Ufunuo 6

1Nilitazama Mwanakondoo alipouvunja mmoja wa ile mihuri saba. Mmoja wa wale viumbe hai wanne alipaza sauti kama ngurumo, nikamsikia akisema, “Njoo!” 2Nilitazama, nikaona farasi mweupe. Yule aliyempanda alibeba upinde. Alipewa taji, naye akatoka, akipata ushindi na akiazimia kushinda zaidi.

3Mwanakondoo aliuvunja muhuri wa pili, nikamsikia kiumbe hai wa pili akisema, “Njoo!” 4Akatokea farasi mwingine, mwekundu kama moto. Yule aliyempanda aliruhusiwa kuiondoa amani duniani na kuwafanya watu wachinjane, naye akapewa upanga mkubwa mkononi.

5Mwanakondoo aliuvunja muhuri wa tatu, nikamsikia kiumbe hai wa tatu akisema, “Njoo!” Nilitazama, na pale palikuwa na farasi mweusi, na yule aliyempanda alikuwa na mizani mkononi mwake. 6Kisha nikasikia kile kilichosikika kama sauti katikati ya viumbe hai wanne, ikisema: “Lita moja ya ngano kwa mshahara wa siku moja, na lita tatu za shayiri kwa mshahara wa siku moja, lakini usiyadhuru mafuta ya zeituni wala divai!”

7Mwanakondoo aliuvunja muhuri wa nne, nikamsikia kiumbe hai wa nne akisema, “Njoo!” 8Nilitazama, nikaona farasi mwenye rangi ya kijani iliyofifia kama maiti. Aliyempanda aliitwa Kifo, na Kuzimu ilifuatana naye. Walipewa mamlaka juu ya robo ya dunia, kuua kwa upanga, kwa njaa, kwa magonjwa ya kuua, na kwa wanyama wakali wa dunia.

9Alipoufungua muhuri wa tano, niliona chini ya madhabahu roho za wale waliochinjwa kwa ajili ya neno la Mungu na kwa ajili ya ushuhuda walioushikilia. 10Walilia kwa sauti kubwa: “Bwana Mkuu, mtakatifu na wa kweli, mpaka lini ndipo wewe utawahukumu wale wanaoishi duniani na kutulipia kisasi cha damu yetu?” 11Kila mmoja wao alikabidhiwa vazi jeupe, nao wakaambiwa wapumzike kwa muda mfupi zaidi, mpaka hesabu ya watumishi wenzao na ndugu zao, watakaouawa kama walivyouawa wao, itimie.

12Kisha nilimwona akiufungua muhuri wa sita, na tetemeko kubwa la ardhi likatokea. Jua likawa jeusi kama gunia la manyoya ya mbuzi, mwezi mzima ukawa kama damu, 13na nyota za angani zikaanguka duniani, kama tini mbichi zinavyoanguka kutoka kwenye mtini unapotikiswa na upepo mkali. 14Anga likaondolewa kama gombo linalojikunja lenyewe, na kila mlima na kisiwa vikahamishwa kutoka mahali pake. 15Kisha wafalme wa dunia na maafisa wake wakuu, makamanda wa majeshi, matajiri na wenye nguvu, na kila mtumwa na kila mtu huru, walikwenda kujificha katika mapango na kati ya miamba ya milima. 16Wanaililia milima na miamba, “Tuangukieni! Tufunikeni tusionekane mbele ya yule aliyeketi juu ya kiti cha enzi, na tuepushwe na ghadhabu ya Mwanakondoo! 17Kwa maana siku kuu ya ghadhabu yao imefika, na ni nani awezaye kusimama?”