Ufunuo 11

1Nikapewa mwanzi wa kupimia kama fimbo, nikaambiwa, “Inuka ulipime hekalu la Mungu na madhabahu, na uwahesabu wale wanaoabudu humo. 2Lakini usiupime ua ulio nje ya hekalu; uache nje, kwa maana umekabidhiwa mataifa, nao watauponda mji mtakatifu chini ya miguu yao kwa miezi arobaini na miwili. 3Nitawapa mashahidi wangu wawili uwezo, nao watatoa unabii kwa siku 1,260, wakiwa wamevaa nguo za magunia.”

4Hawa wawili ndio ile mizeituni na vile vinara vya taa vinavyosimama mbele ya Bwana wa dunia. 5Mtu yeyote akitaka kuwadhuru, moto hutoka vinywani mwao na kuwateketeza adui zao. Yeyote atakayetaka kuwadhuru lazima auawe kwa namna hiyo. 6Wana mamlaka ya kuzifunga mbingu, ili mvua isinyeshe katika siku za unabii wao; wana mamlaka pia juu ya maji, kuyageuza kuwa damu, na mamlaka ya kuipiga dunia kwa kila aina ya pigo kila wanapotaka.

7Watakapokwisha kutimiza ushuhuda wao, yule mnyama anayepanda kutoka kilindini atapigana vita nao, atawashinda na kuwaua. 8Maiti zao zitalala katika uwanja wa wazi wa mji ule mkubwa, ambao kwa lugha ya unabii unaitwa Sodoma na Misri, mahali ambapo hata Bwana wao alisulubiwa. 9Watu kutoka katika jamii, makabila, lugha na mataifa wanaziangalia maiti zao kwa siku tatu na nusu, wala hawakubali zizikwe kaburini. 10Wale wanaoishi duniani wanafurahia kifo chao na kufanya sherehe; watapeana zawadi, kwa sababu manabii hawa wawili walikuwa wamewatesa watu wa dunia.

11Lakini baada ya siku hizo tatu na nusu, pumzi ya uhai kutoka kwa Mungu ikaingia ndani yao, wakasimama kwa miguu yao, na wale waliokuwa wakiwatazama wakashikwa na hofu kuu. 12Sauti kuu kutoka mbinguni ikawaita, “Pandeni huku!” Wakaisikia, nao wakapanda mbinguni katika wingu, adui zao wakiwa wanawatazama. 13Saa ile ile tetemeko kubwa la ardhi likatokea, sehemu ya kumi ya mji ikaanguka, na tetemeko hilo likaua watu 7,000. Waliosalia wakajawa na hofu, wakamtukuza Mungu wa mbinguni.

14Ole wa pili umekwisha pita. Tazama: ole wa tatu unakuja upesi.

15Kisha malaika wa saba akapiga tarumbeta yake, na sauti kubwa mbinguni zikasema: “Utawala juu ya ulimwengu sasa ni wa Bwana wetu na wa Kristo wake, naye atatawala milele na milele.”

16Kisha wale wazee ishirini na wanne wanaoketi juu ya viti vyao vya enzi mbele za Mungu wakajitupa kifudifudi, wakamwabudu Mungu. 17Wakasema, “Bwana Mungu Mwenyezi, uliyepo na uliyekuwepo, tunakushukuru wewe, kwa kuwa umeutwaa uweza wako mkuu na kuanza utawala wako. 18Mataifa yalighadhibika, lakini ghadhabu yako imefika, na wakati wa wafu kuhukumiwa, wa watumishi wako manabii kupewa ujira, pamoja na watu wako watakatifu na wote wanaoliheshimu jina lako, wadogo na wakubwa; na wakati wa kuwaangamiza wale wanaoiangamiza dunia.”

19Hekalu la Mungu lililo mbinguni likafunguliwa wazi, na ndani yake sanduku la agano lake likaonekana. Umeme wa radi ukamulika, kukawa na sauti kubwa na ngurumo, tetemeko la ardhi, na mvua kubwa ya mawe.