Ufunuo 20

1Kisha nikamwona malaika akishuka kutoka mbinguni, akiwa na ufunguo wa kilindi na mnyororo mzito mkononi mwake. 2Alimkamata yule joka, yule nyoka wa zamani, ambaye ni Ibilisi na Shetani, akamfunga kwa minyororo kwa miaka elfu moja. 3Akamtupa ndani ya kilindi, akakifunga na kukitia muhuri juu yake, ili asiyadanganye mataifa tena mpaka miaka elfu moja itimie. Baada ya hapo lazima afunguliwe kwa muda mfupi.

4Nikaona viti vya enzi, na watu wameketi juu yake waliopewa mamlaka ya kuhukumu. Nikaona pia roho za wale waliokatwa vichwa kwa sababu ya kushika ushuhuda wa Yesu na neno la Mungu, wale waliokataa kumsujudia mnyama au sanamu yake, wala hawakukubali kutiwa chapa yake kwenye vipaji vya nyuso zao au kwenye mikono yao. Hao walifufuka, wakatawala pamoja na Kristo kwa miaka elfu moja. 5Wafu wengine hawakufufuka mpaka miaka elfu moja ilipotimia. Huu ndio ufufuo wa kwanza. 6Heri na mtakatifu ni kila aliye na sehemu katika ufufuo wa kwanza! Kifo cha pili hakina mamlaka juu yao; watakuwa makuhani wa Mungu na wa Kristo, nao watatawala pamoja naye kwa miaka elfu moja.

7Miaka elfu moja itakapotimia, Shetani atafunguliwa kutoka gerezani mwake, 8naye atatoka kwenda kuyadanganya mataifa yaliyo katika pembe nne za dunia, Gogu na Magogu, na kuwakusanya kwa ajili ya vita; wengi wasiohesabika kama mchanga wa bahari. 9Walipanda wakipita katika upana wote wa dunia, wakaizingira kambi ya watu watakatifu wa Mungu na mji ule unaopendwa. Lakini moto ukashuka kutoka mbinguni ukawateketeza. 10Kisha Ibilisi, aliyewadanganya, akatupwa ndani ya ziwa la moto na kiberiti, ambamo pia yule mnyama na yule nabii wa uongo wamo; nao watateswa mchana na usiku milele na milele.

11Kisha nikaona kiti cha enzi kikubwa cheupe, na yule aliyeketi juu yake; nchi na mbingu zilikimbia mbele ya uso wake, wala hapakuonekana mahali pa kuwa kwao. 12Nikawaona wafu, wakubwa na wadogo, wamesimama mbele ya kiti cha enzi. Vitabu vilifunguliwa, na kitabu kingine pia kikafunguliwa, yaani kitabu cha uzima. Wafu wakahukumiwa kwa yale yaliyoandikwa katika vitabu, kulingana na matendo yao. 13Bahari iliwatoa wafu wake, na Kifo na Kuzimu vikawatoa wafu wao, nao wakahukumiwa kila mmoja kwa matendo yake. 14Kisha Kifo na Kuzimu vyenyewe vikatupwa ndani ya ziwa la moto. Ziwa la moto ndilo kifo cha pili. 15Na kila ambaye hakuonekana ameandikwa katika kitabu cha uzima alitupwa ndani ya ziwa la moto.