Ufunuo 19

1Baada ya hayo nilisikia kitu kama sauti kubwa ya umati mkubwa mbinguni: “Haleluya! Wokovu na utukufu na uweza ni vya Mungu wetu, 2ambaye hukumu zake ni za kweli na za haki. Amemhukumu yule kahaba mkuu aliyeiharibu dunia kwa uasherati wake, na amemdai damu ya watumishi wake.” 3Wakasema tena, “Haleluya! Moshi wake unapanda milele na milele.” 4Wale wazee ishirini na wanne na wale viumbe hai wanne wakasujudu, wakamwabudu Mungu aliyeketi juu ya kiti cha enzi, wakisema: “Amina! Haleluya!”

5Sauti ikatoka kwenye kiti cha enzi: “Msifuni Mungu wetu, enyi watumishi wake wote, nanyi nyote mnaomcha, wadogo kwa wakubwa!” 6Nikasikia kitu kama sauti ya umati mkubwa mno, kama mvumo wa maji mengi na kama mshindo wa ngurumo zenye nguvu: “Haleluya! Kwa maana Bwana Mungu, Mwenyezi, ameanza kutawala. 7Tufurahi na kushangilia sana, tumpe yeye utukufu, kwa maana arusi ya Mwanakondoo imefika, na bibi arusi wake amejiandaa. 8Amepewa kuvaa kitani safi, inayong’aa na safi.” Kitani hiyo safi ni matendo ya haki ya watu watakatifu wa Mungu.

9Akaniambia, “Andika: Heri walioitwa kwenye karamu ya arusi ya Mwanakondoo!” Akaniambia pia, “Haya ndiyo maneno ya kweli ya Mungu.” 10Kisha nikajitupa chini miguuni pake ili nimwabudu. Akaniambia, “Usifanye hivyo! Mimi ni mtumishi mwenzako tu, na wa ndugu zako wanaoshika ushuhuda wa Yesu. Mwabudu Mungu! Kwa maana ushuhuda wa Yesu ndio roho ya unabii.”

11Mbingu zilifunguka mbele ya macho yangu, nikaona farasi mweupe. Aliyeketi juu yake anaitwa Mwaminifu na wa Kweli; kwa haki yeye anahukumu na kupigana vita. 12Macho yake ni kama mwali wa moto, na juu ya kichwa chake kuna mataji mengi ya kifalme. Ameandikwa jina ambalo hakuna mtu analijua ila yeye peke yake. 13Vazi analovaa limechovywa katika damu, na jina analoitwa ni Neno la Mungu. 14Nyuma yake walikuja majeshi ya mbinguni, wamepanda farasi weupe, wamevaa kitani safi, nyeupe na safi. 15Kinywani mwake hutoka upanga mkali wa kuyapiga mataifa. Yeye atawachunga kwa fimbo ya chuma, naye anakanyaga shinikizo la divai ya hasira kali ya ghadhabu ya Mungu, Mwenyezi. 16Juu ya vazi lake na juu ya paja lake limeandikwa jina: MFALME WA WAFALME NA BWANA WA MABWANA.

17Kisha nikamwona malaika amesimama katika jua. Aliwaita kwa sauti kuu ndege wote wanaoruka juu angani: “Njooni, mkusanyike kwa ajili ya karamu kuu anayoiandaa Mungu, 18mle nyama ya wafalme, ya majemadari na ya wenye nguvu, nyama ya farasi na ya wanaowapanda, nyama ya watu wote, walio huru na watumwa, wadogo kwa wakubwa.” 19Nikamwona mnyama, na pamoja naye wafalme wa dunia na majeshi yao, wamekusanyika kupigana na yule aliyeketi juu ya farasi na jeshi lake. 20Lakini mnyama alikamatwa, pamoja na yule nabii wa uongo aliyefanya ishara mbele yake na kuzitumia kuwadanganya wale waliopokea chapa ya mnyama na kuisujudia sanamu yake. Hao wawili walitupwa wakiwa hai ndani ya ziwa la moto unaowaka kwa kiberiti. 21Wengine waliuawa kwa upanga wa yule aliyeketi juu ya farasi, upanga uliotoka kinywani mwake, na ndege wote wakashiba nyama zao.