Ufunuo 5

1Katika mkono wa kulia wa yule aliyeketi juu ya kiti cha enzi niliona gombo. Lilikuwa limeandikwa ndani na nyuma, na lilikuwa limefungwa kwa mihuri saba. 2Kulikuwa pia na malaika mwenye nguvu, nikamsikia akitangaza kwa sauti kubwa, “Ni nani anayestahili kuivunja mihuri ya gombo hili na kulifungua?” 3Hakuna hata mmoja, mbinguni, duniani wala chini ya dunia, aliyeweza kulifungua gombo hilo au kutazama ndani yake. 4Nilianza kulia kwa uchungu, kwa kuwa hakuna aliyeonekana anastahili kulifungua gombo wala kutazama ndani yake. 5Kisha mmoja wa wazee akaniambia, “Acha kulia! Tazama, Simba wa kabila la Yuda, Mzizi wa Daudi, ameshinda, hivyo yeye anaweza kulifungua gombo na mihuri yake saba.”

6Kisha, katikati ya kiti cha enzi na wale viumbe hai wanne, katikati ya wazee, nilimwona Mwanakondoo amesimama, akionekana kama aliyechinjwa. Alikuwa na pembe saba na macho saba; hayo ndiyo roho saba za Mungu, zilizotumwa katika dunia yote. 7Alikuja, akalipokea gombo kutoka katika mkono wa kulia wa yule aliyeketi juu ya kiti cha enzi. 8Mara alipolichukua gombo, wale viumbe hai wanne na wazee ishirini na wanne walisujudu mbele ya Mwanakondoo. Kila mmoja wao alikuwa na kinubi, nao walishika mabakuli ya dhahabu yaliyojaa uvumba, ambao ni maombi ya watu watakatifu wa Mungu. 9Wanaimba wimbo mpya: “Wewe unastahili kulipokea gombo na kuivunja mihuri yake, kwa sababu ulichinjwa, na kwa gharama ya damu yako uliwanunua kwa ajili ya Mungu watu wa kila kabila na lugha na jamii na taifa. 10Uliwafanya kuwa ufalme, na makuhani wanaomtumikia Mungu wetu, nao wanatawala duniani.”

11Kisha nilitazama, nikasikia sauti za malaika wengi kukizunguka kiti cha enzi, viumbe hai na wazee. Idadi yao haikuweza kuhesabika: elfu kumi mara elfu kumi, na maelfu mara maelfu. 12Walisema kwa sauti kubwa, “Mwanakondoo aliyechinjwa anastahili kupokea uweza, utajiri, hekima, nguvu, heshima, utukufu na sifa!” 13Kisha nilisikia kila kiumbe mbinguni, duniani, chini ya dunia na baharini, na vyote vilivyomo, vikisema: “Kwa yeye aliyeketi juu ya kiti cha enzi na kwa Mwanakondoo kuwe na sifa na heshima na utukufu na uweza milele na milele!” 14Viumbe hai wanne walisema, “Amina!” Na wale wazee walianguka chini, wakaabudu.