Ufunuo 13

1Kisha nikamwona mnyama akipanda kutoka baharini. Alikuwa na pembe kumi na vichwa saba, taji kumi za kifalme juu ya pembe zake, na juu ya vichwa vyake majina ya kumkufuru Mungu. 2Yule mnyama niliyemwona alifanana na chui; miguu yake ilikuwa kama ya dubu, na kinywa chake kama kinywa cha simba. Joka akamkabidhi uweza wake, kiti chake cha enzi na mamlaka makuu. 3Kimoja cha vichwa vyake kilionekana kama kilichochinjwa kikauawa, lakini jeraha lake la kuua lilikuwa limepona. Dunia yote ikastaajabu, ikamfuata mnyama. 4Wakamwabudu joka kwa sababu alikuwa amempa mnyama mamlaka yake, nao wakamwabudu mnyama pia, wakisema, “Ni nani anayelingana na mnyama? Ni nani awezaye kupigana vita naye?” 5Aliruhusiwa kuwa na kinywa cha kusema maneno ya majivuno na makufuru, akapewa mamlaka ya kutenda kwa miezi arobaini na miwili. 6Kinywa chake kikafunguka kwa makufuru dhidi ya Mungu, akilitukana jina lake na maskani yake, yaani wale ambao makao yao ni mbinguni. 7Aliruhusiwa kupigana vita na watu watakatifu wa Mungu na kuwashinda, akapewa mamlaka juu ya kila kabila, jamii, lugha na taifa. 8Wote wanaoishi duniani watamwabudu, kila mtu ambaye jina lake halijaandikwa, tangu ulimwengu ulipowekewa misingi, katika kitabu cha uzima cha Mwanakondoo aliyechinjwa.

9Kila mwenye masikio na asikilize. 10Yeyote anayepangiwa kifungo atakwenda kifungoni; yeyote atakayeuawa kwa upanga ni lazima auawe kwa upanga. Hapa ndipo watu watakatifu wa Mungu wanapohitaji uvumilivu na imani.

11Nikamwona mnyama mwingine akipanda kutoka katika nchi. Pembe zake mbili zilikuwa kama za mwanakondoo, lakini sauti yake ilikuwa sauti ya joka. 12Anatumia mamlaka yote ya mnyama wa kwanza, akitenda mbele yake. Analazimisha dunia na watu wake wamwabudu mnyama wa kwanza, ambaye jeraha lake la kuua lilipona. 13Anafanya ishara kubwa, hata kushusha moto kutoka angani hadi duniani mbele ya watu wote. 14Anawapotosha watu wa dunia kwa ishara alizoruhusiwa kuzifanya mbele ya mnyama, akiwaambia wamtengenezee sanamu mnyama yule aliyekuwa na jeraha la upanga lakini akarudi kuishi. 15Aliruhusiwa kuipa sanamu ya mnyama pumzi ya uhai, ili sanamu hiyo iweze hata kusema, na kuwafanya wauawe wote waliokataa kuiabudu. 16Anawalazimisha watu wote, wanyonge na wakubwa, matajiri na maskini, walio huru na watumwa, watiwe chapa kwenye mkono wa kulia au kwenye kipaji cha uso. 17Hakuna mtu awezaye kununua wala kuuza isipokuwa wale walio na chapa hiyo, yaani jina la mnyama au hesabu inayosimama kwa jina lake. 18Hapa hekima inahitajika. Mwenye akili na ahesabu hesabu ya mnyama, kwa maana ni hesabu ya kibinadamu. Hesabu yake ni 666.