Ufunuo 17

1Kisha mmoja wa wale malaika saba waliokuwa na mabakuli saba akaja, akasema nami: “Njoo, nitakuonyesha hukumu ya yule kahaba mkuu, aliyeketi juu ya maji mengi. 2Wafalme wa dunia walizini naye, na wakazi wa dunia walilewa kwa divai ya uasherati wake.” 3Katika Roho alinichukua mpaka nyikani. Nikamwona mwanamke ameketi juu ya mnyama mwekundu sana. Mnyama huyo alikuwa amejaa majina ya kumkufuru Mungu, naye alikuwa na vichwa saba na pembe kumi. 4Mwanamke huyo alivaa nguo za zambarau na nyekundu sana, na alikuwa amepambwa kwa dhahabu, vito vya thamani na lulu. Mkononi mwake alishika kikombe cha dhahabu kilichojaa machukizo na uchafu wa uasherati wake. 5Kwenye kipaji cha uso wake liliandikwa jina, jina la siri: “Babeli mkuu, mama wa makahaba na wa machukizo ya dunia.” 6Nikamwona mwanamke huyo amelewa damu ya watu watakatifu wa Mungu na damu ya mashahidi wa Yesu. Nilipomwona nilistaajabu mno. 7Lakini malaika akaniambia, “Kwa nini unastaajabu? Nitakueleza siri ya mwanamke huyo, na ya mnyama mwenye vichwa saba na pembe kumi anayembeba. 8Mnyama uliyemwona alikuwako zamani, na sasa hayupo; atapanda kutoka kilindini, naye anaelekea kwenye maangamizi. Wakazi wa dunia, wale ambao majina yao hayajaandikwa katika kitabu cha uzima tangu ulimwengu ulipoumbwa, watastaajabu watakapomwona mnyama huyo, kwa sababu alikuwako, na hayupo, naye atakuwapo tena.

9Hapa akili yenye hekima inahitajika. Vichwa hivyo saba ni milima saba, na mwanamke huyo ameketi juu yake. Pia ni wafalme saba. 10Watano kati yao wameanguka; mmoja yupo sasa; mwingine bado hajaja, na atakapokuja itampasa kukaa kwa muda mfupi tu. 11Na yule mnyama aliyekuwako na sasa hayupo ni mfalme wa nane, lakini yeye ni mmoja wa wale saba, naye anaelekea kwenye maangamizi. 12Zile pembe kumi ulizoziona ni wafalme kumi ambao bado hawajapata ufalme; lakini pamoja na mnyama watapokea mamlaka ya kifalme kwa saa moja. 13Hao wana nia moja, nao wanamkabidhi mnyama nguvu zao na mamlaka yao. 14Watapigana vita na Mwanakondoo, lakini Mwanakondoo atawashinda, kwa maana yeye ni Bwana wa mabwana na Mfalme wa wafalme; na wale walio pamoja naye ni walioitwa, waliochaguliwa na waaminifu.”

15Akaendelea kusema: “Yale maji uliyoyaona, ambayo juu yake kahaba ameketi, ni watu na umati, mataifa na lugha. 16Zile pembe kumi ulizoziona na yule mnyama watamgeukia yule kahaba kwa chuki; watamwacha ameharibiwa na yu uchi, watakula nyama yake na kumteketeza kwa moto. 17Ni Mungu aliyetia mioyoni mwao kufanya kile yeye anachokusudia: wawe na nia moja na kumkabidhi mnyama ufalme wao, mpaka maneno ya Mungu yatimie. 18Mwanamke uliyemwona ni ule mji mkubwa unaotawala juu ya wafalme wa dunia.”