Ufunuo 21

1Kisha nikaona mbingu mpya na nchi mpya; mbingu za kwanza na nchi ya kwanza zilikuwa zimetoweka, na bahari haikuwepo tena. 2Nikauona mji mtakatifu, Yerusalemu mpya, ukishuka kutoka mbinguni kutoka kwa Mungu, ukiwa tayari kama bibi arusi aliyejipamba kwa ajili ya mume wake. 3Kisha nikasikia sauti kubwa kutoka kwenye kiti cha enzi: “Tazama, makao ya Mungu yako pamoja na wanadamu! Atafanya makao yake pamoja nao, nao watakuwa jamii za watu wake; Mungu mwenyewe atakuwa pamoja nao. 4Kila chozi atalifuta kutoka machoni mwao. Kifo hakitakuwapo tena, wala maombolezo, wala kilio, wala maumivu. Mambo ya zamani yamepita.”

5Yule anayeketi juu ya kiti cha enzi akasema, “Tazama, ninavifanya vitu vyote kuwa vipya!” Kisha akasema, “Andika, kwa sababu maneno haya yanaaminika, nayo ni ya kweli.” 6Akaniambia, “Imekwisha! Mimi ni Alfa na Omega, mwanzo na mwisho. Mwenye kiu nitampa maji ya chemchemi ya uzima bila malipo. 7Kila anayeshinda atarithi mambo haya; nitakuwa Mungu wake, naye atakuwa mwana wangu. 8Lakini waoga, wasio waaminifu, wachukizao, wauaji, wazinzi, wachawi, waabudu sanamu na waongo wote, fungu lao ni katika ziwa linalowaka moto na kiberiti. Hicho ndicho kifo cha pili.”

9Mmoja wa wale malaika saba waliokuwa wameshika mabakuli saba yaliyojaa mapigo saba ya mwisho akaja, akazungumza nami: “Njoo, nitakuonyesha bibi arusi, mke wa Mwanakondoo.” 10Katika Roho alinichukua mpaka kwenye mlima mkubwa na mrefu, akanionyesha Yerusalemu, mji mtakatifu, ukishuka kutoka mbinguni kutoka kwa Mungu, 11ukiwa na utukufu wa Mungu. Mng’ao wake ulikuwa kama wa jiwe la thamani kubwa kupita yote, kama yaspi, angavu kama kioo. 12Ulikuwa na ukuta mkubwa na mrefu wenye malango kumi na mawili. Malaika kumi na wawili walisimama kwenye malango hayo, na juu ya malango yaliandikwa majina, majina ya makabila kumi na mawili ya Waisraeli. 13Malango matatu yalielekea mashariki, matatu kaskazini, matatu kusini na matatu magharibi. 14Ukuta wa mji ulijengwa juu ya mawe kumi na mawili ya msingi, na juu yake kulikuwa na majina kumi na mawili ya mitume kumi na wawili wa Mwanakondoo.

15Yule aliyezungumza nami alishika mwanzi wa dhahabu wa kupimia, ili apime mji, malango yake na ukuta wake. 16Mji huo umejengwa kwa umbo la mraba; urefu wake ni sawa na upana wake. Akaupima mji kwa mwanzi huo: kama kilomita 2,200. Urefu wake, upana wake na kimo chake ni sawa. 17Akaupima pia ukuta wake: kama mita 65 kwa kipimo cha wanadamu, ambacho malaika alikuwa akikitumia. 18Ukuta ulijengwa kwa yaspi, na mji wenyewe ulikuwa wa dhahabu safi, angavu kama kioo. 19Misingi ya ukuta wa mji ilipambwa kwa kila aina ya vito vya thamani: msingi wa kwanza ulikuwa yaspi, wa pili yakuti samawi, wa tatu kalkedoni, wa nne zumaridi, 20wa tano sardoniki, wa sita akiki, wa saba krisolitho, wa nane zabarajadi, wa tisa yakuti manjano, wa kumi krisoprasi, wa kumi na moja hiakintho, na wa kumi na mbili amethisto. 21Malango yale kumi na mawili yalikuwa lulu kumi na mbili; kila lango lilitengenezwa kwa lulu moja. Na barabara kuu ya mji ilikuwa ya dhahabu safi, angavu kama kioo.

22Sikuona hekalu ndani ya mji huo, kwa maana hekalu lake ni Bwana Mungu, Mwenyezi, na Mwanakondoo. 23Mji huo hauhitaji jua wala mwezi kuuangazia; utukufu wa Mungu unautia nuru, na taa yake ni Mwanakondoo. 24Mataifa yatatembea katika nuru yake, na wafalme wa dunia wanaleta utukufu wao ndani yake. 25Malango yake hayatafungwa kamwe wakati wa mchana, wala hakutakuwa na usiku huko. 26Watu wataleta ndani yake utukufu na heshima ya mataifa. 27Hakuna kitu kilicho najisi kitakachoingia ndani yake kamwe, wala mtu yeyote anayetenda machukizo au anayeishi kwa uongo; ni wale tu walioandikwa katika kitabu cha uzima cha Mwanakondoo watakaoingia.