Ufunuo 22

1Akanionyesha mto wa maji ya uzima, unaong’aa kama kioo, ukitiririka kutoka katika kiti cha enzi cha Mungu na cha Mwanakondoo 2katikati ya barabara kuu ya mji. Kila upande wa mto kuna mti wa uzima, unaozaa matunda mara kumi na mbili, ukitoa matunda yake kila mwezi; na majani yake yanaleta uponyaji kwa mataifa. 3Hakuna kitu chochote kilicholaaniwa kitakachokuwa huko tena. Kiti cha enzi cha Mungu na cha Mwanakondoo kitakuwa ndani ya mji huo, na watumishi wake watamwabudu; 4wataona uso wake, na jina lake litaandikwa kwenye vipaji vya nyuso zao. 5Usiku hautakuwapo tena, wala hawatahitaji nuru ya taa wala nuru ya jua, kwa sababu Bwana Mungu atakuwa nuru yao; nao watatawala milele na milele.

6Akaniambia, “Maneno haya yanaaminika, nayo ni ya kweli. Bwana, Mungu wa roho za manabii, amemtuma malaika wake kuwaonyesha watumishi wake mambo ambayo lazima yatokee upesi. 7Tazama, ninakuja upesi! Heri anayeyashika maneno ya unabii yaliyo katika gombo hili!”

8Mimi Yohana ndiye niliyesikia na kuona mambo haya yote. Nilipoyasikia na kuyaona, nilijitupa chini ili kuabudu miguuni pa malaika aliyekuwa akinionyesha mambo hayo. 9Akaniambia, “Usifanye hivyo! Mimi ni mtumishi wa Mungu kama wewe, na kama ndugu zako manabii, na wote wanaoyashika maneno ya gombo hili. Mwabudu Mungu!”

10Akaniambia pia, “Usiyatie muhuri maneno ya unabii yaliyo katika gombo hili, kwa maana wakati umekaribia. 11Anayetenda mabaya na aendelee kutenda mabaya; aliye mchafu na aendelee kuwa mchafu; mwenye haki na aendelee kutenda haki; aliye mtakatifu na aendelee kuwa mtakatifu.”

12“Tazama, ninakuja upesi, nami ninaleta ujira wangu pamoja nami, kumlipa kila mtu kwa kadiri ya alichotenda. 13Mimi ni Alfa na Omega, wa kwanza na wa mwisho, mwanzo na mwisho.

14Heri wanaoyafua mavazi yao marefu! Watakuwa na ruhusa ya kula mti wa uzima, nao wataingia mjini kupitia malango yake. 15Nje wamebaki mbwa, wachawi, wazinzi, wauaji, waabudu sanamu, na kila anayeupenda uongo na kuuishi.

16Mimi Yesu nimemtuma malaika wangu kuwashuhudia ninyi mambo haya kwa ajili ya makanisa. Mimi ndimi Mzizi na Mzao wa Daudi, nyota ya asubuhi inayong’aa.” 17Roho na bibi arusi wanasema, “Njoo!” Na kila anayesikia na aseme, “Njoo!” Kila mwenye kiu na aje; kila anayetaka na ayachukue maji ya uzima bila malipo.

18Ninamshuhudia kila mtu anayesikia maneno ya unabii yaliyo katika gombo hili: mtu yeyote akiyaongeza, Mungu atamwongezea mapigo yaliyoandikwa katika gombo hili. 19Na mtu yeyote akiondoa maneno katika gombo la unabii huu, Mungu atamwondolea sehemu yake katika mti wa uzima na katika mji mtakatifu unaoelezwa katika gombo hili.

20Yule anayeshuhudia mambo haya yote anasema, “Ndiyo, ninakuja upesi!” Amina! Njoo, Bwana Yesu!

21Neema ya Bwana Yesu iwe pamoja na wote.