Ufunuo 14

1Nilitazama, nikamwona Mwanakondoo amesimama juu ya mlima Sayuni. Pamoja naye walisimama watu 144,000, ambao vipaji vya nyuso zao vilikuwa na jina lake na jina la Baba yake. 2Kutoka mbinguni nilisikia sauti kama mshindo wa maji mengi na kama ngurumo kubwa, na sauti hiyo ilikuwa kama ya wapiga vinubi wakipiga vinubi vyao. 3Mbele ya kiti cha enzi, mbele ya wale viumbe hai wanne na wazee, wanaimba kitu kama wimbo mpya, wimbo ambao hakuna mtu aliyeweza kujifunza isipokuwa wale 144,000 waliokombolewa kutoka duniani. 4Hawa ndio waliojitunza wasitiwe unajisi na wanawake; wao ni mabikira. Ndio wanaomfuata Mwanakondoo, wakienda popote anapokwenda. Walikombolewa kutoka miongoni mwa wanadamu kuwa malimbuko kwa Mungu na kwa Mwanakondoo, 5na hakuna uongo ulioonekana katika maneno yao; hawana dosari.

6Nikamwona pia malaika mwingine akiruka juu kabisa angani, akiwa na Injili ya milele ya kuwatangazia watu wanaoishi duniani, kila taifa, kabila, lugha na jamii. 7Akapaza sauti, “Mcheni Mungu na kumpa utukufu, kwa maana saa imefika ambayo yeye atahukumu. Mwabuduni Muumba wa mbingu na nchi, wa bahari na chemchemi za maji.”

8Malaika mwingine, wa pili, akaja nyuma yake, akasema, “Babeli ule mkuu umeanguka, umeanguka! Uliyanywesha mataifa yote divai ya uasherati wake wenye wazimu.”

9Malaika wa tatu akawafuata, akipaza sauti, “Mtu yeyote akimwabudu mnyama na sanamu yake, na kupokea chapa yake kwenye kipaji cha uso au kwenye mkono, 10yeye pia atakunywa divai ya hasira kali ya Mungu, isiyochanganywa na maji, iliyomiminwa katika kikombe cha ghadhabu yake, naye atateseka katika moto na kiberiti mbele ya malaika watakatifu na mbele ya Mwanakondoo. 11Moshi wa mateso yao unapanda milele na milele; mchana na usiku hawapati raha, wale wanaomwabudu mnyama na sanamu yake, na wote wanaopokea chapa ya jina lake.”

12Hapa ndipo watu watakatifu wa Mungu wanapohitaji uvumilivu, wao wanaozishika amri za Mungu na kudumu katika imani yao kwa Yesu.

13Sauti kutoka mbinguni ikaniambia, “Andika: Tangu sasa, heri wafu wanaokufa wakiwa katika Bwana!” “Kweli,” Roho anasema, “na wapumzike kutoka katika kazi zao ngumu, kwa maana yale waliyoyatenda yanakwenda pamoja nao.”

14Kisha nikaona wingu jeupe, na juu yake ameketi mmoja kama mwana wa mtu. Juu ya kichwa chake kulikuwa na taji la dhahabu, na mkononi mwake mundu mkali. 15Malaika mwingine akatoka hekaluni, akimwita kwa sauti kuu yule aliyeketi juu ya wingu, “Upitishe mundu wako ukusanye mavuno! Saa ya kuvuna imefika; mavuno ya dunia yamekauka, yako tayari.” 16Yule aliyeketi juu ya wingu akaupitisha mundu wake juu ya dunia, na mavuno ya dunia yakakusanywa.

17Kisha malaika mwingine akatoka katika hekalu lililo mbinguni, naye pia ameshika mundu mkali. 18Malaika mwingine akaja kutoka madhabahuni, malaika mwenye mamlaka juu ya moto. Akamwita kwa sauti kuu yule aliyeshika mundu mkali, “Upitishe mundu wako mkali ukate mashada kutoka katika mzabibu wa dunia, kwa maana zabibu zake zimeiva kabisa.” 19Malaika akaupitisha mundu wake juu ya dunia, akakata mavuno ya mzabibu wa dunia, akayatupa katika shinikizo la hasira kali ya Mungu, lile shinikizo kubwa. 20Nje ya mji shinikizo likakanyagwa, na damu ikatoka ndani yake, hadi kufikia hatamu za farasi, kwa umbali wa kama kilomita 300.