Ufunuo 9

1Malaika wa tano alipopiga tarumbeta yake, nikaona nyota iliyokuwa imeanguka kutoka angani hadi duniani, naye akapewa ufunguo wa shimo linaloshuka hadi kilindini. 2Akalifungua shimo la kilindi, na moshi ukapanda kutoka humo kama moshi wa tanuru kubwa; jua na hewa vikawa giza kwa sababu ya moshi uliotoka shimoni. 3Kutoka katika moshi huo nzige wakatoka wakaenea duniani, nao wakapewa nguvu kama ile waliyo nayo nge. 4Waliamriwa wasiyaguse majani ya nchi, wala mmea wowote mbichi, wala mti wowote, bali wawadhuru tu wale watu wasio na muhuri wa Mungu kwenye vipaji vya nyuso zao. 5Hawakuruhusiwa kuwaua; nzige hao wangeweza tu kuwatesa kwa miezi mitano, na maumivu waliyosababisha yalikuwa kama maumivu ya mtu aliyeumwa na nge. 6Katika siku hizo watu watakitafuta kifo, lakini hawatakipata; watatamani kufa, lakini kifo kitaendelea kuwakimbia.

7Kwa umbo, nzige hao walikuwa kama farasi waliowekwa tayari kwa vita. Vichwani mwao walikuwa na kitu kilichoonekana kama taji za dhahabu, na nyuso zao zilikuwa kama nyuso za wanadamu. 8Nywele zao zilikuwa kama nywele za mwanamke, na meno yao kama ya simba. 9Vifua vyao vilifunikwa kama kwa dirii za chuma, na mabawa yao yalitoa kelele kama ya magari ya vita na farasi wengi wanaokimbilia vitani. 10Kama nge, wana mikia yenye miiba, na nguvu yao ya kuwadhuru watu kwa miezi mitano iko katika mikia yao. 11Juu yao wana mfalme, yaani malaika wa kilindi. Kwa Kiebrania jina lake ni Abadoni, na kwa Kigiriki anaitwa Apolioni.

12Ole wa kwanza umekwisha pita. Tazama: bado ole mbili zinakuja baada ya haya.

13Kisha malaika wa sita akapiga tarumbeta yake, nami nikasikia sauti moja kutoka katika pembe za madhabahu ya dhahabu iliyo mbele za Mungu. 14Ilimwambia malaika wa sita aliyeshika tarumbeta, “Wafungue wale malaika wanne waliofungwa kando ya mto mkubwa, yaani Frati.” 15Wale malaika wanne wakaachiliwa. Walikuwa wamewekwa tayari kwa ajili ya saa ile, siku ile, mwezi na mwaka ule, ili waue theluthi ya wanadamu. 16Majeshi yao ya wapanda farasi yalikuwa 200,000,000; nilisikia idadi yao. 17Hivi ndivyo nilivyowaona farasi na wapanda farasi wao katika maono yangu. Wapanda farasi walivaa dirii zenye rangi ya moto, ya samawati iliyokolea, na ya manjano kama kiberiti. Vichwa vya farasi vilikuwa kama vichwa vya simba, na moto, moshi na kiberiti vilitoka vinywani mwao. 18Mapigo haya matatu, yaani moto, moshi na kiberiti vilivyotoka vinywani mwao, yaliua theluthi ya wanadamu. 19Nguvu ya farasi hao iko vinywani mwao, na katika mikia yao pia, kwa maana mikia yao ni kama nyoka wenye vichwa, na kwa hiyo wanajeruhi.

20Lakini wanadamu wengine waliosalimika katika mapigo hayo hawakutubu na kuacha vitu walivyotengeneza kwa mikono yao wenyewe; waliendelea kuwaabudu pepo, na sanamu za dhahabu, fedha, shaba, mawe na miti, zisizoweza kuona, wala kusikia, wala kutembea. 21Hawakutubu na kuacha uuaji wao, wala uchawi wao, wala uasherati wao, wala wizi wao.