Ufunuo 16

1Nikasikia sauti kubwa kutoka hekaluni ikiwaambia wale malaika saba: “Nendeni mkayamwage mabakuli saba ya hasira kali ya Mungu juu ya dunia.”

2Malaika wa kwanza akaenda, akalimwaga bakuli lake juu ya dunia, na majipu mabaya yenye maumivu yakawapata watu waliokuwa na chapa ya mnyama na walioisujudia sanamu yake.

3Malaika wa pili alipolimwaga bakuli lake ndani ya bahari, maji yake yakawa kama damu ya maiti, na kila kiumbe kilichoishi baharini kikafa.

4Malaika wa tatu alilimwaga bakuli lake ndani ya mito na chemchemi za maji, nayo yakageuka kuwa damu. 5Kisha nikamsikia malaika wa maji akisema: “Wewe ni mwenye haki, wewe uliyepo na uliyekuwepo, Mtakatifu, kwa kuwa umehukumu hivi. 6Kwa sababu walimwaga damu ya watu wako watakatifu na ya manabii, nawe umewapa damu wanywe. Hayo ndiyo wanayostahili.” 7Kisha nikasikia madhabahu ikijibu: “Ndiyo, Bwana Mungu, Mwenyezi, hukumu zako ni za kweli na za haki.”

8Malaika wa nne alipolimwaga bakuli lake juu ya jua, jua likapewa uwezo wa kuwaunguza watu kwa moto. 9Watu waliunguzwa kwa joto kali, wakalikufuru jina la Mungu aliyekuwa na mamlaka juu ya mapigo haya; hawakukubali kutubu na kumpa yeye utukufu.

10Kisha malaika wa tano akalimwaga bakuli lake juu ya kiti cha enzi cha mnyama, na giza likaufunika ufalme wake. Watu wakaziuma ndimi zao kwa uchungu, 11wakamkufuru Mungu wa mbinguni kwa sababu ya maumivu yao na majipu yao; lakini hawakuyaacha matendo yao.

12Malaika wa sita alipolimwaga bakuli lake juu ya mto mkubwa, Frati, maji yake yakakauka ili njia iwe tayari kwa ajili ya wafalme wa upande wa mawio ya jua. 13Kisha nikaona pepo wachafu watatu wanaofanana na vyura wakitoka katika kinywa cha joka, katika kinywa cha mnyama, na katika kinywa cha nabii wa uongo. 14Hao ni roho wa pepo wanaofanya ishara, nao huwaendea wafalme wa dunia nzima ili kuwakusanya kwa ajili ya vita katika siku kuu ya Mungu, Mwenyezi. 15“Tazama, ninakuja kama mwizi! Heri mtu anayekesha na kuyashika mavazi yake, ili asitembee uchi, aibu yake ikaonekana!” 16Kisha pepo hao wakawakusanya wafalme mahali paitwapo kwa Kiebrania Armagedoni.

17Malaika wa saba alipolimwaga bakuli lake angani, sauti kubwa ikatoka hekaluni, kutoka kwenye kiti cha enzi, ikisema: “Imekwisha!” 18Kukawa na umeme wa radi, sauti kubwa na ngurumo, na tetemeko la nchi likatokea, kubwa mno kiasi kwamba halijawahi kutokea kama hilo tangu wanadamu walipoanza kuishi duniani. 19Mji ule mkubwa ukapasuka sehemu tatu, na miji ya mataifa ikaanguka. Mungu hakumsahau Babeli mkuu: alimnywesha kikombe cha divai ya hasira kali ya ghadhabu yake. 20Kila kisiwa kikakimbia, na milima haikuonekana tena. 21Mvua kubwa ya mawe, kila jiwe likiwa na uzito wa kama kilo 34, ikawashukia watu kutoka angani, nao wakamkufuru Mungu kwa sababu ya pigo hilo la mvua ya mawe, kwa kuwa pigo hilo lilikuwa kali mno.