa sehemu ya mana iliyofichwa. Nitampa pia kila mmoja wao jiwe jeupe, na juu ya jiwe hilo limeandikwa jina jipya ambalo hakuna anayelijua isipokuwa yule anayelipokea.”

18Kwa malaika wa kanisa la Thiatira, andika: “Huu ndio ujumbe wa Mwana wa Mungu, ambaye macho yake ni kama mwali wa moto na miguu yake ni kama shaba bora: 19Najua matendo yako: upendo, imani, huduma na uvumilivu ulio nao. Najua pia kwamba matendo yako ya sasa ni mengi kuliko ya mwanzo. 20Lakini hili ndilo ninalokulaumu: unamvumilia mwanamke Yezebeli, anayejiita nabii. Anawafundisha watumishi wangu na kuwadanganya wafanye uasherati na kula vyakula vilivyotolewa sadaka kwa sanamu. 21Nimempa muda wa kutubu, lakini hataki kuuacha uasherati wake. 22Tazama, ninamlaza kitandani akiwa mgonjwa, na wale wanaozini naye nawatupa katika dhiki kuu, wasipotubu na kuacha mambo anayoyatenda. 23Watoto wake nitawaua, na makanisa yote yatatambua kwamba mimi ndiye ninayechunguza undani wa mtu, akili na moyo, na kwamba nitampa kila mmoja wenu kadiri ya matendo yake. 24Lakini kwenu ninyi wengine mlio Thiatira, ninyi nyote msioshika mafundisho haya na ambao hamjajifunza yale wanayoyaita ‘mambo ya kina ya Shetani’, nasema hivi: sitawatwika mzigo mwingine. 25Shikeni tu kwa nguvu kile mlicho nacho mpaka nitakapokuja. 26Kila anayeshinda na kuendelea kufanya matendo yangu hadi mwisho nitampa mamlaka juu ya mataifa. 27Atayachunga mataifa kwa fimbo ya chuma, kama vyombo vya udongo vinavyovunjwa vipande vipande, 28kwa mamlaka yale yale ambayo mimi mwenyewe nilipokea kutoka kwa Baba yangu. Tena nitampa kila mmoja wao nyota ya asubuhi. 29Kila mwenye masikio na asikilize kile Roho anachoyaambia makanisa.”