Ufunuo 7

1Kisha nikaona malaika wanne wamesimama katika pembe nne za dunia. Walikuwa wakiuzuia upepo wa pande nne za dunia, ili upepo usivume juu ya nchi kavu, wala juu ya bahari, wala juu ya mti wowote. 2Nilimwona malaika mwingine akija kutoka upande wa mawio ya jua, akiwa na muhuri wa Mungu aliye hai. Aliwaita kwa sauti kubwa wale malaika wanne walioruhusiwa kuidhuru nchi na bahari: 3“Msiidhuru nchi, wala bahari, wala miti, mpaka tuwe tumewatia watumishi wa Mungu wetu muhuri kwenye vipaji vya nyuso zao.”

4Nikasikia idadi ya waliotiwa muhuri: 144,000, waliotiwa muhuri kutoka katika kila kabila la Waisraeli. 5Kutoka kabila la Yuda, 12,000 walitiwa muhuri; kutoka kabila la Reubeni, 12,000; kutoka kabila la Gadi, 12,000; 6kutoka kabila la Asheri, 12,000; kutoka kabila la Naftali, 12,000; kutoka kabila la Manase, 12,000; 7kutoka kabila la Simeoni, 12,000; kutoka kabila la Lawi, 12,000; kutoka kabila la Isakari, 12,000; 8kutoka kabila la Zabuloni, 12,000; kutoka kabila la Yusufu, 12,000; na kutoka kabila la Benyamini, 12,000 walitiwa muhuri.

9Baada ya hayo nilitazama, nikaona umati mkubwa mno ambao hakuna mtu aliyeweza kuuhesabu. Walitoka katika kila taifa, na katika makabila yote, jamii na lugha, nao walisimama mbele ya kiti cha enzi na mbele ya Mwanakondoo, wamevaa mavazi meupe marefu, na matawi ya mitende mikononi mwao. 10Wanapiga kelele kwa sauti kubwa: “Wokovu ni wa Mungu wetu, aliyeketi juu ya kiti cha enzi, na wa Mwanakondoo!” 11Malaika wote walisimama wakikizunguka kiti cha enzi, wazee na wale viumbe hai wanne, nao wakajitupa kifudifudi mbele ya kiti cha enzi, wakamwabudu Mungu. 12Walisema, “Amina! Sifa na utukufu, hekima na shukrani, heshima na uweza na nguvu viwe kwa Mungu wetu milele na milele! Amina.”

13Mmoja wa wazee akanigeukia na kuniuliza: “Hawa waliovaa mavazi meupe marefu, ni akina nani, na wametoka wapi?” 14Nikamjibu, “Wewe ndiye unayejua, bwana.” Akaniambia, “Hawa ndio wanaotoka katika dhiki kuu. Wameyafua mavazi yao katika damu ya Mwanakondoo na kuyafanya meupe. 15Kwa sababu hiyo wanasimama mbele ya kiti cha enzi cha Mungu, na kumtumikia mchana na usiku katika hekalu lake, na yule anayeketi juu ya kiti cha enzi atatanda hema yake juu yao. 16Hawatakuwa na njaa tena, wala hawatakuwa na kiu tena; jua halitawapiga, wala joto lolote linalounguza. 17Kwa maana Mwanakondoo aliye katikati ya kiti cha enzi atakuwa mchungaji wao, na atawaongoza kwenye chemchemi za maji ya uzima, na kila chozi Mungu atalifuta kutoka machoni mwao.”