Ufunuo 3

1Kwa malaika wa kanisa la Sardi, andika: “Huu ndio ujumbe wa yule aliye na roho saba za Mungu na nyota saba: Najua matendo yako. Watu wanakusema kuwa uko hai, lakini umekufa. 2Amka ukeshe, ukayatie nguvu yaliyosalia, yaliyokuwa karibu kufa, kwa maana nimeona kwamba matendo yako hayajakamilika mbele ya Mungu wangu. 3Basi kumbuka jinsi ulivyoupokea ujumbe na kuusikia. Ushike, ukatubu. Usipoamka, nitakuja kama mwizi, wala hutajua kamwe saa nitakayokujia kukuhukumu. 4Hata hivyo, unao watu wachache huko Sardi ambao hawajachafua mavazi yao. Watatembea pamoja nami wakiwa wamevaa mavazi meupe, kwa maana wanastahili. 5Kila anayeshinda atavikwa hivyo, mavazi meupe. Sitalifuta kamwe jina lake kutoka katika kitabu cha uzima. Mbele ya Baba yangu na mbele ya malaika wake nitalikiri jina lake waziwazi. 6Kila mwenye masikio na asikilize kile Roho anachoyaambia makanisa.”

7Kwa malaika wa kanisa la Filadelfia, andika: “Huu ndio ujumbe wa yule aliye mtakatifu na wa kweli, aliye na ufunguo wa Daudi: yeye akifungua, hakuna atakayefunga, na akifunga, hakuna anayefungua: 8Najua matendo yako. Tazama, nimekufungulia mlango, na hakuna mtu awezaye kuufunga. Nguvu zako ni chache, lakini umelishika neno langu, wala hukulikana jina langu. 9Tazama nitakalowafanya wale wa sinagogi la Shetani, wanaojidai kuwa Wayahudi ilhali sio, bali wanasema uongo: nitawafanya waje kusujudu miguuni pako, nao watajua kwamba mimi nimekupenda. 10Umelishika agizo langu la kuvumilia, kwa hiyo nami nitakulinda kutoka katika saa ya majaribu inayokaribia kuujia ulimwengu wote, ili kuwajaribu watu wanaoishi duniani. 11Ninakuja hivi karibuni. Kishike kwa nguvu kile ulicho nacho, ili mtu yeyote asije akalichukua taji lako. 12Kila anayeshinda nitamfanya kuwa nguzo katika hekalu la Mungu wangu, naye hatatoka humo tena kamwe. Juu yake nitaandika jina la Mungu wangu, na jina la mji wa Mungu wangu, yaani Yerusalemu mpya unaoshuka kutoka mbinguni kutoka kwa Mungu wangu, na jina langu jipya. 13Kila mwenye masikio na asikilize kile Roho anachoyaambia makanisa.”

14Kwa malaika wa kanisa la Laodikia, andika: “Huu ndio ujumbe wa yule Amina, shahidi aliye mwaminifu na wa kweli, chanzo cha uumbaji wa Mungu: 15Najua matendo yako: wewe si baridi, wala si moto. Laiti ungekuwa mmoja wapo, baridi au moto! 16Lakini kwa kuwa wewe ni vuguvugu, si moto wala si baridi, niko karibu kukutema utoke kinywani mwangu. 17Unajiambia, ‘Mimi ni tajiri. Nimejilimbikizia mali, wala sikosi chochote.’ Huoni kwamba ni wewe uliye mnyonge na wa kuhurumiwa, maskini, kipofu na uchi. 18Kwa hiyo shauri langu ni hili: nunua kwangu dhahabu iliyopitishwa motoni, nawe utakuwa tajiri; nunua mavazi meupe uyavae, na aibu ya uchi wako haitaonekana; na nunua dawa ya macho uyapake, nawe utaona. 19Wote ninaowapenda ninawaonya na kuwafundisha nidhamu. Basi uwe na bidii, ukatubu. 20Tazama, nimesimama mlangoni, ninagonga. Mtu yeyote akiisikia sauti yangu na kuufungua mlango, nitaingia na kushiriki chakula pamoja naye, naye pamoja nami. 21Kila anayeshinda nitampa nafasi ya kuketi pamoja nami katika kiti changu cha enzi, kama vile mimi nilivyoshinda, nikaketi pamoja na Baba yangu katika kiti chake cha enzi. 22Kila mwenye masikio na asikilize kile Roho anachoyaambia makanisa.”