Ufunuo 15

1Kisha nikaona ishara nyingine mbinguni, kubwa na ya kushangaza: malaika saba wenye mapigo saba, mapigo ya mwisho, kwa maana kwa hayo hasira kali ya Mungu inafikia mwisho wake.

2Nikaona kitu kama bahari ya kioo iliyochanganyika na moto. Kando ya bahari hiyo ya kioo walisimama wale waliomshinda mnyama, sanamu yake na hesabu ya jina lake, nao walishika vinubi vya Mungu. 3Wanaimba wimbo wa Musa, mtumishi wa Mungu, na wimbo wa Mwanakondoo: “Matendo yako ni makuu na ya ajabu kama nini, Bwana Mungu Mwenyezi! Njia zako ni za haki na za kweli, Mfalme wa zama! 4Bwana, ni nani asiyekuogopa na kulitukuza jina lako? Ni wewe peke yako uliye mtakatifu. Kila taifa litakuja na kuabudu mbele yako, kwa sababu matendo yako ya haki sasa yako wazi kwa wote.”

5Kisha nikatazama, na mbinguni hekalu, yaani hema ya ushuhuda, likawa wazi. 6Kutoka hekaluni wakatoka wale malaika saba walioshika mapigo saba, wamevaa kitani safi inayong’aa, na mikanda ya dhahabu imefungwa vifuani mwao. 7Mmoja wa wale viumbe hai wanne akawakabidhi wale malaika saba mabakuli saba ya dhahabu, yaliyojaa pomoni hasira kali ya Mungu aliye hai milele na milele. 8Moshi kutoka katika utukufu wa Mungu na kutoka katika uweza wake ukalijaza hekalu, na hakuna mtu aliyeweza kuingia ndani mpaka mapigo saba ya malaika saba yalipokwisha.